Łukašenka zhadaŭ biełarusku, jakaja naradziła trojniu i atrymała kvateru
I pastaviŭ jaje ŭ prykład rabotnikam Instytuta paraškovaj mietałurhii.
Łukašenka siońnia padčas naviedvańnia vyprabavalnaha palihona Instytuta paraškovaj mietałurhii mimachodź vykazaŭsia pra biełarusku, jakaja naradziła trojniu i atrymała kvateru.
Źviartajučysia da adnaho z kiraŭnikoŭ instytuta, jon zaznačyŭ, što kali pa tym ci inšym zapatrabavanym napramku budzie vynik, to i jon asabista, i dziaržava ŭ cełym zaŭsiody akažuć nieabchodnuju padtrymku: «Zrabi i prychodź, jak ja časta kažu, prasi, čaho zachočaš».
Jon pryvioŭ u prykład, jak žančyna, jakaja naradziła trojniu, paprasiła kvateru.
«Žančyna naradziła trojniu. A ja niejak jazykom lapnuŭ: prychodź i prasi kvateru. Jana paprasiła, ja addaŭ. Tak i ty, prychodź i prasi, ja budu vykonvać», — skazaŭ Łukašenka.
Historyja 25‑hadovaj Anhieliny Kaminskaj hrymnuła niekalki tydniaŭ tamu. 28 žniŭnia žančyna stała adrazu šmatdzietnaj maci. Na 35 tydni biełaruska naradziła troch dziaŭčynak vahoj 2130, 2050 i 1940 hramaŭ. Nazvali ich Stefanija, Jasienija i Jeva.
Napačatku vieraśnia Anhielina zapisała zvarot da Łukašenki z prośbaj dać joj kvateru — bo ŭ Hod biełaruskaj žančyny jana padaryła krainie troch cudoŭnych žančyn. Videa dziaŭčyny ŭ instahramie sabrała bolš za 7 miljonaŭ prahladaŭ.
Zvarot vyklikaŭ vialiki rezanans u biełaruskim hramadstvie. Adny zachaplalisia śmiełaściu Anhieliny, inšyja paličyli heta nachabstvam.
Praz paru tydniaŭ siamja atrymała kvateru.
«Našy dziaŭčatki i my sustreniem Novy hod užo ŭ svaim novym žylli», — padzialiłasia ŭ instahramie Anhielina i pakazała klučy.
Dziaŭčyna padziakavała Łukašenku za toje, što «žyllovaje pytańnie nastolki dobra i chutka vyrašyłasia».
Kamientary