Hety mikrarajon Minska ciapier nie paznać — zabudavali vysotkami
U minskim mikrarajonie Ściapianka zaraz uzvodziać vialiki kvartał panelnych šmatpaviarchovikaŭ. Buduje žyllo MAPID.
Siońnia Ściapianku, były zakryty haradok, nie paznać, piša Realt. Pobač ź viadomymi słavutaściami mikrarajona (vodanapornaj viežaj i pomnikam samalotu) budaŭniki adnačasova ŭzvodziać adrazu niekalki damoŭ. Za ŭčastak u miežach vulic Karvata, Hieałahičnaj, Vysokaj i Suviazistaŭ haradskija ŭłady surjozna ŭzialisia niekalki hadoŭ tamu — terytoryju vyzvalili ad starych anharaŭ dla vajskovaj techniki i stali rychtavać da zabudovy.
Usiaho ŭ hetym kvartale ŭźviaduć 8 panelnych šmatpaviarchovikaŭ — 6 damoŭ pa 19 pavierchaŭ i 2 damy pa 10 pavierchaŭ. Taksama tut buduć pabudavanyja try šmatuzroŭnievyja stajanki. Zakazčykam budaŭnictva vystupaje UKB Zavodskaha rajona.
Zaraz tut całkam hatovyja dva pieršyja damy — na fasadach źziaje śviežaja farba, na dziciačaj placoŭcy ciešyć voka jarkaje abstalavańnie, a samim hmacham užo prysvojenyja adrasy.
Terytoryja vakoł damoŭ taksama dobraŭparadkavana. Tut vykładzienaja tratuarnaja plitka, vysadžany dekaratyŭnyja kusty, naniesienaja darožnaja raźmietka, ustalavany zaradnyja stancyi dla elektramabilaŭ i viełaboksy.
Pobač z novabudoŭlami faktyčna sabranyja jašče dva panelnyja słupki. Zdajecca, tut zastałosia tolki zašklić łodžyi i pafarbavać fasady.
Žyllo ŭ Ściapiancy pryznačana dla majučych patrebu ŭ palapšeńni žyllovych umoŭ — u tym liku dla šmatdzietnych siemjaŭ, a taksama dla vajskoŭcaŭ, supracoŭnikaŭ Minabarony i pradstaŭnikoŭ dziaržaŭnych ŚMI. Kvadratny mietr u panelnych damach ličyli pa 620-645 dalaraŭ. Takim čynam, adnapakajovaja kvatera abyšłasia dolščykam u sumu kala 27-28 tysiač dalaraŭ, dvuchpakajovaja — kala 32-38 tysiač dalaraŭ, trochpakajovaja — kala 50 tysiač dalaraŭ.
Žyllo ŭ damach zdajecca z poŭnym azdableńniem: u kvaterach klejać špalery, farbujuć stoli, kładuć łaminat i plitku. Kuchni abstalujuć elektryčnymi plitami. Cikava, što niekatoruju kolkaść kvater u Ściapiancy zrobiać arendnymi.
Što tyčycca cen na kvatery ŭ Ściapiancy na druhasnym rynku, to žyllo ŭ śviežych novabudoŭlach u prodažy pakul jašče nie źjaviłasia. Ale dla prykładu možna razhledzieć kvateru ŭ anałahičnym panelnym słupku, raźmieščanym nasuprać novaha kvartała. Tut niekalki hadoŭ tamu kamiercyjny zabudoŭščyk uźvioŭ žyły kompleks «Ściapianka», jaki składajecca ź piaci damoŭ. Ciapier u ŽK pradajecca ŭsiaho adna kvatera.
Heta dvuška biez azdableńnia. Płošča žylla na čaćviortym paviersie składaje 60 kvadratnych mietraŭ. U kvatery zroblenyja ściažka padłohi, razvodka elektryki, jość vyklučalniki i razietki, ustanoŭleny prybory ŭliku vady i elektraenierhii. Košt — 88,9 tysiačy dalaraŭ (1467 dalaraŭ — za mietr).
Ciapier čytajuć
«Hubazikaŭcy schilajuć Kaleśnikavu da vysyłki, ale jana nie choča»1
Kamientary
Małajcy, tavaryščy kamunisty!
Nie razumiejetie vy riealii našieho mira.