Mošes: U ES źmirylisia, što Łukašenka nazaŭsiody zastaniecca ŭ zonie ŭpłyvu Rasii

Razvažajučy ŭ intervju «Radyjo Svaboda» pra pryčyny admovy Alaksandra Łukašenki asabista prysutničać na pieršaj sustrečy lidaraŭ Rady miru ŭ ZŠA, Arkadź Mošes zaŭvažyŭ, što na heta rašeńnie Maskva nie paŭpłyvała. Na jahonuju dumku, biełaruskamu kiraŭniku ciažka dalisia b razmovy ź inšymi suśvietnymi lidarami, jakija mahli tam prysutničać i pradstaŭlać inšyja punkty hledžańnia, a taksama «zusim inšaje razumieńnie taho, što ź siabie siońnia ŭjaŭlaje śviet».

«Ja dumaju, što Łukašenka pravilna zrabiŭ sa svajho punktu hledžańnia, što nie pajechaŭ, što pasłaŭ ministra zamiežnych spraŭ. Prysutnaść nibyta zabiaśpiečanaja».

Uvohule, na pohlad ekśpierta, nielha kazać pra toje, što kantakty Łukašenki z pradstaŭnikami administracyi Trampa mohuć pryvieści da niejkaha pasłableńnia suviazi pamiž Minskam i Maskvoj.

«U Pucina niama prablem nazirać za tym, jak Łukašenka viadzie svaju zamiežnuju palityku na zachodnim kirunku. Klučavyja vyšyni ŭsie zachoplenyja Rasijaj vielmi daŭno, nie paśla 2020-ha, a jak minimum paśla 2010 hoda. I, tak by mović, kali Zachad pryjdzie ŭ Minsk z prapanovaj niejkich hrošaj, heta aznačaje, što jon prosta dapamoža Pucinu zekanomić svaje hrošy, rasijskija», — miarkuje ekśpiert i nahadvaje, što ŭ pieryjad 2015—2020 hadoŭ, kali Zachad pravodziŭ adnosna Łukašenki palityku, jakuju jon nazyvaje «palitykaj soniečnaha śviatła», Maskva «nikudy nie tuzałasia, pavodziła siabie jak zvyčajna»:

«I niejkija hrošy davała, i niejkija dakumienty padpisvała. Tamu što Łukašenka — heta instrumient dla Maskvy, instrumient apasrodkavanaha kantrolu ŭ Biełarusi, jaki nichto inšy ŭ hety momant zabiaśpiečyć nie moža».

«Pracesu zbližeńnia niama»

Akramia taho, pavodle słoŭ ekśpierta, nie vypadaje śćviardžać, što kantakty Łukašenki z administracyjaj Trampa i vyzvaleńnie častki palityčnych źniavolenych, jakoje supravadžaje hety praces, mohuć pryvieści da niejkaha pasłableńnia suviaziaŭ pamiž Minskam i Maskvoj. Jak śćviardžaje Mošes, Łukašenka nie mianiaje rytoryki i pavodzin:

«Pracesu zbližeńnia niama. Dva fakty vyzvaleńnia […] amal dźviuch socień palitviaźniaŭ ničoha nie mianiajuć. Heta pavinna było adbyvacca kožny tydzień. Ludziej hetych pavinny byli vyzvalać i, kali ŭžo nie prasić u ich prabačeńnia, to dakładna nie vysyłać za miežy Biełarusi.

Kali jon chacieŭ prademanstravać, što realna choča pieraharnuć staronku, u jaho jość mahčymaść zrabić šmat. U płanie […] vypuścić palitviaźniaŭ. Jon hetaha nie robić. […]

Kali raz na niekalki miesiacaŭ da vas pryjedzie niejki ŭpaŭnavažany, vy pra niešta pahavorycie, heta nie mianiaje struktury dačynieńniaŭ i sutnaści hetych stasunkaŭ. Sutnaściu adnosin pamiž Zachadam i Łukašenkam u ciapierašni momant źjaŭlajecca kanflikt. I hetaja paradyhma zachavajecca na najbližejšuju budučyniu».

