U Hrodzienski dramteatr pryjšła maładaja aktrysa z Rasii. U teatra kadravyja prablemy
U Hrodzienskim abłasnym teatry budzie pracavać 23‑hadovaja aktrysa z Rasii Anastasija Abraškina. Jana pierajechała ŭ Hrodna z Maskvy. Raniej tut pačała pracavać režysiorka sa Smalenska Alina Sarokina. Pry hetym teatr praciahvaje šukać artystaŭ i inšych supracoŭnikaŭ, a pasada hałoŭnaha režysiora zastajecca vakantnaj užo šeść hadoŭ, piša Hrodna.life.
Pra pierajezd i pačatak pracy Abraškina raskazała ŭ Instagram.
«Moj šlach u akciorskaj prafiesii pačaŭsia ź pierajezdu ŭ inšuju krainu. Hetaje rašeńnie całkam źmianiła majo žyćcio», — napisała jana.
Jašče ŭ mai aktrysa-pačatkoŭka raskazvała, što ŭbačyła vakansiju ŭ Hrodzienskim dramteatry i pryjechała na prasłuchoŭvańnie.
«Ubačyła vakansiju, pryjechała i adrazu zakachałasia: u horad, u teatr, u hetuju nievierahodna mocnuju enierhietyčnuju prastoru», — napisała Abraškina.
U toj ža majskaj publikacyi dziaŭčyna raskazała, što zajmajecca dakumientami dla pierajezdu.
I ŭžo ŭ vieraśni aktrysa napisała, što pracuje ŭ hrodzienskim dramteatry.
Adnak na sajcie ŭstanovy jana pakul što ŭ składzie trupy nie zhadvajecca.
Vučyłasia ŭ Maskvie ŭ majsterni Juryja Čarnova
Abraškina skončyła maskoŭski Instytut sučasnaha mastactva, dzie vučyłasia ŭ majsterni narodnaha artysta Rasii Juryja Čarnova.
ISM — niedziaržaŭnaja VNU, adkrytaja ŭ 1992 hodzie. Siarod vykładčykaŭ teatralnaha fakulteta — akciory Ivan Achłabyścin, viadomy pa roli doktara Bykava ŭ sieryjale «Interny», Michaił Haravy, Anatol Haračaŭ i Alena Cypłakova. Kafiedru teatralnaha mastactva ŭznačalvaje Dźmitryj Piaŭcoŭ, dekanam fakulteta pracuje Volha Drazdova. Usie jany aktyŭna padtrymlivajuć raźviazanuju Rasijaj pry padtrymcy režymu Łukašenki vajnu va Ukrainie.
«Ale paraspytvajcie, dzie raniejšyja artysty»: što pisali ŭ kamientaryjach
Pad publikacyjaj Abraškinaj karystalniki žadali joj tvorčych pośpiechaŭ i abiacali pryjści na śpiektakli.
«Niečakana. Jašče i ŭ Hrodnie. Vielmi rady vam», — napisaŭ adzin z kamientataraŭ.
Inšyja pytalisia pra raniejšuju trupu.
«Vielmi zdorava, vinšuju. Ale paraspytvajcie, dzie raniejšyja artysty», — havorycca ŭ adnym z kamientaryjaŭ.
Jašče adzin karystalnik spytaŭ:
«Pytańnie tolki, kudy miascovyja artysty padzielisia, što z-za miažy pryjazdžajuć».
Adna z udzielnic abmierkavańnia napisała:
«Pry ŭsioj pavazie, mnie baluča pra heta čuć… Hetaje miesca naležyć inšym ludziam. Heta byŭ ich dom. Ich ścieny. Ich pavietra…»
U adkaz Abraškina napisała, što prajšła adbor u režysiora i dyrektara i atrymała pracu dziakujučy prafiesijanalizmu i staŭleńniu da spravy.
«Ja zmahałasia za heta miesca, a nie pryjšła na ŭsio hatovaje. U teatry patrebnyja byli akciory, značyć, nie prosta tak, i kiraŭnictva pravodziła adbor», — napisała jana.
Na pytańnie pra miascovych artystaŭ aktrysa adkazała, što ŭ teatry pracujuć i akciory ź Biełarusi.
Pytalisia ŭ Abraškinaj i pra viedańnie biełaruskaj movy. Jana raskazała, što ciapier vučyć jaje:
«Bolšaść śpiektaklaŭ ihrajucca na ruskaj movie, ale mnie chočacca hrać śpiektakli na biełaruskaj movie».
