U Minsku adkryli restaran, nazva jakoha pahražaje mižnarodnym skandałam
U Minsku adkryli restaran, nazva jakoha całkam supadaje ź viadomaj sietkaj u Litvie. Adnak litoŭskija ŭładalniki zajavili, što nie majuć dačynieńnia da hetaj ustanovy, i zapadozryli biełarusaŭ u kradziažy tavarnaha znaka. «Lusterka» vyśvietliła, chto vałodaje hetym minskim restaranam.
U Minsku 7 śniežnia adkryŭsia restaran Grill London. Jahonyja nazva i łahatyp całkam supadajuć ź viadomaj adnajmiennaj sietkaj restaranaŭ u Litvie. Da taho ž va ŭstanovy identyčny ź litoŭskimi «bratami» interjer, vytrymany ŭ ciomnych tonach u styli łoft, i padobnaja kancepcyja kuchni.
Pry hetym uładalniki sietki Grill London u susiedniaj krainie zajavili, što nie majuć dačynieńnia da hetaj ustanovy, a taksama abvinavacili biełarusaŭ u kradziažy tavarnaha znaka. Adzin z akcyjanieraŭ Grill London Ejmantas Navikaŭskas padkreśliŭ u razmovie z LRT, što kampanija nie viadzie nijakaj dziejnaści ŭ Biełarusi.
«Infarmacyju pra niezakonnaje vykarystańnie tavarnaha znaka našaj sietki restaranaŭ u Biełarusi my atrymali niekalki dzion tamu, usiu najaŭnuju infarmacyju pa hetaj spravie my pieradali jurystam», — paviedamiŭ jon.
Jak vyśvietliła «Lusterka», vałodaje restaranam Grill London u Minsku kampanija «Midpoint hrup». Jana była zasnavanaja ŭ 2011 hodzie i zajmałasia pasłuhami hatelaŭ i anałahičnych miescaŭ dla pražyvańnia z restaranami.
Raniej firma kiravała kaviarniaj «Pronta» na vulicy Kujbyšava ŭ Minsku. Ciapier jana zakrytaja. Joj taksama naležyć roźničny abjekt u hateli Crowne Plaza Minsk.
Uładalniki firmy — hramadzianie Turcyi Šanciurk Hiursieł i Hierkiem Sierkan Arynč, vynikaje sa źviestak adzinaha dziaržrehistratara jurydyčnych asob. Abodva majuć roŭnyja doli ź lipienia 2023 hoda. Da hetaha siarod suzasnavalnikaŭ značyŭsia ich suajčyńnik Ezer Ahiun Achmiet.
Pavodle źviestak za 2022 hod, Šanciurk Hiursieł značyŭsia dyrektaram firmy «Biełpartnior». Jon ža vałodaŭ tureckaj kampanijaj, u jakoj była dola ŭ hetym ambicyjnym prajekcie.
Hetaja kampanija pavinna była pabudavać u Homielskaj vobłaści račny port. DziaržSMI nazyvali jaho budučym «klučom dla vychadu našaj krainy ŭ Čornaje mora», jaho rekłamavaŭ sam Łukašenka. Płanavałasia, što jon budzie pastaŭlać pa race naftapradukty i kalijnyja ŭhnajeńni. Z pačatkam vajny va Ukrainie prajekt pa adnaŭleńni račnoha sudnachodstva całkam spyniŭsia. Hetamu biznesoŭcu taksama naležyć budaŭničaja firma «Atelbud».
Druhi saŭładalnik, Hierkiem Sierkan Arynč, taksama značycca jak indyvidualny pradprymalnik, jaki z 2017 hoda ŭ hetym statusie zajmajecca prahramavańniem.
Ciapier čytajuć
Dzie naradzilisia viadomyja biełarusy? Bolš za dziesiać tysiač asob sabrali na adnoj karcie4
Kamientary