Łukašenka prapanavaŭ źmiakčyć šerah kryminalnych artykułaŭ. Ale «palityčnych» heta nie budzie tyčycca
Alaksandr Łukašenka ŭnios u parłamient zakonaprajekt «Ab źmianieńni kodeksaŭ pa pytańniach kryminalnaj adkaznaści», jakim praduhledžvajecca źmianšeńnie pakarańnia pa niekatorych artykułach, paviedamlaje jaho pres-słužba.
Raspracoŭkaj zakonaprajekta zajmałasia śpiecyjalna stvoranaja pry Administracyi rabočaja hrupa, jakaja praviała sistemny analiz normaŭ kryminalnaha i Kryminalna-pracesualnaha zakonaŭ, na asnovie daručeńniaŭ, dadzienych Łukašenkam 11 studzienia. U vyniku vypracavanyja i realizavanyja ŭ ramkach zakonaprajekta nastupnyja padychody.
Pierahledžany sankcyi 97 składaŭ złačynstvaŭ. Ź ich 65 dapoŭnieny alternatyŭnymi bolš miakkimi vidami pakarańniaŭ (24 składy złačynstvaŭ siońnia ŭtrymlivajuć pazbaŭleńnie voli jak adzina mahčymaje pakarańnie). Jašče ŭ 32 uniesieny karekciroŭki, u tym liku dla likvidacyi dysbałansu ŭ sankcyjach.
Paviedamlajecca, što ŭzmacniajecca humanistyčny składnik kryminalnaha zakona. Vyznačajecca, što tyja, chto ŭpieršyniu ŭčyniŭ niaciažkija złačynstvy: žančyny i adzinokija mužčyny, jakija vychoŭvajuć dziaciej va ŭzroście da 14 hadoŭ, a taksama niepaŭnaletnija i invalidy I hrupy — im pazbaŭleńnie voli nie pryznačajecca.
Vyklučeńnie buduć składać vypadki, kali asoba ździejśniła złačynstva ekstremisckaj skiravanaści abo źviazanaje z užyvańniem hvałtu.
Anałahičnyja praviły praduhledžany ŭ častcy zaklučeńnia pad vartu.
Pieravodziacca ŭ spravy pryvatna-publičnaha abvinavačvańnia (kali zavodzicca sprava pa zajavie paciarpiełaha) złačynstvy ab parušeńni praviłaŭ darožnaha ruchu, što paciahnuła pryčynieńnie škody blizkim svajakam abo členam siamji vinavataj asoby (č.2 art. 317 KK). Hetaja miera zaklikanaja spryjać unutrysiamiejnamu ŭrehulavańniu kanfliktu.
Zakonaprajektam skarektavanyja taksama normy ab adkaznaści za narkazłačynstvy.
Praduhledžvajucca alternatyŭnyja bolš miakkija pakarańni ŭ vyhladzie aryštu na termin da troch miesiacaŭ za nabyćcio abo zachoŭvańnie narkotykaŭ (č.1 art. 328 KK); abmiežavańni svabody za razavyja vypadki ich zbytu (č. 2 art. 328 KK).
Adnačasova źmianšajecca nižni pamier pakarańnia za zbyt narkotykaŭ u składzie arhanizavanaj hrupy z 10 da 8 hadoŭ pazbaŭleńnia voli (č.4 art. 328).
Zaznačajecca, što adpaviednyja miery dazvolać sudam bolš hnutka padychodzić da pytańniaŭ pryznačeńnia pakarańnia z ulikam hramadskaj niebiaśpieki złačynstva i asoby vinavataha.
Dalejšaja praca nad zakonaprajektam budzie ažyćciaŭlacca na placoŭcy parłamienta.
Sotni rubloŭ, kab efiektna daviedacca poł budučaha dziciaci: biełarusy robiać usio bolš maštabnyja hiendar-paci3
Kamientary