Pratestoŭcy ŭvajšli ŭ Isłamabad, dzie ciapier ź vizitam Łukašenka. Pačalisia biesparadki i stralanina
Vielizarnyja kałony pratestoŭcaŭ, jakija ŭčora akružyli stalicu Pakistana, uvajšli ŭ horad i ŭžo znachodziacca kala ŭradavaha kvartała, dzie ciapier znachodzicca Alaksandr Łukašenka razam ź vialikaj delehacyjaj biełaruskich čynoŭnikaŭ. Pavodle miascovych miedyja, u horad była ŭviedziena armija, a siłaviki pačali stralać pa pratestoŭcach bajavymi kulami. Jość zahinułyja.
Jak paviedamlajuć telekanał Al Jazeera i adno z najbujniejšych anhłamoŭnych vydańniaŭ Pakistana The News International, šmattysiačnyja kałony antyŭradavych pratestoŭcaŭ uvajšli ŭ Isłamabad i ŭžo znachodziacca kala čyrvonaj zony horada (uradavy kvartał). U pakistanskaj stalicy ciapier iduć bai ź siłavikami, jakija pačali prymianiać bajavuju zbroju suprać pratestoŭcaŭ.
Ułady zadziejničali 245 artykuł Kanstytucyi (jaki dazvalaje zadziejničać armiju dla «padtrymańnia hramadskaha paradku» i abarony «ad źniešniaj ahresii, i pahrozy vajny»), i ŭviali va ŭradavy kvartał armiejskija kantynhienty.
Pavodle miascovych ŚMI, zahinuli jak minimum try pratestoŭcy i jašče niekalki dziasiatkaŭ paranienyja. Z boku siłavikoŭ zahinuŭ adzin aficer i jašče zvyš sotni paranienyja.
قافلے کے ایک حصے کے مناظر @MAyaz804 VC:#پہلے_رہائی_پھر_مذاکرات pic.twitter.com/iSv9LcTIF4
U horadzie ŭ dadzieny momant znachodzicca Alaksandr Łukašenka. Pavodle jahonaj pres-słužby, palityk ładzić sustrečy ŭ aficyjnaj rezidencyi pakistanskaha premjer-ministra Šachbaza Šaryfa, jakaja raźmiaščajecca ŭ čyrvonaj zonie Isłamabada, kudy ruchajucca kałony pratestoŭcaŭ.
Nahadajem, što stalica Pakistana Isłamabad, kudy ŭčora prylacieŭ Łukašenka z trochdzionnym vizitam (a razam ź im i vialikaja delehacyja biełaruskich čynoŭnikaŭ i pramysłoŭcaŭ — ahułam 80 čałaviek), ciapier nahadvaje izalavanuju krepaść — horad zakryty na zajezd i vyjezd, pierakrytyja ŭsie hałoŭnyja aŭtamahistrali, a taksama darohi da mižnarodnaha aeraporta Isłamabada.
Dla achovy horada mabilizavanyja jak minimum 34 tysiačy siłavikoŭ i vajskoŭcaŭ, a hramadski transpart i škoły nie pracujuć, internet častkova zabłakavany, paviedamlali ŭčora vydańnie Pakistan Today i inšyja miascovyja i suśvietnyja miedyja.
Ahulnaja kolkaść pratestoŭcaŭ varjirujecca ad niekalkich dziasiatkaŭ da niekalkich sotniaŭ tysiač čałaviek (u toj ža čas pakistanskija ŭłady śćviardžajuć, što pratestoŭcaŭ usiaho krychu bolš za 10 tysiač).
Nahadajem, što sotni tysiač prychilnikaŭ byłoha premjer-ministra Pakistana Imrana Chana, jaki ciapier znachodzicca ŭ turmie, pa jahonym zakliku raspačali dniom u niadzielu ahulnanacyjanalny marš apazicyi na pakistanskuju stalicu Isłamabad z usich kutkoŭ krainy, patrabujučy vyzvaleńnia ich lidara i adstaŭki ŭrada.
Apazicyjnaje šeście sustreła žorstkuju reakcyju z boku pakistanskich uładaŭ, jakija mabilizavali palicejskich i vajskoŭcaŭ, adklučyli mabilny internet u zonach šeścia pratestoŭcaŭ, a taksama zabłakavali stalicu z usich bakoŭ, pierakryŭšy klučavyja darohi na ŭjeździe ŭ horad transpartnymi kantejnierami.
Pa źviestkach indyjskaha telekanała News18, ułady Pakistana praviali maštabnyja aryšty siarod členaŭ i aktyvistaŭ bujnoj apazicyjnaj Partyi spraviadlivaści (PTI), jakoj kiruje Imran Chan. Na hety momant viadoma pra zatrymańnie jak minimum 4 tysiač pratestoŭcaŭ pa ŭsioj krainie (siarod aryštavanych jość i parłamientaryi). Adnak da maršu praciahvajuć dałučacca ludzi z rehijonaŭ, i jon praciahvaje iści na stalicu.
Partyja spraviadlivaści (PTI) pa vynikach parłamienckich vybaraŭ u lutym 2024 hoda nabrała najbolšuju kolkaść miescaŭ (92) u Nacyjanalnaj asamblei Pakistana (nižniaja pałata parłamienta) praz padtrymku niezaležnych kandydataŭ, bo samoj partyi byŭ zabaronieny ŭdzieł u vybarach uładami Pakistana. Pavodle apošnich sacyjałahičnych apytańniaŭ, PTI padtrymlivajuć 35% nasielnictva (kala 85 miljonaŭ čałaviek), a sama partyja maje adnosna siabroŭskija znosiny z krainami Zachadu.
Kamientary
I nikoha nie vypuskać!