U Minsku ŭžo pierapradajuć błatnyja aŭtamabilnyja numary z vaśmiorkaj. Kolki prosiać?
Z sakavika ŭ stalicy vydajuć rehistracyjnyja numary z 8-m rehijonam. Samyja pryhožyja kambinacyi numarnych znakaŭ razabrali za ličanyja dni. Niekatoryja z hetych numaroŭ užo pierapradajuć.
Cana pytańnia
U Biełarusi lehalna možna skarystacca pasłuhami pa vybary aŭtamabilnych numaroŭ z pažadanymi ličbami i litarami. Košt takoj pasłuhi — 60 bazavych (2520 rubloŭ).
Za 10 bazavych (420 rubloŭ) možna vybirać z numaroŭ, jakija ŭžo vyrablenyja. Naprykład, 2333, 3222, abo z parnymi ličbami — 5757, 6969.
Ahułam numaroŭ z usimi vaśmiorkami — 144 štuki, siarod ich jość 12 najbolš kaštoŭnych. Heta numary z paŭtornymi litarami.
I pakolki samyja pryhožyja kambinacyi razabrali za ličanyja dni, u internecie ŭžo pačali źjaŭlacca abjavy ab prodažy novych błatnych numaroŭ.
Tak, naprykład, adzin z karystalnikaŭ barachołki «Anłajniera» vystaviŭ abjavu ab prodažy adrazu dvuch numaroŭ z novym rehijonam.
Z apisańnia vynikaje, što jak minimum za adzin ź ich (chutčej za ŭsio, za 8888 RV-8) pradaviec choča atrymać 4 tysiačy dalaraŭ.
Heta nie adzinaja prapanova z usimi vaśmiorkami. Taksama ŭ prodažy jość 8888 VK-8.
U apisańni paznačana, što čałaviek pradaje «aŭto z topavym numaram». Naturalna, nikoha nie chvaluje, jaki tam aŭtamabil, zvyčajna dla zachoŭvańnia błatnych numaroŭ vykarystoŭvajuć niejkija «Žyhuli» ci «Maskvičy». Adzinaje patrabavańnie dla takich mašyn — kab byŭ čytelny VIN-numar, bo inakš mašynu budzie niemahčyma pastavić na ŭlik ci źniać ź jaho.
Adzin z karystalnikaŭ užo prapanavaŭ nabyć hetyja rehistracyjnyja znaki za 2500 dalaraŭ.
Aproč niekalkich abjaŭ ab prodažy pryhožych numaroŭ z vośmym rehijonam, chapaje publikacyj i ad patencyjnych pakupnikoŭ.
Što tyčycca cen, to ŭ zaležnaści ad kambinacyi pryhožyja numary pradajuć pa cenach ad 1000 rubloŭ da 10 tysiač dalaraŭ.
Za numary 0700 CHR-7 ź miesiac tamu prasili 1000 rubloŭ. Ciapier abjava nie aktyŭnaja.
A za 2222 TT-7 chočuć vyručyć 10 tysiač rubloŭ.
Badaj, adnym z samych darahich numaroŭ u Biełarusi byŭ numar 7777JeJe-7. U 2023 hodzie ŭłaśnik pisaŭ, što hatovy pradać jaho za 15 tysiač dalaraŭ.
Nakolki 15 tysiač dalaraŭ — realny košt za numary ŭ Biełarusi, adnaznačnaha adkazu niama. Ale, zdajecca, 5 tysiač dalaraŭ całkam realnaja ličba.
U 2022 hodzie ŭłaśnik mašyny z numarami 7777RV-7 u intervju av.by kazaŭ, što maje pakupnika, jaki hatovy zapłacić za ich $5000. Vyhladaje, što ździełka adbyłasia, abo ŭłaśnik Geely Coolray padniaŭsia i pierasieŭ na Rolls-Royce.
Nakolki heta zakonna?
Aficyjna pierapradavać dziaržaŭnyja rehistracyjnyja numary nielha. U lubym vypadku prakručvać schiemu daviadziecca praz afarmleńnie damovy kupli-prodažu aŭto ŭ DAI. U svaju čarhu, DAI prapanuje pasłuhi pa zachoŭvańni aŭtamabilnych numaroŭ. Košt — 5 rubloŭ za sutki, ale minimalny termin, jaki daviadziecca apłacić, — 15 dzion. Praz davoli vysokija ceny na zachoŭvańnie numaroŭ ułaśniki pryhožych šyldaŭ, kali chočuć ich zachavać nadoŭha abo pierapradać u budučyni, rehistrujuć na ich tannyja aŭtamabili. Pažadana starejšyja za 1991 hod vypusku, kab nie płacić padatak za aŭto.
Popyt na pryhožyja numary vialiki
Popyt na pryhožyja numary ciapier značna bolšy, čym 20 hadoŭ tamu. Navat z ulikam taho, što ŭsie samyja cikavyja kambinacyi ličbaŭ z 7-m rehijonam byli daŭno raspradadzienyja, tolki ŭ 2023 hodzie ŭ Minsku pradali 351 numar za 60 bazavych.
Sami numary ciapierašniaha ŭzoru pačali vydavać u 2004 hodzie, a apošni numar za 60 bazavych z čatyrma siamiorkami byŭ pradadzieny tolki ŭ 2007 hodzie. Ciapier ža ŭsie vaśmiorki raspradali ciaham niekalkich dzion, a razam ź imi i inšyja cikavyja kambinacyi, jak 8000 OO-8 i inšyja.
Kamientary
Dumaju, v Novoj Biełarusi my pridiem k etomu, ibo v s słučaje s łukašienkovskoj Biełaruśju popołnienije biudžieta takim obrazom lično mienia nie intieriesujet