Znajšli rasijskaha vajskoŭca, jaki maje dačynieńnie da zabojstva žančyny z čyrvonym manikiuram u Bučy. Jaje fota stała simvałam raźni
Ukrainskaja palicyja nazvała imia rasijskaha kamandzira, jaki addaŭ zahad stralać pa mirnych žycharach u Bučy.
Śledčaje ŭpraŭleńnie Nacpalicyi Ukrainy ŭstanaviła asobu rasijskaha vajskoŭca, datyčnaha da zabojstva Iryny Filkinaj u Bučy.
Supracoŭnica kampanii «Epicentr» zahinuła ŭ sakaviku 2022 hoda padčas rasijskaj akupacyi. Fota jaje ruki z čyrvonym manikiuram ablacieła ŭsie suśvietnyja ŚMI i stała adnym ź simvałaŭ raźni ŭ Bučy. Pa hetym manikiury Irynu nieŭzabavie apaznali znajomyja.
Padazravanym źjaŭlajecca Arciom Tarejeŭ, 1995 hoda naradžeńnia, kamandzir 234-ha desantna-šturmavoha pałka 76-j dyvizii PDV Rasii.
Pa danych śledstva, 5 sakavika 2022 hoda Tarejeŭ addaŭ zahad stralać pa ŭsich mirnych žycharach, jakija źjaviacca ŭ rajonie skryžavańnia vulic Jabłonskaj i Vadapravodnaj u Bučy, paviedamlaje Bučanskaja haradskaja rada.
U toj ža dzień kala 11:15 Iryna Filkina, jakaja jechała na rovary, była rasstralanaja rasijskimi vajskoŭcami — u jaje vypuścili nie mienš za 15 kul z aŭtamatyčnaj zbroi i bajavoj mašyny desantu.
U cełym, pa danych śledstva, u vyniku zahadu Tarejeva na vulicy Jabłonskaj byli zabityja 13 mirnych žycharoŭ.
Za amal miesiac rasijskaj akupacyi ŭ Bučy, pavodle źviestak miascovych uładaŭ, zahinuli bolš za 500 mirnych žycharoŭ. Rasśledavańni pravaachoŭnych orhanaŭ i ŚMI pakazali, što ludziej zabivali rasijskija vajskoŭcy.
Ciapier čytajuć
Taksistka z Tadžykistana naśmierć źbiła biełarusku ŭ Polščy — i spakojna pakinuła krainu24
Kamientary