Syrski patłumačyŭ, čamu adpraviŭ vojski ŭ Kurskuju vobłaść, a nie abaraniać Pakroŭsk
Udar pa słaba abaronienaj Kurskaj vobłaści, kaža Alaksandr Syrski, prymusiŭ rasijan pierakinuć tudy značnyja siły i daŭ ukrainskaj armii čas na adnaŭleńnie. Adnak nastup na Pakroŭsk apieracyja nie spyniła.
Były hałoŭnakamandujučy Uzbrojenymi siłami Ukrainy Alaksandr Syrski ŭ intervju BBC asprečyŭ mierkavańnie, što siły, zadziejničanyja ŭ Kurskaj apieracyi, lepš było b nakiravać na abaronu ŭschodniaha frontu.
Pavodle jaho, letam 2024 hoda Rasija nastupała na ŭsich 13 apieratyŭnych napramkach, na niekatorych majučy šmatrazovuju pieravahu ŭ siłach. Ukrainskaje kamandavańnie šukała mahčymaść sarvać hetyja płany, udaryŭšy tam, dzie rasijskaja abarona była słabiejšaja.
Taki ŭčastak znajšli nasuprać Sumskaj vobłaści. Jak raskazaŭ Syrski, Rasija pierakinuła adtul asnoŭnyja siły na Charkaŭski napramak, dzie jany zaviaźli ŭ pamiežnych bajach. Miažu prykryvali pieravažna sałdaty terminovaj słužby, a asobnyja bataljony byli raściahnutyja na 10—12 kiłamietraŭ.
U nastupalnaj hrupoŭcy Ukrainy, pavodle hienierała, byli try niapoŭnyja desantna-šturmavyja bryhady i dva šturmavyja bataljony. Inšyja padraździaleńni išli śledam i zamacoŭvalisia na zachoplenaj terytoryi. Dźvie bryhady rychtavalisia da apieracyi miesiac, a treciaja adnaŭlałasia paśla ciažkich bajoŭ pad Tareckam.
Syrski śćviardžaje, što pad Pakroŭskam hetyja bryhady z ulikam ich stanu nie adyhrali b istotnaj roli suprać amal stotysiačnaj rasijskaj hrupoŭki. U Kurskaj vobłaści jany zmahli prarvać słabuju abaronu.
Pavodle jaho źviestak, za miesiac ukrainskija vojski ŭziali pad kantrol 1273 kvadratnyja kiłamietry rasijskaj terytoryi. Rasija była vymušanaja pierakinuć na Kurski napramak kala 70 tysiač vajskoŭcaŭ, u tym liku desantnikaŭ, marskuju piachotu i najbolš padrychtavanyja motastrałkovyja častki.
«Heta dało nam mahčymaść faktyčna padrychtavać reziervy, dać pieradyšku našym vojskam i adnavić bajazdolnaść hetych vojskaŭ, jakija panieśli straty ŭ takich ciažkich bajach», — zajaviŭ Syrski.
Jon taksama adznačyŭ, što apieracyja padniała bajavy duch ukrainskich vajskoŭcaŭ.
Kurskaja apieracyja nie spyniła rasijskaha nastupu na Pakroŭsk. Heta pryznaŭ i sam Syrski. Utrymać zachoplenuju terytoryju ŭ Rasii ŭkrainskim vojskam taksama nie ŭdałosia. Adnak Syrski ličyć apieracyju paśpiachovaj: pavodle jaho, jana prymusiła Rasiju pierakinuć značnyja siły ŭ Kurskuju vobłaść, a ŭkrainskaj armii dała čas padrychtavać reziervy i adnavić bajazdolnaść.
Kamientary