Błohier Vadimati raśpisaŭsia anłajn sa svaim partnioram, ź jakim razam užo bolš za 10 hadoŭ
Były palitviazień, błohier Vadimati (Vadzim Jermašuk) zaklučyŭ šlub sa svaim partnioram Dzianisam, kab uźjadnacca ź im u Polščy. Cyrymonija prajšła anłajn, a aficyjnym miescam žanićby staŭ amierykanski štat Juta — adzin z rehijonaŭ u ZŠA, dzie raśpisvajuć adnapołyja pary. Niahledziačy na toje, što Polšča aficyjna nie pryznaje takija šluby, hety krok moža dapamahčy pary ŭźjadnacca ŭ hetaj krainie, piša Most.
Vadzim raskazaŭ Most, što cyrymoniju viała žančyna-pastar. Rośpis prachodziŭ pa časie štata Juta, a ŭ maładych u hety čas była hłybokaja noč: u Dzianisa ŭ Vilni — 2:15 nočy, u Vadzima ŭ Varšavie — 1:15.
Maładyja ludzi razam užo bolš za 10 hadoŭ, ale nie chavajuć, što raśpisalisia ciapier, kab vyrašyć pytańnie ź lehalizacyjaj.
Paśla vyzvaleńnia ŭ 2024 hodzie Vadzim vyjechaŭ ź Biełarusi ŭ Polšču, dzie paprasiŭ pra mižnarodnuju abaronu. Jahony partnior paprasiŭ prytułku ŭ Litvie ŭ 2025 hodzie. Z-za biurakratyčnych abmiežavańniaŭ, źviazanych z Dublinskim rehłamientam, para nie moža ŭźjadnacca: jeŭrapiejskaje prava patrabuje, kab zapyt na prytułak razhladaŭsia ŭ pieršaj krainie ŭjezdu ŭ ES.
Polšča nie pryznaje adnapołyja šluby navat tady, kali jany byli zaklučanyja za miažoj. Ale ŭ niekatorych vypadkach, u tym liku pry padačy dakumientaŭ na mižnarodnuju abaronu, fakt sumiesnaha žyćcia i partniorstva moža być uličany jak sacyjalnaja i siamiejnaja suviaź. Ciapier u pary jość dakumient, jaki heta paćviardžaje.
Papularny błohier Vadimati pravioŭ try hady ŭ kałonii za abrazu Łukašenki i ździek ź dziaržaŭnych simvałaŭ. Termin jon adbyvaŭ u tak zvanym nizkim statusie — dla hetaha siłaviki śpiecyjalna raspaŭsiudžvali infarmacyju pra jaho seksualny kantakt z mužčynam. Vyzvaliŭšysia, Vadzim pieranios apieracyju pa vydaleńni złajakasnaj puchliny i zdoleŭ pierajechać u Polšču. Ciapier jon čakaje rašeńnia pa mižnarodnaj abaronie ŭ hetaj krainie.
Błohier Vadimati: Majo «pakajannaje» videa siłaviki zdymali try razy. I ničoha nie vyjšła
Palitviazień Jermašuk nazvaŭ imiony źniavolenych, jakija stukali administracyi kałonii i psavali jamu žyćcio
«My dla ich — miasa». Palitviazień vyjšaŭ ź miełanomaj, jon uskładaje vinu na načalnicu sančaści i prymusovaje haleńnie hałavy
Ciapier čytajuć
Zorka brejkdansu ź Viciebska atrymaŭ 11 hadoŭ turmy ŭ Kitai. Što zdaryłasia?8
Kamientary