NASA skarystałasia Marsam jak tramplinam, kab razahnać zond u bok Jupitera
Hravitacyjny manieŭr dazvoliŭ značna skaracić čas palotu da spadarožnika Jupitera Jeŭropy, u toŭščy akijanaŭ jakoha patencyjna moža być žyćcio.
Zond NASA Europa Clipper, zapuščany ŭ kastryčniku 2024 hoda, paśpiachova vykanaŭ hravitacyjny manieŭr pablizu Marsa, prajšoŭšy na adlehłaści 884 kiłamietry ad jaho pavierchni. Pra heta paviedamlaje vydańnie ixbt.com.
Takaja blizkaja sustreča z Marsam dapamahła aparatu razahnacca na šlachu da Jupitera i jaho spadarožnika Jeŭropy. Sučasnyja rakietnyja ruchaviki nie dazvalajuć dasiahnuć nieabchodnaj chutkaści dla takoha dalokaha padarožža biez vykarystańnia hravitacyjnaha paskareńnia płaniet.
Dla dakładnaha prachodžańnia mima Marsa spatrebilisia try karekcyi trajektoryi, jakija kamanda misii vykanała paśpiachova.
1 sakavika Europa Clipper pralacieŭ pobač z Marsam z chutkaściu 24,5 km/s, zapavoliŭšysia da 22,5 km/s za košt hravitacyjnaha ŭzajemadziejańnia. Heta dazvoliła skarektavać trajektoryju aparata i padrychtavacca da nastupnaha hravitacyjnaha manieŭru ŭ 2026 hodzie — kala Ziamli.
Hravitacyjnyja manieŭry značna skaračajuć čas i košt palotu da Jupitera. Bieź ich padarožža zaniało b značna bolš času. Zbližeńnie z Marsam taksama dazvoliła pratestavać usie sistemy zonda, uklučajučy mahutny radar i ciepłavizar, što ŭ budučyni dazvolić atrymać kaštoŭnyja navukovyja dadzienyja pra Mars.
Europa Clipper dasiahnie Jupitera ŭ krasaviku 2030 hoda, a jaho misija praciahniecca jak minimum da 2034 hoda.
Meta jaho misii — vyvučyć, ci pryhodny dla žyćcia spadarožnik Jupitera Jeŭropa. I, kali treba, sabrać dastatkova dadzienych dla vybaru miesca dla vysadki tudy spuskanaha aparata — kaśmičnaha karabla, jaki vykarystoŭvajuć dla pieravozki hruzaŭ, navukovych ekśpierymientaŭ ci kasmanaŭtaŭ.
Dla hetaha Europa Clipper budzie daśledavać ledzianuju abałonku i akijan, kab paćvierdzić isnavańnie padlodnaha akijana i jaho suviaź z pavierchniaj, praanalizuje chimičny skład i strukturu asnoŭnych złučeńniaŭ, a taksama vyvučyć hieałohiju, uklučajučy rehijony aktyŭnaści. Udaskanalić daśledavańnie Europa Clipper płanujuć z dapamohaj kaśmičnaha teleskopa James Webb.
Ciapier čytajuć
«Abmiarkoŭvajem pytańnie ab vyzvaleńni jašče 1300 źniavolenych». Tramp raskazaŭ, pra što havaryŭ z Łukašenkam27
Kamientary