Ludzi z kožnym hodam razmaŭlajuć usio mienš — i heta biada
Pavodle novaha daśledavańnia, našy štodzionnyja razmovy stanoviacca karaciejšymi. Siońnia my pramaŭlajem prykładna na 20% mienš słoŭ, čym 20 hadoŭ tamu. Najbolš vyrazny spad zafiksavany siarod pradstaŭnikoŭ pakaleńnia Z.
Amierykanskija daśledčyki praanalizavali tysiačy aŭdyjazapisaŭ paŭsiadzionnych razmoŭ 2197 čałaviek va ŭzroście ad 10 da 90 hadoŭ z roznych krain. Nabor danych achoplivaŭ 22 daśledavańni, praviedzienyja na praciahu 2005—2019 hadoŭ. Pra vyniki paviedamlaje vydańnie Daily Mail.
Kali ŭ 2007 hodzie ludzi ŭ siarednim vymaŭlali 15 959 słoŭ na dzień, to ŭ 2019 hodzie — tolki 12 792, što śviedčyć pra 20‑pracentnaje źnižeńnie. Dalejšy analiz pakazaŭ, što da 2019 hoda kolkaść pramoŭlenych słoŭ štohod źmianšałasia ŭ siarednim na 338 u dzień, što ekvivalentna prykładna 120 000 słoŭ za hod.
Asabliva rezkaje skaračeńnie nazirajecca ŭ ludziej, maładziejšych za 25 hadoŭ, — jany hublali słovy prykładna na 44% chutčej, čym starejšyja.
Navukoŭcy miarkujuć, što pryčynaj hetaha moža być pavieličeńnie kolkaści elektronnych listoŭ, tekstavych paviedamleńniaŭ i sacyjalnych sietak, ale adznačajuć, što isnujuć i inšyja, pakul nievytłumačalnyja faktary.
Aŭtary źviartajuć uvahu na toje, što vusnyja razmovy majuć asablivaści, jakija piśmovaja kamunikacyja nie zaŭsiody zdolnaja pieradać. Važnuju rolu adyhryvajuć intanacyja, temp maŭleńnia, emacyjnyja sihnały i niepasrednaja zvarotnaja reakcyja surazmoŭcy. Ci zabiaśpiečvaje pierapiska tyja ž sacyjalnyja pieravahi, što i žyvyja hutarki, zastajecca adkrytym pytańniem, i budučyja daśledavańni pavinny dać na jaho adkaz.
Daśledčyki padkreślivajuć: havorka idzie nie prosta pra słovy, a pra razmovy, jakich bolš nie adbyvajecca — jak praciahłych, tak i zusim karotkich. Navat dadatkovyja 300 słoŭ u dzień mohuć aznačać prostuju razmovu z susiedam ci žart u kole blizkich — i takim čynam dapamahać źnižać uzrovień adzinoty.
Navukoŭcy zaŭvažajuć: kali ludzi havorać mienš, jany mienš uzajemadziejničajuć adzin z adnym. Heta vyklikaje tryvohu, bo sučasnaje hramadstva ŭžo sutykajecca z epidemijaj adzinoty i sacyjalnaj izalacyi.
«My vykarystoŭvajem usio mienš vusnych słoŭ, asabliva moładź. Reč nie tolki ŭ ličbavych technałohijach. Sacyjalnyja suviazi taksama źmianiajucca. U nas stała mienš asabistych kantaktaŭ. Ale nam nieabchodny kantakt «vočy ŭ vočy». Sutnaść žyćcia — u znosinach, i heta karysna dla našaha psichałahičnaha zdaroŭja», — cytuje vydańnie słovy prafiesara psichałohii Mančesterskaha ŭniviersiteta Kery Kupiera.
Na jaho dumku, tendencyja vyhladaje tryvožnaj: u budučyni maładyja ludzi mohuć mieć jašče mienšy słoŭnikavy zapas, a značnuju častku funkcyj myśleńnia i tvorčaści buduć pieradavać štučnamu intelektu.
Kamientary