Zialenski patłumačyŭ, čamu ŭ svoj čas zabaraniŭ pieramaŭlacca z Pucinym
Prezident Ukrainy Uładzimir Zialenski zajaviŭ, što dziakujučy pryniaćciu pastanovy Rady nacyjanalnaj biaśpieki i abarony ŭ kastryčniku 2022 hoda na niepasrednyja pieramovy z Rasijaj jon spyniŭ sieparatyzm u dziaržavie i «cieniavyja» pieramoŭnyja pracesy. Pra heta jon skazaŭ padčas supolnaha bryfinhu z prezidentkaj Małdovy Majaj Sandu.
Zialenski patłumačyŭ, što tady jon padpisaŭ ukaz ab zabaronie pieramoŭ z Uładzimiram Pucinym, bo toj pabudavaŭ «vialikuju kolkaść roznych kanałaŭ» razam ź sieparatystami i pradstaŭnikami inšych krain dla ŭpłyvu na Ukrainu i palityčnaje kiraŭnictva.
«Było šmat pieramoŭnych pracesaŭ, šmat cieniavych pieramoŭnych kalidoraŭ. Ja heta chutka spyniŭ. Prosta spyniŭ sieparatyzm u našaj dziaržavie. Ja zabaraniŭ lubomu, lubym palityčnym dziejačam va Ukrainie pravodzić tyja ci inšyja pieramovy z rasijskim bokam, z prychilnikami Pucina na praciahu vajny. Heta było, kali ich vojski byli tut, u Kijeŭskim rehijonie», — zajaviŭ Zialenski.
Pavodle jaho słoŭ, tady Pucin sprabavaŭ paŭpłyvać na Ukrainu praź niekatorych narodnych deputataŭ, dziaržaŭnyja instytuty i jeŭrapiejskich palitykaŭ. Tamu jon pryniaŭ «absalutna spraviadlivuju pastanovu», bo mienavita jon sam źjaŭlajecca lidaram tych ci inšych pieramoŭ jak prezident Ukrainy.
«Usim astatnim ja heta zabaraniŭ. Pucinu heta, viadoma nie padabałasia, tamu što kanałaŭ u jaho było šmat. Jość kanały, pra jakija ŭsie viedajuć, tamu što adpaviednyja ludzi byli aryštavanyja, a potym my ich abmianiali na našych vajskoŭcaŭ, a taksama jany vykarystoŭvali inšyja kanały, navat u niekatorych našych instytucyjach, pra što ja pakul nie hatovy publična kazać», — dadaŭ Zialenski.
30 vieraśnia 2022 hoda na pasiadžeńni Staŭki viarchoŭnaha hałoŭnakamandujučaha Rada nacyjanalnaj biaśpieki i abarony Ukrainy vyrašała zafiksavać «niemahčymaść praviadzieńnia pieramoŭ z prezidentam Rasijskaj Fiederacyi Uładzimiram Pucinym». 4 kastryčnika Uładzimir Zialenski ŭvioŭ hetaje rašeńnie ŭ dziejańnie.
Ciapier čytajuć
Staŭ viadomy dakładny adras, pa jakim žyvie Anžalika Mielnikava ŭ Minsku44
Kamientary