Suśvietnaja ekanomika ŭsio bolš padobnaja da litary K. Dzie na joj znachodzicca Biełaruś?

Pavodle novaha prahnozu MVF, u 2026 hodzie suśvietnaja ekanomika vyraście na 3,1%, a ŭ 2027‑m — na 3,4%. Adnak za hetymi ličbami chavajucca vialikija adroźnieńni pamiž krainami.

Jak piša MarketWatch, kali jašče ŭ krasaviku fond prahnazavaŭ, što 95% suśvietnaha ekanamičnaha rostu zabiaśpiečać 54 krainy, to ciapier ich kolkaść skaraciłasia da 32. Pry hetym MVF pahoršyŭ ekanamičnyja prahnozy amal dla pałovy krain, jakija analizuje.

Takuju situacyju nazyvajuć K-padobnym rostam — pavodle formy litary K, u jakoj adna dyjahanalnaja rysa idzie ŭvierch, a druhaja ŭniz. Hetak ža razychodziacca ekanamičnyja trajektoryi roznych krain: adny raźvivajucca chutka, inšyja značna pavolniej. Pry hetym adstavańnie nie abaviazkova aznačaje ekanamičny spad — kraina moža praciahvać raści, ale nie tak chutka, jak inšyja.

Chto akazaŭsia ŭ vyjhryšy?

«U mnohich krainach, jakija adnosna mała paciarpieli ad nastupstvaŭ vajny i aktyŭna ŭdzielničajuć u technałahičnym uzdymie, ekanamičnaja aktyŭnaść zachoŭvajecca na raniejšym uzroŭni abo ŭzmacniajecca», — adznačyŭ MVF.

Bum štučnaha intelektu vyklikaŭ vializny popyt na mahutnyja kampjutary, čypy, sierviery i abstalavańnie dla data-centraŭ. Heta prynosić dadatkovyja dachody vytvorcam technałohij i padtrymlivaje rost krain, dzie raźmieščanyja adpaviednyja pradpryjemstvy.

Siarod tych, chto atrymlivaje najbolšuju vyhadu, MVF vyłučaje Tajvań, Paŭdniovuju Kareju i Indyju. Pieršyja dźvie ekanomiki zajmajuć važnaje miesca ŭ suśvietnaj vytvorčaści paŭpravadnikoŭ i elektroniki, a Indyja taksama karystajecca rostam popytu na technałahičnyja pasłuhi.

Pavialičyć

Indyja zastajecca adnoj z samych chutkarosłych bujnych ekanomik śvietu: sioleta MVF prahnazuje joj rost na 7%. Dla paraŭnańnia, ekanomika Kitaja, pavodle prahnozu, pavialičycca na 4,5%.

U ZŠA tempy rostu značna ściplejšyja, čym u Indyi, ale ŭsio ž adnosna vysokija dla raźvitoj ekanomiki. MVF čakaje, što amierykanski VUP pavialičycca na 2,3% jak u 2026-m, tak i ŭ 2027 hodzie. Pryčym prahnoz na nastupny hod byŭ pavyšany na 0,2 pracentnaha punkta. Adnym z faktaraŭ, jakija padtrymlivajuć amierykanskuju ekanomiku, stali maštabnyja inviestycyi ŭ štučny intelekt i źviazanuju ź im infrastrukturu.

Maštab technałahičnaha bumu dobra ilustrujuć inšyja ličby. Na ZŠA i Kitaj razam prypadała bolš za try čverci čystaha impartu vyličalnaha abstalavańnia dla štučnaha intelektu ŭ 2025 hodzie. Akramia taho, u hetych dźviuch krainach raźmieščana 57% novych data-centraŭ, pabudavanych u śviecie z 2024 hoda.

Chto adstaje?

U bolšaści bujnych krain Zachodniaj Jeŭropy ekanomika budzie raści značna pavolniej, čym u ZŠA i viadučych azijackich dziaržavach. Pavodle prahnozu MVF, VUP Jeŭrasajuza ŭ 2026 i 2027 hadach budzie pavialičvacca na 1,4% štohod.

Pavialičyć

Asabliva ścipłyja pierśpiektyvy ŭ Francyi, dzie sioleta čakajecca rost usiaho na 0,4%. U Hiermanii i Vialikabrytanii prahnazujuć pa 1,3%, u Aŭstryi — 0,6%.

U 2027 hodzie rost francuzskaj ekanomiki pavinien paskorycca da 0,7%, aŭstryjskaj — da 0,9%. A voś u Hiermanii jon, naadvarot, zapavolicca da 1,1%, u Vialikabrytanii — da 1,2%.

