Alaksandr Łukašenka 17 lutaha padpisaŭ zakon «Ab źmianieńni kodeksaŭ pa pytańniach kryminalnaj adkaznaści», jakim unosiacca kompleksnyja źmieny ŭ kryminalnaje i kryminalna-pracesualnaje zakanadaŭstva, paviedamlaje pres-słužba palityka.
Pra budučyja źmieny my pisali ŭ žniŭni 2024 hoda: Łukašenka prapanavaŭ źmiakčyć šerah kryminalnych artykułaŭ. Ale «palityčnych» heta nie budzie tyčycca
U adpaviednaści z dakumientam pierahledžanyja sankcyi ŭ dačynieńni da 97 składaŭ złačynstvaŭ. Ź ich 65 dapoŭnienyja alternatyŭnymi bolš miakkimi vidami pakarańniaŭ (24 składy złačynstva da ciapierašniaha času ŭtrymlivali pazbaŭleńnie voli jak adzina mahčymaje pakarańnie). Jašče 32 składy źmienienyja ŭ častcy pamieru pakarańniaŭ.
Vyznačajecca, što žančynam, jakija ŭčynili niaciažkija złačynstvy ŭpieršyniu, i adzinokim mužčynam, jakija vychoŭvajuć dziaciej va ŭzroście da 14 hadoŭ, a taksama niepaŭnaletnim i invalidam I hrupy pazbaŭleńnie voli nie pryznačajecca. Heta, adnak, nie tyčycca artykułaŭ, źviazanych z hvałtoŭnymi dziejańniami, a taksama artykułaŭ «za palityku».
Kryminalnyja spravy ab parušeńni pravił darožnaha ruchu, što paciahnuła pryčynieńnie škody blizkim svajakam ci členam siamji vinavataha ŭ DTZ, buduć zavodzicca tolki pa zajavie paciarpiełych. Taki padychod zaklikany spryjać unutrysiamiejnamu ŭrehulavańniu kanfliktaŭ.
Zakonam praduhledžana taksama ŭzmacnieńnie supraćdziejańnia kibierzłačynnaści. Tak, mahčymaje nakładańnie aryštu na hrašovyja srodki, jakija źjaŭlajucca pradmietam złačynstva. Heta, jak ličycca, dazvolić apieratyŭna błakavać vykradzienyja sumy na rachunkach i zabiaśpiečvać ich viartańnie paciarpiełym.
Zamacoŭvajecca taksama miechanizm błakavańnia numaroŭ mabilnych telefonaŭ, fišynhavych sajtaŭ, inšych internet-resursaŭ, jakija vykarystoŭvajucca złamyśnikami ŭ złačynnych schiemach.
Farmalna pavialičvajecca i abarona pravoŭ niepaŭnaletnich udzielnikaŭ kryminalnaha pracesu. Ciapier udzieł piedahoha i psichołaha budzie abaviazkovy jak pry dopycie padletkaŭ, tak i praviadzieńni ź ich udziełam vočnaj staŭki i pravierki pakazańniaŭ na miescy.
Akramia taho, «zakonam praduhledžanyja miery, jakija dazvalajuć sudam bolš hnutka padychodzić da pryznačeńnia pakarańnia za złačynstvy, źviazanyja ź niezakonnym abarotam narkotykaŭ».
Ciapier čytajuć
Pra što maŭčyć Alaksiej Franckievič, jakomu Polšča zakryła ŭjezd na 10 hadoŭ42
Kamientary