Na majskija śviaty ŭ niedarahich hatelach Minska vykupili amal usie miescy
U minskich troch– i čatyrochzorkavych haścinicach u mai amal nie zastałosia svabodnych numaroŭ.
Jak piša sb.by sa spasyłkaj na Respublikanski sajuz turindustryi, ceny na pakinutyja numary dasiahajuć rekordu. Pavodle danych servisaŭ braniravańnia, bolšaść haścinic i kvater na majskija śviaty ŭžo zaniata. Tym turystam, jakija jašče nie zabraniravali žyllo, adpačynak u mai abydziecca daražej, čym u luby inšy čas hoda.
Akramia śviatkavańnia 80-hodździa Pieramohi, vierahodnymi pryčynami vysokaha popytu nazyvajuć doŭhija vychodnyja ŭ Rasii. Taksama kolkaść haściej u Minsku pavialičycca ŭ suviazi z praviadzieńniem u kancy maja IV Jeŭrazijskaha ekanamičnaha forumu.
U RSTI adznačyli, što samy vysoki popyt tradycyjna prypadaje na pieryjad z 1 pa 10 maja. Numary ŭ biełaruskich haścinicach pačali braniravać jašče ŭ lutym.
U haścinicy «Minsk» užo ciapier na hety pieryjad vykupleny bolš za 60% numaroŭ. U pik zapaŭnialnaść dasiahaje 80−82%.
Haścinica «Jeŭropa» z 30 krasavika pa 10 maja budzie całkam zahružana.
90% turystaŭ u hety čas — hramadzianie Rasii.
Na siońnia ŭ haścinicach krainy dastupnyja miescy tolki ŭ darahich katehoryjach.
Pavodle ekśpiertaŭ turindustryi, źnižak čakać nie varta. Ale siaredzinie maja taryfy mohuć źnizicca da 50% u zaležnaści ad rehijona. Da červienia źjaviacca śpiecyjalnyja prapanovy i bonusy dla pastajannych klijentaŭ.
Kamientary