Jaŭhien Bułka pierabraŭsia ŭ Polšču. I raskazaŭ, jak u Izraili jaho adpravili pracavać na abortach
U novym vypusku «ČastnOK-LIVE» Jaŭhien Bułka raskazaŭ, ci škaduje pra svoj vybar u 2020-m, jak pieražyvaje pastajannyja pierajezdy i jakim vyprabavańniem dla jaho stała praca ŭ izrailskaj klinicy.
Jaŭhien Bułka — biełaruski šoumien, televiadučy i akcior. Siarod inšaha jon byŭ viadučym ranišniaha šou na ANT i rezidentam biełaruskaha Comedy Club.
U 2020 hodzie Bułka padtrymaŭ pratesny ruch. Paśla hetaha trapiŭ u «čornyja śpisy» i faktyčna straciŭ mahčymaść pracavać pa prafiesii ŭ Biełarusi. U 2022 hodzie jon razam ź siamjoj pierajechaŭ u Izrail, paśla napadu CHAMAS na Izrail u kastryčniku 2023‑ha hoda — ŭ Abjadnanyja Arabskija Emiraty.
Ciapier Bułka ź siamjoj žyvie ŭ Polščy. U žniŭni 2026 hoda jon dałučyŭsia da kamandy NEXTA Plus.
U razmovie z Sašam Ivulinym pastajannyja pierajezdy, vojny i nieabchodnaść znoŭ prystasoŭvacca da novych abstavin jon nazyvaje «ŭzmocnienym žyćciom, žyćciom na maksimałkach».
«Byvajuć momanty, kali ty nie možaš ustać, nie chočaš ustavać, nie chočaš ničoha vyrašać. U režym, napeŭna, takoha samazachavańnia ŭpadaješ. Ale nienadoŭha. Tamu što prychodzić syn i kaža: «Tata, jeści». Zrazumieła, okiej, pajšli jeści», — dzielicca Jaŭhien asabistym.
Ci škaduje jon pra svoj vybar u 2020 hodzie
Padčas razmovy Saša Ivulin spytaŭ Jaŭhiena, ci pavioŭ by jon siabie inačaj u 2020 hodzie, kali b zahadzia viedaŭ, što jaho napieradzie čakaje.
«Maksimum ja zadavaŭ sabie hetaje pytańnie čatyry razy. I kožny raz całkam vyrazna ŭ mianie źjaŭlaŭsia tolki adzin adkaz: ja pastupiŭ pravilna. Ja nie razumieju i nie ŭjaŭlaju sabie, jak by ja moh žyć, pahadziŭšysia z tym, što adbyłosia ŭ 2020-m. Moža być, možna było b nie pahadzicca, ale pramaŭčać. Ale voś hety ŭmoŭny ład… Jon nie vyrašaje, jon nie dapamahaje, jon ničoha nie tłumačyć.
Heta ŭžo adbyłosia. Heta adbyłosia, i ja pra heta nie škaduju. Ja ni razu nie paškadavaŭ. A voś kali b ja pastupiŭ inakš, mahčyma b, ja paškadavaŭ. Napeŭna, mianie b zžerła znutry [sumleńnie]. (…)
Ščaście — heta kali ty možaš dazvolić sabie žyć biez kampramisaŭ, biez ździełak, biez sastupak. (…)
A kampramisy, jany nazapašvajucca i majuć ułaścivaść ciabie dahaniać. I rana ci pozna hruz hetych kampramisaŭ ciabie prosta źniščyć. Ja pastupiŭ pravilna. Dla siabie ja pastupiŭ pravilna. Majo sumleńnie čystaje».
«Ja z takoj kolkaściu kryvi nikoli nie mieŭ spravy»
Na pytańnie, jaki dzień u emihracyi byŭ dla jaho samym ciažkim, Bułka zhadvaje pačatak pracy ŭ centry płastyčnaj chirurhii ŭ Izraili.
