Łyžnik z Haici zaniaŭ na Alimpijadzie apošniaje miesca, ale sarvaŭ apładysmienty
Łyžnik z Haici Styviensan Savar zaniaŭ apošniaje miesca ŭ honcy na Alimpijskich hulniach, ale zdoleŭ zavajavać simpatyi hledačoŭ. Spartsmienu 25 hadoŭ, i na hetaj Alimpijadzie jon nie tolki nios ściah svajoj krainy, zbornaja jakoj składajecca ŭsiaho z dvuch čałaviek, ale i staŭ pieršym pradstaŭnikom Haici ŭ łyžnych honkach.
Styviensan Savar finišavaŭ 64-m, adnak na finišy jaho sustreli hučnymi apładysmientami. Pierasiakajučy finišnuju rysu, jon u znak pavahi pakłaniŭsia publicy. Darečy, zusim apošnim jon u vynikovym pratakole nie byŭ, bo ź dziasiatak łyžnikaŭ pa roznych pryčynach uvohule da kanca dystancyi nie dabiehli.
Spartsmien naradziŭsia ŭ Haici, ale va ŭzroście troch hadoŭ jaho ŭsynavili ŭ Francyi. Z taho času jon žyvie i trenirujecca ŭ rehijonie Vahiezy, dzie i pačaŭ zajmacca łyžnym sportam.
Sam Savar adznačaje, što ŭdzieł u Alimpijadzie dla jaho — heta mahčymaść zmahacca sa stereatypami ŭ zimovych vidach sportu. U dziacinstvie jamu było ciažka być adzinym ciomnaskurym łyžnikam, bo pastajannaja ŭvaha da jaho z boku starońnich ludziej biantežyła. Ale z hadami, pavodle jaho słoŭ, heta pierastała mieć značeńnie, i ciapier jon prosta zajmajecca tym, što lubić.
Uvohule ž pieršym zimovym alimpijcam Haici byŭ harnałyžnik Ryčardsan Vijana. Jon debiutavaŭ na minułaj Alimpijadzie ŭ Piekinie ŭ 2022 hodzie, zaniaŭšy 34‑ie miesca ŭ słałamie, i znoŭ vystupaje na ciapierašnich hulniach. Jak i Savar, jon naradziŭsia na Haici, a paśla byŭ usynoŭleny.
«Meta — pakazać lepšy vynik i pašyryć mahčymaści, — havoryć adnosna hetaha Savar. — Nasić hety kaścium — vielizarny honar. My starajemsia być simvałami našaj maleńkaj krainy i ŭsialać u jaje nadzieju, tamu što ciapier tam davoli zmročny pieryjad».
Savar upieršyniu debiutavaŭ na Kubku śvietu tolki ŭ studzieni 2023-ha, a zatym vystupaŭ na čempijanatach śvietu. Vystupić na Alimpijadzie jamu dapamahła stypiendyja prahramy «Alimpijskaja salidarnaść», jakaja padtrymlivaje spartsmienaŭ z usich kutkoŭ płaniety.
Forma zbornaj Haici vyklikała sapraŭdny furor na Zimovych Alimpijskich hulniach. Ale jaje ledź nie zabaranili
Lindsi Von znachodzicca ŭ stabilnym stanie paśla padzieńnia na Alimpijadzie-2026
Biełaruska Maryna Zujeva zaniała na Alimpijadzie 15‑ie miesca
Hanna Karalova finišavała ŭ łyžnym skijatłonie na 34‑m miescy
Kamientary