Łukašenka zajaŭlaŭ z teleekranaŭ pra niedatyčnaść svajoj siamji da rekłamnaha biznesu. Ale «Biuro» vyśvietliła, što jaho niaviestka času nie hublaje.
U vieraśni 2026 hoda Alaksandr Łukašenka publična aburaŭsia, što jaho siamju źviazvajuć z rekłamnym biznesam: «Užo dajšło da taho, akazvajecca, heta maja siamja hetym [rekłamaj] zajmajecca».
Firma «Kreatyŭny kod», jakaja źviazanaja z Hannaj Łukašenkaj (Siałuk), stała ŭłaśnikam adnoj z bujnych sietak vonkavaj rekłamy ŭ Biełarusi. «Biuro» vyśvietliła novyja padrabiaznaści pra jaje biznes, jakija źniapraŭdžvajuć zajavy kiraŭnika Biełarusi.
Na bałansie «Kreatyŭnaha koda» biez małoha 3 tysiačy rekłamnych kanstrukcyj (bujnafarmatnych biłbordaŭ, sici-farmataŭ i ličbavych ekranaŭ) va ŭsioj Biełarusi: 185 u Breście, 296 u Viciebsku, 198 u Homieli, 161 u Hrodnie, 229 u Mahilovie i 1858 u Minsku.
Pavodle źviestak krynic «Biuro» z hetaj haliny, rynak vonkavaj rekłamy ŭ Biełarusi ŭ 2024 hodzie aceńvaŭsia jak minimum na 10 tysiač kanstrukcyj. Ahulny abjom rynku vonkavaj rekłamy ŭ 2025 hodzie skłaŭ 27,1 miljona biełaruskich rubloŭ (biez małoha 7,9 miljona jeŭra).
Takim čynam, možna kazać pra toje, što «Kreatyŭny kod» kiruje amal tracinaj usiaho rynku vonkavaj rekłamy ŭ Biełarusi.
Adkrytym zastajecca pytańnie: dzie novastvoranaje ahienctva mahło ŭziać za karotkija terminy takuju kolkaść rekłamnych kanstrukcyj va ŭsioj krainie? Adrazu dźvie nie źviazanyja adna z adnoj krynicy paviedamili «Biuro» na ŭmovach ananimnaści, što «Kreatyŭnamu kodu» adyšli płoščy adnaho z bujnych apierataraŭ vonkavaj rekłamy ŭ Biełarusi — kampanii z češskim kapitałam «Bihbord».
Jašče adna zajmalnaja detal. Pry rehistracyi damiena sajta «Kreatyŭnaha koda» była paznačanaja elektronnaja pošta: [email protected].
Zhodna z danymi vycieku, uładalnika hetaha mejła zavuć Pavieł Čarnuchin. Dziakujučy «Kibierpartyzanam» «Biuro» vyśvietliła, što jak minimum z 2013 da 2024 hoda jon pracavaŭ u strukturach «Bihborda».
Nie tak daŭno my raskazvali, što 25% «Kreatyŭnaha koda» naležać firmam, źviazanym z Hannaj Łukašenkaj (15% zapisana na «Muzyčnuju miedyjakampaniju», a 10% na «ANSŁ pradakšn»). Astatnija 75% «Kreatyŭnaha koda» naležać ZAT «KorusMiedyja».
Forma ŭłasnaści ZAT nie praduhledžvaje raskryćcia kančatkovych bienieficyjaraŭ, adnak «Biuro» vyśvietliła, što dyrektarkaj u «KorusMiedyja» ličycca Darja Charužka, jakaja bolš za 10 hadoŭ pracavała ŭ SZAT «Biaśpiečnyja darohi Biełarusi» (apieratar adzinaj sistemy fotafiksacyi parušeńniaŭ chutkasnaha režymu ŭ Biełarusi), za jakim staić biznesoviec Dźmitryj Kurnosienka.
«Biaśpiečnyja darohi Biełarusi» majuć dvuch ułaśnikaŭ, heta aŭstryjskaja firma Avonside Holdings GmbH (99,9%) i biznesoviec Dźmitryj Kurnosienka (0,01%). Avonside Holdings GmbH u svaju čarhu taksama naležyć dźvium kampanijam: kyrhyzstanskaj «BDB Mieniedžmient» (35%) i kiprskaj Safe Roads Ltd. (65%). Apošniaja zapisanaja na samoha Dźmitryja Kurnosienku (40%) i rasijanku Anastasiju Nikanavu (60%) — dačku rasijskaha biznesoŭca Aleha Badery, biznes-partniora Kurnosienki.
Kamientary