Pry hetym Jeŭropa nieadnarodnaja. Naprykład, u Polščy fond prahnazuje rost na 3,4% u 2026 hodzie, u Litvie — na 2,7%, a ŭ Łatvii — na 2,3%. Heta prykmietna vyšej za siarednija pakazčyki Jeŭrasajuza.

U asabliva składanym stanoviščy, pavodle MVF, apynulisia krainy, jakija mocna zaležać ad impartu enierharesursaŭ i pry hetym amal nie atrymlivajuć vyhadu ad raźvićcia štučnaha intelektu. Padaražeńnie nafty i hazu pavialičvaje ich vydatki, a technałahičny bum nie daje dastatkovaha dadatkovaha impulsu dla ekanomiki.

Takija krainy adnačasova sutykajucca z rostam koštu impartu, ciskam na nacyjanalnyja valuty i źnižeńniem realnych dachodaŭ nasielnictva. U dziaržaŭ zastajecca mienš mahčymaściaŭ padtrymlivać ekanomiku za košt biudžetu. Pavodle MVF, prahnozy ekanamičnaha rostu byli pahoršanyja, u pryvatnaści, dla šerahu krain Łacinskaj Amieryki i Blizkaha Uschodu.

Biełaruś i susiedzi

Biełarusi MVF taksama prahnazuje davoli ścipły ekanamičny rost. U 2026 hodzie biełaruski VUP, pavodle kastryčnickaha prahnozu, pavialičycca na 1,9%, a ŭ 2027‑m — tolki na 1,2%. Heta nižej za čakanyja tempy rostu suśvietnaj ekanomiki.

Pavialičyć

Jašče bolš ścipłyja pakazčyki ŭ Rasii: fond prahnazuje rost jaje ekanomiki tolki na 0,9% u 2026 i 2027 hadach.

Asobna vyłučajecca Ukraina. Na 2026 hod MVF prahnazuje joj rost VUP na 1%, ale ŭ 2027 hodzie čakaje paskareńnia da 3,5%, a ŭ 2028‑m — da 4,2%. Zrazumieła, što hetyja prahnozy asabliva mocna zaležać ad taho, jak budzie raźvivacca vajennaja situacyja.

U samoj Biełarusi istotnaha paskareńnia ŭ najbližejšyja hady fond nie čakaje. Na 2028 hod prahnazujecca rost VUP usiaho na 1,1%.

Što moža źmianić prahnoz?

Hałoŭnaj krynicaj niavyznačanaści dla suśvietnaj ekanomiki zastajecca vajna na Blizkim Uschodzie. Prahnoz MVF hruntujecca na dapuščeńni, što Armuzski praliŭ, praź jaki prachodzić značnaja častka suśvietnych pastavak nafty, znoŭ adkryjecca da sakavika 2027 hoda, a da kastryčnika situacyja ŭ rehijonie ŭ asnoŭnym vierniecca da davajennych umoŭ.

Nastupstvy vajny ŭžo adčuvajucca ŭ ekanomikach krain Piersidskaha zaliva. Bachrejn, Irak, Kuviejt i Katar sutyknulisia z surjoznymi pierabojami ŭ handli naftaj i hazam. MVF čakaje, što ŭ 2026 hodzie zdabyča enierharesursaŭ u hetych krainach skarocicca dvuchznačnymi tempami, ale ŭ nastupnym hodzie stračanyja abjomy ŭdasca adnavić.

U cełym ekanomika Blizkaha Uschodu i Centralnaj Azii, pavodle prahnozu fondu, sioleta skarocicca na 0,3%, zatoje ŭ 2027 hodzie vyraście na 6,3%.

Asabliva rezkija vahańni prahnazujucca ŭ Saudaŭskaj Aravii. Paśla rostu na 4,6% u 2025 hodzie jaje ekanomika sioleta, jak čakaje MVF, skarocicca na 3,3%, a ŭ 2027‑m vyraście na 7,9%.

Pry hetym prahnoz byŭ padrychtavany jašče da apošnich rakietnych udaraŭ pa terytoryi karaleŭstva, u tym liku pa aeraporcie Er-Ryjada. Tamu nastupstvy hetych napadaŭ u raźlikach fondu jašče nie ŭličanyja.

Jašče adzin faktar — dalejšaje raźvićcio štučnaha intelektu. Fond čakaje, što hłabalny technałahičny bum pastupova stanie mienš intensiŭnym. Pry hetym u prahnoz pakul nie zakładzieny dadatkovy rost pradukcyjnaści pracy, jaki moža prynieści bolš šyrokaje ŭkaranieńnie ŠI.

• 4
• 1
• 1
• 0
• 0
• 1
• 0
• 0