«Daliboh, jana adzinaja, inšych niama». Chto takaja Łacifa aš-Šaraa — pieršaja łedzi Siryi?

Viadomy rod i stupień mahistra

Aficyjnaj bijahrafii Łacify ad-Darubi (časta jaje proźvišča pišuć ad-Drubi) niama. Adnak paśla jaje pieršych źjaŭleńniaŭ na publicy arabskija ŚMI paviedamili niekatoryja padrabiaznaści pra jaje siamju i žyćcio.

Naprykład, saudaŭskaja hazieta Okaz piša, što Łacifa Samir ad-Drubi rodam z horada El-Karjatajn u pravincyi Choms i što ŭ jaje troje synoŭ ad aš-Šaraa.

Sa spasyłkaj na «nieaficyjnyja krynicy» vydańnie taksama paviedamiła, što jana maje stupień mahistra arabskaj movy i litaratury.

U hetuju ž siamju, što i Łacifa ad-Drubi, uvachodziać viadomyja relihijnyja dziejačy, takija, jak šejch Abduł Hafar ad-Drubi, siryjski čytalnik Karana (pamior u 2009 hodzie).

Al-Monitor, adno z samych viadomych amierykanskich ŚMI, jakoje śpiecyjalizujecca na analizie padziej na Blizkim Uschodzie, adznačaje, što «karani siamji ad-Drubi ŭ Siryi siahajuć epochi Asmanskaj impieryi, kali adzin ź jaje prodkaŭ, Ałaa ad-Drubi, słužyŭ pasłom Asmanskaj impieryi i staŭ druhim premjer-ministram Siryi ŭ 1920 hodzie, ale byŭ zabity ŭsiaho praz 26 dzion paśla ŭvachodu na pasadu».

Paśla vajennaha pieravarotu 1970 hoda ałavity adcisnuli z palityčnaj sceny sunickija arystakratyčnyja siemji, što kiravali Siryjaj na praciahu stahodździaŭ. Ciapier hetyja siemji znoŭ u hulni, piša italjanskaja La Repubblica sa spasyłkaj na daśledčyka Sedryka Łabrusa.

Jon taksama paviedamiŭ vydańniu (praŭda, nie ŭdakładniŭšy, adkul u jaho hetyja źviestki), što Łacifa paznajomiłasia z aš-Šaraa ŭ Damasku ŭ hady navučańnia va ŭniviersitecie.

U 2013 hodzie jana, chutčej za ŭsio, vyjšła za jaho zamuž, kali jon užo byŭ lidaram «Džebchat an-Nusry», i padčas hramadzianskaj vajny žyła ź im razam u padpolli.

«Cikava, — adznačaje Łabrus, — što Asad taksama žanaty z žančynaj, jakaja pachodziła z arystakratyčnaha rodu Chomsa, i na toje jość histaryčnaja pryčyna: hety horad — kałyska sunickaha isłamu».

U svaim Twitter Łabrus taksama źviartaje ŭvahu na toje, što takaja žonka «źjaŭlajecca vydatnym palityčnym, relihijnym i sacyjalnym aktyvam»:

«Jana prynosić z saboj reśpiektabielnaść pryznanaj i ŭpłyvovaj siamji».

Tym nie mienš, dadaje jon, aš-Šaraa taksama pachodzić z pavažanaha ŭ Siryi rodu.

«Takim čynam, siryjskuju prezidenckuju paru pa-raniejšamu składajuć dva spadkajemcy dobrych siemjaŭ», — reziumavaŭ daśledčyk.

Adzinaja žonka

Jašče adna važnaja detal bijahrafii Łacify aš-Šaraa stała viadomaja padčas sustrečy jaje muža z delehacyjaj siryjska-amierykanskich žančyn u Damasku ŭ kancy studzienia.

U hetaj sustrečy, pavodle siryjskich miedyja, byli całkam prykładnyja zadačy: novaja siryjskaja administracyja sprabuje ŭmacoŭvać suviazi z členami siryjskich dyjaspar za miažoj i adnačasova stvarać vobraz bolš adkrytaj ułady.

Za apošnija dva miesiacy aš-Šaraa razdaŭ dziasiatki intervju suśvietnym ŚMI, u jakich šmat kazaŭ pra admovu ad svajho džychadzisckaha minułaha, sprabavaŭ raźviejać aściarohi nakont mahčymych abmiežavańniaŭ pravoŭ žančyn u krainie i abiacaŭ nie pryhniatać ałavitaŭ (relihijna-etničnaja hrupa, da jakoj naležyć siamja byłoha lidara Siryi Bašara Asada).

Nie vyklučana, što pa hetych ža pryčynach padčas sustrečy z delehacyjaj siryjska-amierykanskich žančyn časovy prezident Siryi niečakana vyrašyŭ pradstavić haściam svaju žonku.

«Daliboh, jana adzinaja, i niama inšych. Toje, što vy čujecie ŭ sacyjalnych sietkach, — heta prosta čutki», — ź jaŭnaj ironijaj skazaŭ aš-Šaraa.

