Biełaruś bolš nie ŭvachodzić u lik najbujniejšych eksparcioraŭ zbroi
Pavodle novaj štohadovaj spravazdačy Stakholmskaha mižnarodnaha instytuta daśledavańnia prablem miru (SIPRI), Biełaruś vybyła sa śpisu 25 najbujniejšych suśvietnych eksparcioraŭ uzbrajeńnia, piša Reform.news.
Kali ŭ minułym hodzie SIPRI aceńvaŭ dolu Biełarusi ŭ suśvietnym eksparcie zbroi na ŭzroŭni 0,2% (pavodle danych za 2019—2023 hady), to sioleta, pavodle spravazdačy za 2020—2024 hady, kraina ŭ hetym rejtynhu bolš nie fihuruje. Pry hetym Biełaruś zhadvajecca tolki adzin raz — u kantekście pastavak z Rasii.
Zhodna z danymi instytuta, 74% rasijskaha ekspartu zbroi ŭ 2020—2024 hadach nakiroŭvałasia ŭ krainy Azii i Akijanii, 12% — u Afryku, 7,4% — u Jeŭropu (u tym liku ŭ Biełaruś, Armieniju i Sierbiju), 6,4% — na Blizki Uschod. Asnoŭnymi imparciorami rasijskaj zbroi za hety pieryjad stali Indyja (38%), Kitaj (17%) i Kazachstan (11%).
U hety ž čas, adznačaje vydańnie, Biełaruś atrymała značnuju kolkaść rasijskaha ŭzbrajeńnia. Paviedamlałasia, što na terytoryi krainy źjavilisia zienitna-rakietnyja kompleksy S-400, apieratyŭna-taktyčnyja rakietnyja kompleksy «Iskander», viertaloty Mi-35, źniščalniki Su-30 i inšaja technika.
Siarod najbujniejšych suśvietnych eksparcioraŭ zbroi za 2020—2024 hady SIPRI nazyvaje ZŠA (43% suśvietnaha rynku), Francyju (9,6%) i Rasiju (7,8%). Hałoŭnymi imparciorami za hety ž pieryjad stali Ukraina (8,8%), Indyja (8,3%) i Katar (6,8%).
U spravazdačy adznačajecca, što abjomy pastavak zbroi ŭ śviecie ŭ 2020—2024 hadach zastalisia prykładna na tym ža samym uzroŭni, što i ŭ 2015—2019 i 2010—2014 hadach. Rost impartu ŭ Jeŭropie i Amierycy byŭ kampiensavany źnižeńniem u inšych rehijonach, ale ahulny abjom ekspartu na 18% pieravysiŭ pakazčyki 2005—2009 hadoŭ.
Asobna padkreślivajecca, što paśla pačatku poŭnamaštabnaha ŭvarvańnia Rasii va Ukrainu ŭ 2022 hodzie jak minimum 35 dziaržaŭ pastaŭlali ŭzbrajeńnie ŭkrainskamu boku. Najbujniejšymi pastaŭščykami zbroi dla Ukrainy stali ZŠA (45% pastavak), Hiermanija (12%) i Polšča (11%).
Taksama adznačajecca, što dola ZŠA ŭ pastaŭkach zbroi jeŭrapiejskim krainam NATA raście, jak i ahulny abjom zakupak uzbrajeńniaŭ u hetym rehijonie.
Na fonie hetych tendencyj ekspart zbroi z Rasii za pieryjad z 2015—2019 hadoŭ da 2020—2024 hadoŭ skaraciŭsia na 64%. Asabliva prykmietnym hety spad staŭ jašče da ŭvarvańnia va Ukrainu — u 2020 i 2021 hadach abjomy rasijskaha ekspartu byli najnižejšymi za apošnija dva dziesiacihodździ.
Ciapier čytajuć
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza13
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii1616
Kamientary