«Ideja adarvać Łukašenku ad Rasii nievykanalnaja»

Nie vieryć Mošes i ŭ mahčymaść admieny sankcyj z boku ES.

«Heta ŭsio debaty ŭnutry biełaruskaj apazicyi, nu ci, prynamsi, ekśpiertnaj supolnaści, jakaja sočyć za Biełaruśsiu. Takich debataŭ, prynamsi ŭ Jeŭropie, niama dakładna», — zaŭvažaje ekśpiert.

Jak jon tłumačyć, pieršaja pryčyna taho, što sankcyi zastanucca, toje, što jany pracujuć, a druhaja — u tym, što «Jeŭrapiejski sajuz narešcie zrazumieŭ, što ideja adarvać Łukašenku ad Rasii — nievykanalnaja. Hetaksama, jak ideja adarvać Rasiju ad Kitaja».

«Kali ideja adarvać Rasiju ad Kitaja jašče choć niejak praciahvaje abmiarkoŭvacca, to ideja pajści Łukašenku nasustrač, źniać ź jaho sankcyi tolki tamu, što jon potym niešta takoje skaža, što budzie razdražniać Pucina, — heta niesurjozna. Tak siońniašniaja palityka Jeŭrapiejskaha sajuza nie budujecca», — davodzić ekśpiert.

Mošes padkreślivaje, što nie viedaje, jak nadoŭha Biełaruś trapiła ŭ zaležnaść ad Rasii. Jon maje na ŭvazie mienavita zaležnaść Łukašenki. Paśla jaho situacyja źmienicca: «Ja nie viedaju nakont nazaŭsiody i kali heta skončycca, ale što Łukašenka asabista budzie ŭ zonie ŭpłyvu Rasii — tak. Voś z hetym nichto nie spračajecca, što jon asabista nie moža vyjści. A pakolki režym asacyjujecca ź im i jon piersanalizuje jaho, to, adpaviedna, my majem usie astatnija rečy.

Voś kali jaho nie budzie i budzie tam, nie viedaju, chto zaŭhodna, to razmovy, prynamsi niejkija, pojduć. I dyskusija stanie inšaj. A siońnia dyskusii absalutna niama».

Ekśpiert padkreślivaje: kab pačać dyskusiju, Łukašenku i jaho prapahandysckaj mašynie «treba havaryć nie pra pluški, nie pra toje, što jany tam čakajuć niečaha ci tam hatovyja razmaŭlać jašče pra niešta, a rabić».

Na pohlad Mošesa, kali ŭ zamiežnaj palitycy Łukašenka, pry poŭnaj zaležnaści ad Maskvy, faktyčna ničoha nie moža zrabić, to va ŭnutranaj tearetyčna moža šmat čaho, ale nie robić.

«Represiŭnaja mašyna, hety machavik raskručany, i, uvohule, my nie bačym nijakaha jaho zapavoleńnia. U nas jość statystyka, dastupnaja ad pravaabaroncaŭ. My bačym, što voś stolki ludziej vypuścili, a pasadzili bolš.

I voś pakul heta budzie praciahvacca, ja dumaju, što bieskarysna navat vieści niejkuju razmovu pra toje, što nibyta tearetyčna mahčyma źmianieńnie charaktaru dačynieńniaŭ pamiž Zachadam, asabliva Jeŭropaj, i Łukašenkam».

Ekśpiert adznačaje: «Jeŭrapiejski sajuz na siońniašni momant, ja ŭ hetym pierakanany, iści na surjoznyja pieramovy, raźmieny z režymam Biełarusi ŭ takim ža klučy, u jakim jon na ich išoŭ padčas paciapleńnia 2008 i 2010 hadoŭ, i tym bolš padčas paciapleńnia 2015—2019, ciapier nie pojdzie. Matyvacyja niezrazumiełaja, vyjhryšy niezrazumiełyja, a projhryšy jakraz zrazumiełyja».

• 12
• 0
• 1
• 0
• 0
• 0
• 0
• 0