Na razhromlenym dziaržavaj pradpryjemstvie Łukašenka zajaviŭ, što hatovy ŭsialak dapamahać pryvatnamu biznesu
Zajavu Łukašenka zrabiŭ na Motaviełazavodzie, uładalnika jakoha ŭ 2017 hodzie prysudzili na 11 hadoŭ pazbaŭleńnia voli z kanfiskacyjaj aktyvaŭ za admovu pieradać u dar dziaržavie akcyi «Motavieła».
U Biełarusi nichto nie nastrojeny suprać pryvatnaj vytvorčaści, skazaŭ Alaksandr Łukašenka ŭ chodzie razmovy z supracoŭnikami pradpryjemstvaŭ u staličnym technaparku.
«Treba pašyrać vytvorčaść. I my hetym pryvatnikam budziem dapamahać. Usialak budziem dapamahać», — cytuje Łukašenku BiełTA.
Pavodle jaho słoŭ, u respublicy niama «jakich-niebudź nastrojaŭ, nakiravanych suprać pryvatnaj vytvorčaści, i nie źjavicca ŭ budučym». Adnak, dadaŭ jon, heta datyčycca pryvatnych pradpryjemstvaŭ, «jakija pracujuć, płaciać padatki i płaciać narmalny zarobak, pradajuć pradukcyju».
Svaju zajavu Łukašenka zrabiŭ u technaparku, u skład jakoha ŭvachodzić i Motaviełazavod.
Biełaruski pradprymalnik Alaksandr Muraŭjoŭ, jaki žyŭ i mieŭ chołdynh u Aŭstryi, doŭhi čas farmalna byŭ adnym z najbujniejšych aŭstryjskich inviestaraŭ u Biełarusi.
U 2015 hodzie ŭłady Biełarusi rezka spynili jahonuju pradprymalnickuju dziejnaść: paśla taho jak jon admoviŭsia pieradać u dar dziaržavie akcyi «Motavieła», što naležać ATEC Investment GmbH, KDB 1 červienia 2015 hoda źmiaściŭ jaho ŭ svaju turmu. Usiaho Muraŭjovu daviałosia pravieści tam bolš za try hady.
Akramia jak u padatkovych pravaparušeńniach, biznesoŭca abvinavačvali ŭ nievykanańni inviestycyjnych płanaŭ na «Motavieła». Muraŭjoŭ paličyŭ abvinavačvańni sfabrykavanymi. Tym nie mienš u 2017 hodzie jamu prysudzili ahułam 11 hadoŭ pazbaŭleńnia voli z kanfiskacyjaj aktyvaŭ. Prytym sud u Minsku nie tolki kanfiskavaŭ pryvatnyja aktyvy Muraŭjova, ale i eksprapryjavaŭ akcyi, što naležali nie jamu, a źviazanaj ź im aŭstryjskaj chołdynhavaj kampanii.
Ahułam Muraŭjoŭ i aŭstryjskaja chołdynhavaja kampanija, što za toj čas była likvidavanaja, stracili vielizarnyja sumy. Havorka idzie pra sumu ad 40 da 274 miljonaŭ jeŭra. Da aryštu jahonaja hrupa mieła hadavy abarot 200 miljonaŭ jeŭra.
U intervju APA Alaksandr Muraŭjoŭ raskazaŭ, što, akramia źbićcia ŭ SIZA KDB, jamu pahražali zabojstvam.
«Jany skazali mnie, što ja mahu ličyć, što mianie ŭžo niama ŭ žyvych i što maje dzieci navat nie znojduć majoj mahiły», — skazaŭ jon. Heta byŭ surjozny cisk, zajaviŭ pradprymalnik.
Jašče da vynikovaha prysudu ŭ 2017 hodzie Łukašenka publična zajaviŭ, što pahražaŭ Muraŭjovu turmoju, kali toj nie pojdzie na jahonyja ŭmovy.
Kamientary