«Niekatoryja viciablanie pavodzili siabie vielmi hodna». Śviedki pažaru ŭ handlovym centry padzialilisia ŭražańniami
Śviedki pažaru raskazali kanału «Vitiebsk, ja hulaju!», što ahoń u handlovym centry «Biełaruś», što siońnia ŭviečary zahareŭsia ŭ Viciebsku, raspaŭsiudžvaŭsia chutka, vielmi šmat čaho vyharała ŭ paviljonach.
Ale pry hetym niekatoryja viciablanie ź liku naviedvalnikaŭ i rabotnikaŭ centra pavodzili siabie vielmi hodna. Niahledziačy na niebiaśpieku, jany vyvodzili da apošniaha ludziej, jakija paśpieli spałochacca, nadychacca haram i byli dezaryjentavanyja.
Taksama kanał piša, što pa horadzie raspaŭsiudžvajecca pach harełaha płastyku, «u rajonie płoščy Pieramohi znachodzicca nievynosna».
Usiaho z budynka, jak paviedamlałasia, evakujavali 215 čałaviek. Dziasiatak ź ich ratavalniki zabrali z voknaŭ z dapamohaj pažarnych leśvic.
Paviedamlajecca, što ŭ Viciebskaj abłasnoj balnicy znachodziacca 6 paciarpiełych. Jašče adzin znachodzicca ŭ balnicy chutkaj miedycynskaj dapamohi. Troje sa špitalizavanych znachodziacca ŭ ciažkim stanie. Viadoma, što jašče troje čałaviek źviarnulisia ŭ miedycynskija ŭstanovy samastojna.
Dla paciarpiełych ułady adkryli linii psichałahičnaj dapamohi, što moža śviedčyć pra surjoznaść nastupstvaŭ. Da budynka handlovaha centra pryjechała kiraŭnictva horada, admienienyja ŭsie zapłanavanyja na siońnia pieradśviatočnyja mierapryjemstvy. Kala handlovaha centra zakryty piešachodny ruch.
Ciapier čytajuć
Čempijon Biełarusi i Polščy trapiŭ za kraty praz toje, što źbieh ad słužby ŭ biełaruskim vojsku. A ciapier uvohule źnik2
Kamientary