Sud u Małdovie sankcyjanavaŭ previentyŭny aryšt kiraŭnicy hahauzskaj aŭtanomii Jaŭhienii Hucuł na 20 sutak. Jana była zatrymanaja 25 sakavika ŭ ramkach spravy suprać prarasijskaj palityčnaj partyi «Šor».
Jaŭhieniju Hucuł abvinavačvajuć u niezakonnym finansavańni palityčnaj partyi i kandydata na vybarach u składzie arhanizavanaj złačynnaj hrupy.
Hucuł uznačalvaje hahauzskuju aŭtanomiju ź leta 2023 hoda. Na praciahu ŭsiaho terminu svajho kiravańnia jana kanfliktuje z kiraŭnictvam Małdovy.
Hucuł ličyć svoj pieraśled palityčnym. Paśla zatrymańnia jana źviarnułasia da prezidenta Rasii Uładzimira Pucina z prośbaj vykarystoŭvać «uvieś arsienał dypłamatyčnych, palityčnych i pravavych miechanizmaŭ dla cisku na małdaŭskija ŭłady» z metaj «nieadkładnaha spynieńnia palityčnych represij».
Hahauzija — aŭtanomnaja vobłaść Małdovy ź pieravažna ruskamoŭnym nasielnictvam. Rehijon tradycyjna vystupaje za zbližeńnie z Rasijaj i suprać intehracyi Małdovy ŭ Jeŭrapiejski sajuz. Pavodle vynikaŭ refierendumu, jaki adbyŭsia ŭ lutym 2014 hoda, bolš za 98 pracentaŭ udzielnikaŭ vykazalisia za intehracyju Małdovy ŭ Mytny sajuz.
Kamientary