Zajavu ab źniknieńni Anžaliki Mielnikavaj padali ŭ palicyju Vialikabrytanii
Suzasnavalnik fondaŭ «Bajchełp» i «Bajsoł» Alaksiej Lavončyk padaŭ zajavu ab źniknieńni śpikierki Kaardynacyjnaj rady Anžaliki Mielnikavaj u palicyju Vialikabrytanii, piša «Biełsat».
Alaksiej Lavončyk skłaŭ zajavy ab źniknieńni Anžaliki Mielnikavaj u dźvie struktury: palicyju Łondana (Metropolitan Police) i ŭ Nacyjanalnaje ahienctva pa rasśledavańni złačynstvaŭ (NCA), jakaja pracuje na ŭsioj terytoryi krainy.
«Ja vyrašyŭ vyznačyć, ci Anžalika sapraŭdy pryziamlałasia ŭ Vialikabrytanii. Bo mnie padajecca vielmi dziŭnym, što čałaviek, jaki vylecieŭ z Polščy ŭ inšuju krainu, padarožžy pamiž jakimi dastatkova dobra adsočvajucca, prosta źnik. Pahladzim, što z hetaha vyjdzie», — kaža Lavončyk.
Kali bližejšym časam nie budzie vynikaŭ, to jon płanuje pryciahnuć da spravy presu.
«Heta startavy punkt. Dalej usio budzie zaležać ad taho, ci budzie žadańnie ŭ adpaviednych orhanach heta rasśledavać. I ci budzie žadańnie z majho boku na heta cisnuć. Z majho boku žadańnie budzie», — praciahvaje Lavončyk.
4 krasavika jon płanuje pajechać u aeraporty Łutan i Chitrou.
«Treba jašče tam skłaści zajavy, bo heta dva aeraporty, kudy z varšaŭskaha centralnaha aeraportu mohuć prylacieć samaloty. Nie dumaju, što jana jechała ŭ Modlin [aeraport pa-za Varšavaj], kab na Ryanair lacieć u Stansted», — dzielicca płanami Lavončyk.
Jon adznačaje, što ŭziaŭsia za spravu, bo ŭ Polščy ŭ dziaržaŭnych strukturach pra Anžaliku Mielnikavu sprabujuć daviedacca i žurnalisty, i paplečniki, a ŭ Vialikabrytanii dyjaspara biełarusaŭ nievialikaja.
«U mianie jość hramadzianstva i Vialikabrytanii, i Polščy, to bok ja źviartaŭsia ŭ palicyju jak doŭhaterminovy rezident Vialikaj Brytanii. Mnie padajecca, što tut asnoŭny akcent pavinien rabicca na spravie ab źniknieńni čałavieka. Mahčyma, jany skažuć, što hetaja infarmacyja źjaŭlajecca tajamnicaj śledstva, kali hetaje śledstva jość. Mahčyma, jany zmohuć dać nam niejkuju infarmacyju», — praciahvaje Lavončyk.
Infarmacyja pra čałavieka, jaki źnik, sapraŭdy moža być niedasiažnaja, ale surazmoŭca raźličvaje, što dziaržstuktury buduć paviedamlać bolš, uličvajučy toje, što Anžalika Mielnikava — viadomaja asoba i palityk, jaki moža być u niebiaśpiecy praź dziejańni režymu ŭ Minsku.
«Naturalna, kali heta pryvatnaja sprava, to jaje datyčać usie zachady abarony infarmacyi. Naturalna, što ni polskaja prakuratura, ni palicyja nie mohuć dzialicca infarmacyj pa-za miežami svaich kampietencyjaŭ — tajamnica śledstva. Jany mohuć padzialicca tolki sa svajakami.
Ale, mnie padajecca, što tut sprava hramadskaha intaresu. Anžalika nie źjaŭlajecca pryvatnaj asobaj, heta postać biełaruskaj apazicyi, jakaja, miarkujučy pa publikacyjach, mieła suviaź i z Kibierpartyzanami, i ź inšymi asobami, što daje mnie mahčymaść dumać, što, kali taki čałaviek źnik, to nie prosta tak», — padkreślivaje Lavončyk.
Pra źniknieńnie śpikierki Kaardynacyjnaj rady Anžaliki Mielnikavaj jejnyja siabry paviedamili ŭviečary 28 sakavika. Ź joju niama suviazi z 25 sakavika.
Ciapier čytajuć
Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?22
Kamientary