«Tady mnie treba było šukać choć jakuju-niebudź pracu. Mnie ŭ pryncypie miedycyna była tak ci inakš cikavaja. I voś ja prychodžu i hladžu raskład, dzie ja budu navučacca pieršy čas. Centr płastyčnaj chirurhii. Nu što? Nu, vušy, nos, nu, hrudzi. Jany adpraŭlajuć na hiniekałohiju. Na aborty. A heta naohuł było nie ŭ majoj sistemie kaštoŭnaściaŭ. Naohuł!» — emacyjna raspaviadaje Jaŭhien.
U abaviazki sanitara ŭvachodziła prybirańnie miedycynskich adkidaŭ:
«Ja prychodžu. Mnie kažuć: «Voś hetyja viadziercy z kryvioju z usiaho, ź bijamasaj voś tudy i tudy nakiroŭvać. I ŭ mianie naohuł… Ja z takoj kolkaściu kryvi nikoli nie mieŭ spravy».
Ale fizičnaja reakcyja była tolki častkaj prablemy. Značna macniej, pavodle Bułki, na jaho paŭpłyvaŭ maralny kanflikt.
«U mianie vielmi žorstkaja była pazicyja. Nu, jana źmiakčyłasia. Ale heta mianie prosta vyniesła».
Situacyja, jak zhadvaje Jaŭhien, uskładniałasia ahulnym stanoviščam siamji paśla emihracyi. Hrošaj nie chapała, finansavyja prablemy ŭpłyvali na adnosiny doma. Admovicca ad pracy było niaprosta, ale i viarnucca tudy na nastupny dzień Bułka, pavodle jaho słoŭ, amal nie moh siabie prymusić.
«U mianie troški treślisia ruki, i ja pryjšoŭ [z pracy] dumaju: «Usio, ja, napeŭna, nie mahu». I ja nie viedaŭ, dzie znajści siły, kab prosta ŭstać i zaŭtra pajści znoŭ na pracu. U mianie jak byccam abrynuŭsia śviet.
Ty žyvieš, tabie kažuć «nielha zabivać», a tut ty svaimi rukami usio robiš — u maim tady ŭjaŭleńni. I ja dumaju: «Jak ža heta ŭsio adbyłosia, što ja rablu voś heta voś? Ja ž kazaŭ, što ja nikoli, ni ŭ jakim razie».
«I voś, napeŭna, takich momantaŭ było niekalki. Čamu ja lohka padniaŭsia ź Izraila i pajechaŭ u Emiraty? Cisk, ź jakim nie spraŭlaješsia i dumaješ, što praz ucioki heta vyrašycca. (…) Dla čałavieka naturalna šukać tam, dzie jamu lepš, ci, prynamsi, tam, dzie jon moža spraŭlacca, ci, prynamsi, tam, dzie jość varyjant. Voś pierajezd u Emiraty — heta, napeŭna, byŭ dla mianie varyjant», — tłumačyć Bułka.
Praŭda, jak jon paźniej pryznaŭsia ŭ razmovie, prajekt u Emiratach akazaŭsia nie takim vyhadnym, jak jamu pieršapačatkova abiacali.
Jak davodzić Jaŭhien, pra pośpiech raskazvajuć časta, a ab pravałach — značna radziej. Chacia mienavita takija historyi, na jaho dumku, mohuć być najbolš karysnymi.
«Samaje dobraje va ŭsich drennych historyjach — heta toje, što ty možaš pra ich raskazać. Tamu što, kali nie možaš raskazać, značyć, historyja skončyłasia drenna», — razvažaje jon.
«Uklučeńnie ŭ sumna viadomyja śpisy nakłała zabaronu na prafiesiju». Šoŭmien Jaŭhien Bułka źjechaŭ u Izrail i raskazvaje pra svaju emihracyju
U šoŭmiena Jaŭhiena Bułki naradziŭsia druhi syn. Nie abyšłosia biez pryhod
Jaŭhiena Bułku abvinavačvajuć u machlarstvie ŭ Dubai na $1 miljon. A jon kaža, što sam paciarpieły
Kamientary
Pryvitańnie ad adnkiašnika )