Zatrymali chłopca, jaki zabiŭ u centry Ńju-Jorka kiraŭnika najbujniejšaj strachavoj kampanii ZŠA

Tompsan byŭ zastreleny na minułym tydni kala hatela Hilton na Manchetenie, maštabnyja pošuki vialisia ź sierady.

Mandžone zatrymali prykładna za 450 km na zachad ad Ńju-Jorka, paśla taho jak jaho apaznaŭ pa fota adzin z naviedvalnikaŭ restarana chutkaha charčavańnia.

Pavodle źviestak palicyi, pry zatrymańni ŭ jaho byŭ znojdzieny nadrukavany na 3D-pryntary pistalet, jaki mierkavana vykarystoŭvaŭsia pry stralbie ŭ Ńju-Jorku.

Pieršapačatkova Mandžone paŭstaŭ pierad sudom Piensilvanii i byŭ abvinavačany pa piaci punktach, u vyzvaleńni pad zakład jamu było admoŭlena.

Praź niekalki hadzin ńju-jorkskija śledčyja vystavili jamu abvinavačvańni ŭ zabojstvie.

Što viadoma pra zatrymanaha

Pavodle danych palicyi, zatrymany Łuidžy Mandžone naradziŭsia i vyras u Bałtymory, štat Merylend, dzie vučyŭsia ŭ pryvatnaj škole dla chłopčykaŭ Gilman School, jakuju, pa słovach kiraŭnictva škoły, jon skončyŭ najlepšym u kłasie ŭ 2016 hodzie.

Paśla hetaha jon pastupiŭ u prestyžny Piensilvanski ŭniviersitet, a jaho apošniaje viadomaje miesca pražyvańnia — Hanałułu na Havajach.

Pry zatrymańni ŭ jaho znajšli ahniastrelnuju zbroju i niekalki paśviedčańniaŭ asoby — adno z hetym imiem, inšaje padroblenaje.

U tym liku pry sabie ŭ jaho byli amierykanski pašpart i padroblenaje paśviedčańnie asoby štata Ńju-Džersi, jakoje vykarystoŭvałasia dla rehistracyi ŭ chostele ŭ Ńju-Jorku, dzie padazravanaha zaŭvažyli pierad stralboj.

Pa słovach palicyi, pistalet, znojdzieny ŭ padazravanaha, byŭ «pistaletam-pryvidam», vierahodna, «zroblenym na 3D-pryntary» i zdolnym stralać patronami kalibra 9 mm.

«Pistalety-pryvidy» źbirajucca z detalaŭ, zamoŭlenych pa internecie, nie rehistrujucca, i ich pachodžańnie praktyčna niemahčyma adsačyć, bo na detalach časta adsutničajuć sieryjnyja numary.

Palicyja taksama śćviardžaje, što pry sabie ŭ jaho byŭ rukapisny «trochstaronkavy manifiest», jaki pralivaje śviatło na jaho «matyvy i myśleńnie» i śviedčyć, što jon, «padobna, adčuvaje niepryjaznaść da karparatyŭnaj Amieryki».

U profili Mandžone ŭ LinkedIn pakazana, što jon pracavaŭ inžynieram pa apracoŭcy dadzienych u TrueCar, ličbavym sajcie roźničnaha handlu novymi i ŭžyvanymi aŭtamabilami.

U sacyjalnych sietkach Mandžone paviedamlajuć, što jon straciŭ suviaź ź siamjoj i siabrami. U adnym z pastoŭ, adznačanym Mandžone na sajcie X, chtości napisaŭ: «Hej, ty ŭ paradku? Nichto nie čuŭ pra ciabie ŭžo niekalki miesiacaŭ, i, padobna, tvaja siamja šukaje ciabie».

• 2
• 0
• 0
• 1
• 0
• 5
• 0
• 0