Hrodzienski teatr niekalki hadoŭ šukaje supracoŭnikaŭ
Pasada hałoŭnaha režysiora ŭ Hrodzienskim dramteatry zastajecca vakantnaj užo šeść hadoŭ. Teatr taksama šukaje namieśnika dyrektara pa administracyjna-haspadarčaj dziejnaści — hetaja vakansija raźmieščana na jaho sajcie.
Namieśnika dyrektara šukajuć ź vieraśnia 2024 hoda. Tady Dźmitryja Čylika, jaki zajmaŭ hetu pasadu, pačali sudzić za chabar, a źviestki pra jaho źnikli z sajta teatra. Paźniej Čyliku prysudzili piać hadoŭ kałonii za atrymańnie chabaru ŭ bujnym pamiery — pavodle č. 2 art. 430 KK.
Taksama teatr šukaje hałoŭnaha mastaka, mastaka pa śviatle, inžyniera-enierhietyka, inžyniera pa pažarnaj biaśpiecy, mašynista sceny i prybiralščyka pamiaškańniaŭ. Vakansii hałoŭnaha buchhałtara i aśviatlalnika paznačanyja jak pierśpiektyŭnyja.
Na sajcie Dziaržaŭnaj słužby zaniataści taksama raźmieščanyja dźvie abjavy pra vakansii artysta dramy ŭ Hrodzienskim dramteatry. U abiedźviuch abjavach prapanujuć poŭnuju staŭku i zarobak 950—1000 rubloŭ. Patrabavanaja adukacyja — siaredniaja śpiecyjalnaja.
Usiaho na sajcie Dziaržaŭnaj słužby zaniataści apublikavanyja 222 vakansii artystaŭ pa Biełarusi, ź ich 29 — u Hrodzienskaj vobłaści. Supracoŭnikaŭ šukajuć, u pryvatnaści, ansambl «Biełyja Rosy», Hrodzienskaja kapeła i abłasnaja fiłarmonija.
U 2020 hodzie režysioraŭ zvolnili paśla abviaščeńnia zabastoŭki
27 kastryčnika 2020 hoda z Hrodzienskaha dramteatra zvolnili hałoŭnaha režysiora Hienadzia Mušpierta i režysiora-pastanoŭščyka Siarhieja Kurylenku. Raniej jany abviaścili pra dałučeńnie da zabastoŭki. Jak režysiory paviedamili Hrodna.life, ich zvolnili za admovu ad vykanańnia słužbovych abaviazkaŭ.
Mušpiert da taho momantu prapracavaŭ u teatry 26 hadoŭ, Kurylenka — 40. Za dva tydni da zvalnieńnia Mušpiert atrymaŭ dźvie vymovy za toje, što svoječasova nie pradstaviŭ płan pastanovak na nastupny hod.
U vieraśni taho ž hoda zvolnili akciora Ihara Ułanava. Raniej jon admoviŭsia padpisać tłumačalnuju zapisku z nahody spynienaha 20 vieraśnia śpiektakla.
Paśla zvalnieńnia Kurylenki ŭ teatr sa Słonima pryjšoŭ režysior Siarhiej Jaskievič.
U śniežni 2025 hoda stała viadoma, što ŭ Hrodzienskim dramteatry pačała pracavać režysiorkaj-pastanoŭščycaj Alina Sarokina z Rasii. Jana skončyła HITIS i da pierajezdu dziesiać hadoŭ pracavała ŭ Smalenskim dramatyčnym teatry imia Hrybajedava.
Uletku 2025 hoda Sarokina pahutaryła z dyrektarkaj teatra Volhaj Bahdanovič i vyrašyła pasprabavać siabie ŭ Hrodnie. Pieršaj jaje pastanoŭkaj tut staŭ «Ščaŭkunok».
U budučych śpiektaklach Sarokina chacieła nadać uvahu historyi i adlustravać jaje tak, kab jana była zrazumiełaja hledaču, «uličvajučy mientalitet i kulturnyja asablivaści».
Zładziła dzień naradžeńnia dla darahoha sabaki maltypu, maryć pra ŭnukaŭ: jak ciapier žyvie Anžalika Ahurbaš
Hrodzienski dramteatr uznačaliła režysiorka sa Smalenska
U Kupałaŭski teatr uziali novuju aktrysu. Taksama z Rasii
Byłaja žonka Paŭła Charłančuka pryznałasia, što ŭ jaje ŭnutry «ŭsio jašče pustata»
U Kupałaŭskim teatry rasijskija režysiory praviaduć tvorčuju łabaratoryju, u jakoj abiaruć śpiektakl dla repiertuaru
Biznesoviec rodam z Babrujska admovicca ad svajho hihanckaha aŭstralijskaha zarobku dziela šancu atrymać $35 miljonaŭ3
Kamientary