Siryjska-amierykanski doktar Rym al-Bazm, jakaja prysutničała na sustrečy, zajaviła livanskaj haziecie An-Nahar, što žonka časovaha prezidenta Siryi «padobnaja da žančyn Damaska»: «Miłaja, spakojnaja, pryhožaja, biez čadry, upeŭnienaja ŭ sabie i adukavanaja».

Doktar Abdułchafiz Šaraf, člen Siryjska-amierykanskaha aljansu za mir i praćvitańnie, jaki taksama prysutničaŭ na sustrečy, apisaŭ Łacifu aš-Šaraa jak «reśpiektabielnuju maładuju žančynu, jakaja nosić chidžab (hałaŭny ŭbor), ale nie nikab (velum) i apranajecca ŭ tradycyjnym siryjskim styli».

Ci brała Łacifa paśla svajho pradstaŭleńnia ŭdzieł u razmovie, zrazumieć składana — na aficyjnaj fatahrafii časovaha prezidenta Siryi z členami delehacyi jaje niama.

Chto budzie pieršaj łedzi?

Praz usiaho paru dzion paśla toj sustrečy žurnalisty Economist spytali ŭ časovaha prezidenta Siryi, ci budzie jaho žonka pieršaj łedzi krainy.

«Heta tradycyja — žonka prezidenta aŭtamatyčna zajmaje hetuju pasadu. Tak što, viadoma, kali jość pasada pad nazvaj «Pieršaja łedzi», jana nie budzie zaniata vypadkovaj žančynaj z vulicy», — adkazaŭ aš-Šaraa.

I tut ža dadaŭ: «Adnak naša razumieńnie pieršaj łedzi zaklučajecca ŭ tym, što jana — słužycielka hramadstva, a nie łedzi ŭzroŭniem vyšej za ludziej».

Heta vidavočnaja adsyłka da žonki zrynutaha šmathadovaha kiraŭnika Siryi — Asmy Asad.

Publičny vobraz novaj pieršaj łedzi Siryi pakul zastajecca zahadkaj.

«Pakul składana skazać, jakim budzie publičny vobraz pieršaj łedzi Siryi. Ale vidavočna, što jaje buduć prasoŭvać, buduć pakazvać hramadstvu, bo Achmied aš-Šaraa choča prademanstravać siabie jak adkrytaha kiraŭnika, nie zašoranaha isłamista», — ličyć uschodnaznaŭca Maryjana Bieleńkaja.

«Aš-Šaraa demanstruje svaju žonku prosta tamu, što zaraz hetaha patrabujuć abstaviny. Ale tak budzie nie zaŭsiody: ciapier heta nieabchodna dla źniaćcia sankcyj ź Siryi, vyklučeńnia CHTŠ ź śpisu terarystaŭ, — nie zhadžajecca ŭ razmovie ź Bi-bi-si uschodaznaŭca i aŭtar telehram-kanała «Sulejmanaŭ» Rusłan Sulejmanaŭ. — Kali novyja ŭłady Siryi buduć pryznanyja mižnarodnaj supolnaściu, aš-Šaraa naŭrad ci budzie mieć patrebu ŭ tym, kab demanstravać žonku».

Jon nahadvaje, što ŭ časy, kali «Chajiat Tachryr aš-Šam» (CHTŠ) kantralavała pravincyju Idlib, aš-Šaraa nie pakazvaŭ svaju žonku.

Pa słovach ekśpierta, u hrupoŭki CHTŠ i ŭ inšych, što prytrymlivajucca radykalnaha isłamizmu, nie pryniata demanstravać svaich žonak i naohuł siemji.

Razam z tym abodva ekśpierty sychodziacca ŭ mierkavańni, što Asma Asad daloka nie adziny prykład upłyvovaj žančyny i/ci pieršaj łedzi ŭ krainach arabskaha śvietu.

Maryjana Bieleńkaja pryhadvaje žonku byłoha emira Katara, maci ciapierašniaha emira — šejcha Mozu, jakaja «vučyłasia na Zachadzie, šmat zrabiła dla raźvićcia Katara i nadańnia jamu sučasnaha abličča», a taksama siastru pieršaha karala Saudaŭskaj Aravii Nuru Al Saud, jakaja była jaho niefarmalnym daradcam.

Sulejmanaŭ tłumačyć, što ŭzrovień upłyvovaści pieršych łedzi ŭ arabskich krainach zaležyć ad uzroŭniu śvieckaści dziaržaŭ i ŭpłyvu viestiernizacyi na ich.

U jakaści prykładu jon pryvodzić žonku prezidenta Jehipta Entysar as-Sisi i karalevu Iardanii Raniju al-Abduła.

Abiedźvie, pa słovach Sulejmanava, publičnyja asoby, viaduć aktyŭnuju hramadska-značnuju dziejnaść, dajuć intervju.

Naprykład, Raniju asabliva zaŭvažyli ŭ arabskim śviecie paśla eskałacyi ŭ Hazie, tamu što jana pačała vystupać u abaronu paleścincaŭ, dadaje ekśpiert.

• 3
• 1
• 0
• 1
• 0
• 0
• 0
• 0