«Tramp, vidać, nie pahadziŭsia na hetyja varjackija ŭmovy»: pieršyja reakcyi na razmovu Trampa z Pucinym
Pieršyja reakcyi na vyniki telefonnaj razmovy Uładzimira Pucina i Donalda Trampa znachodziacca ŭ dyjapazonie ad kanstatacyi pravału pieramoŭ da aptymistyčnych acenak. Vykazvańni palitykaŭ i daśledčykaŭ naźbirała «Ahientstvo».
«Takim čynam, sutnaść u tym, što Zialenski pahadziŭsia na poŭnaje spynieńnie ahniu, a Pucin — nie», — napisaŭ u Ch hałoŭny źniešniepalityčny karespandent haziety The Wall Street Journal Jarasłaŭ Trafimaŭ, kamientujučy vyniki pieramoŭ.
«U tłumačeńni telefonnaj razmovy Trampa i Pucina Kramlom havorycca, što 30-dzionnaje spynieńnie ahniu patrabuje ad Ukrainy spynić mabilizacyju ŭ svaje ŭzbrojenyja siły, pieraŭzbrajeńnie i patrabuje spynieńnia zamiežnaj vajskovaj dapamohi i supracoŭnictva ŭ śfiery vyviedki. Pa sutnaści, heta kapitulacyja», — dadaŭ Trafimaŭ u inšym paście.
«Całkam pradkazalna Pucin adchilaje biezumoŭnaje spynieńnie ahniu, prapanavanaje Ukrainaj, adpraŭlaje Trampa na zadańnie palehčyć rasijskaje ŭvarvańnie… choć Tramp śćviardžaje, što jon čahości damohsia», — napisaŭ amierykanski historyk, prafiesar Jelskaha ŭniviersiteta Cimaci Snajder.
Ab faktyčnym pravale idei pieramirja piša i były ambasadar ZŠA Va Ukrainie Styvien Pajfier: «Prymusiŭšy Trampa čakać, Pucin nie pahadziŭsia na prapanovu ZŠA i Ukrainy ab poŭnym 30-dzionnym spynieńni ahniu pamiž Rasijaj i Ukrainaj. Pucin pahadziŭsia na 30-dzionnaje spynieńnie napadaŭ na abjekty enierhietyčnaj infrastruktury i abmierkavać detali biaśpiečnaha sudnachodstva ŭ Čornym mory. Niama pahadnieńnia ab spynieńni bajavych dziejańniaŭ na sušy».
Były ambasadar ZŠA ŭ Rasii Majkł Makfoł ličyć, što zajavie Biełaha doma jość i dobryja naviny: «Dobryja naviny ŭ tym, što Tramp, vidać, nie pahadziŭsia na hetyja varjackija ŭmovy (ab spynieńni vajskovaj dapamohi Kijevu i spynieńni mabilizacyi va Ukrainie)».
Staršy navukovy supracoŭnik daśledčaj karparacyi RAND Samuel Čarap ličyć, što zajava Biełaha doma pakidaje nadzieju na pastupovy prahres u bok pieramirja: «Pakinuŭšy ŭ baku palityku i maksimalisckuju rytoryku, paetapny padychod da spynieńnia ahniu, uzhodnieny siońnia ŭ chodzie hetych telefonnych pieramoŭ ZŠA i Rasii, źjaŭlajecca mahčymym žyćciazdolnym šlacham da kančatkovaha spynieńnia bajavych dziejańniaŭ».
Čarap miarkuje, što ŭzhodnienyja ŭ aŭtorak prapanovy stali faktyčna viartańniem da dvuch pahadnieńniaŭ, jakija Rasija i Ukraina amal zaviaršyli abmiarkoŭvać letaś, ale tak i nie pierasiekli finišnuju rysu.
«Adnym ź ich było pahadnieńnie ab admovie ad udaraŭ pa enierhietyčnaj infrastruktury, jakoje, jak paviedamlajecca, pravaliłasia paśla ŭvarvańnia Ukrainy ŭ Kurskuju vobłaść. Inšym stała pahadnieńnie pa sudnachodstvie ŭ Čornym mory, jakoje, pa dadzienych Reuters, było amal zavieršana viasnoj minułaha hoda.
Start ź nievialikich krokaŭ, jakija mohuć umacavać davier i z časam dać kumulatyŭny efiekt, chutčej za ŭsio, spracuje lepš, čym sprabavać nieadkładna pierajści ad kanfliktu vysokaj intensiŭnaści da poŭnaha pieramirja. Pahladzim, jak usio pojdzie dalej, ale heta niadrenny vynik, kali vykazać zdahadku, što jon budzie realizavany i na jaho asnovie buduć raspracoŭvacca bolš šyrokija damoŭlenaści», — napisaŭ Čarap.
Kiraŭnik Savieta pa źniešniaj i abaronnaj palitycy (hetaja arhanizacyja rychtuje spravazdačy dla Kramla) Fiodar Łukjanaŭ taksama ličyć, što pieramoŭny praces praciahvajecca:
«Sproby pradstavić druhuju razmovu losavyznačalnaj i vyrašalnaj nie spracavali, praces praciahvajecca i jaho časovyja pierśpiektyvy pakul nie jasnyja. Heta, adnak, nie prymianšaje značnaści dadzienaha kroku».
Pry hetym jon udakładniŭ, što «ŭsio idzie chutčej pa rasijskim scenaryi».
«U Maskvie nie vitali ideju nieadkładnaha pieramirja, zajaviŭšy ab nieabchodnaści dbajnaj prapracoŭki jaho ŭmoŭ, pa sutnaści, padrychtoŭki kontury doŭhaterminovaha rašeńnia», — miarkuje Łukjanaŭ.
Acenku pieramovam daŭ i sam Tramp. «Maja siońniašniaja telefonnaja razmova z prezidentam Rasii Pucinym była vielmi dobraj i praduktyŭnaj» i vykazaŭ nadzieju, što ŭdasca vykanać «hetuju pracu dziela čałaviectva», — napisaŭ jon u sacsietcy Truth Social.
Ciapier čytajuć
Vyjšaŭ na svabodu biełarus, jakoha ŭ svoj čas prysudzili da pažyćciovaha źniavoleńnia. Heta pieršy viadomy taki vypadak9
Kamientary