«Sychodźcie na tranzit». Łatuška źviarnuŭsia da Łukašenki, Ryžankova i Piatkievič

U novym vypusku TOK u byłoha pasła i ministra kultury, a ciapier adnaho ź lidaraŭ apazicyi Paŭła Łatuški spytali, što b jon chacieŭ skazać Łukašenku.

«Ja dumaju, što Łukašenka pastaviŭ sabie žyćciovaj metaj uvieści takoje paniaćcie jak «łukašyzm». Ale łukašyzm, tak jak i fašyzm, nacyzm, stalinizm, sydzie ŭ niabyt.

Tamu, Alaksandr Ryhoravič, vy pavinny dakładna razumieć, što heta nie atrymajecca realizavać. Łukašyzmu nie budzie ŭ Biełarusi. Jak tolki vy sydziecie ŭ inšy śviet ci budziecie zrynuty sa svajoj pasady, heta ŭsio spynicca, sydzie ŭ niabyt i jakraz taki budzie pradmietam vielmi žorstkaj krytyki ŭ historyi.

Tamu siońnia, kali vy sapraŭdy ličycie, što dla vas Biełaruś ujaŭlaje kaštoŭnaść, važnaja dziaržaŭnaść našaj krainy, jość tolki adzin sposab — sychodźcie na tranzit.

Tak, my b, zrazumieła, maryli ŭsie, kab vy syšli, źnikli z našaj krainy, spynili svaju prysutnaść u Biełarusi, ale jak pieršy krok — sydzicie na tranzit.

Nastupny krok: treba zrabić usio — ja razumieju, što zrabić heta ciapier demanstratyŭna budzie składana, — kab minimizavać rasijskuju prysutnaść u Biełarusi, hienierałaŭ, jakija pobač z vami. Pahladzicie, chto ź ich sapraŭdy addanyja vam. Mahčyma, jany addanyja, ale pieradusim addanyja Rasii i Pucinu», — vykazaŭsia Pavieł Łatuška.

Pavialičyć

Palityk taksama źviarnuŭsia da Ryžankova, Piatkievič i inšych ludziej z atačeńnia dyktatara:

«Dumajcie, pierad tym, jak padpisvać siońnia niejkija rašeńni. Dumajcie pierad tym, jak uzhadniać niejkija rašeńni. U budučym vam daviadziecca adkazvać za ich. Ja nie kažu pra kryminalnuju adkaznaść. Ja kažu pra maralnuju adkaznaść. Ja dumaju, što ŭ vas dastatkova intelektu, zdolnaściej dla taho, kab razumieć toje, što vy robicie ciapier.

Vy cudoŭna razumiejecie, što Łukašenki zaŭtra nie budzie. Užo siońnia treba zrabić usio dla taho, kab jak tolki jaho nie było ŭ našaj krainie, kab my zmahli zachavać Biełaruś, kab biełarus ź biełarusam zmahli damovicca.

Pchajcie Łukašenku na tranzit, upeŭnivajcie (…) Łukašenku, što jamu treba syści na tranzit i stvaryć mahčymaści, kab pasprabavać zbałansavać źniešniuju palityku krainy. A heta značyć i asnovu, fundamient, na jakim staić Biełaruś.

Tamu što biełaruskaje hramadstva ŭ absalutna bolšaści za toje, kab žyć u niezaležnaj krainie. Pieraškodaj hetamu źjaŭlajecca Łukašenka i jaho sistema, stvoranaja ŭnutry krainy».

• 32
• 0
• 4
• 6
• 0
• 0
• 1
• 0