«My nie źjaŭlajemsia ŭradam śvietu», — skazaŭ Rubia žurnalistam u Brusieli.
ZŠA bolš nie buduć nieści asnoŭny ciažar akazańnia humanitarnaj dapamohi ŭ śviecie, zajaviŭ u piatnicu dziaržaŭny sakratar Marka Rubia. Dziaržsakratar zaklikaŭ inšyja bahatyja krainy płaniety ŭziać na siabie bolšuju adkaznaść paśla razburalnaha ziemlatrusu ŭ Mjanmie, piša LRT.
«My nie źjaŭlajemsia ŭradam śvietu. My budziem pradastaŭlać humanitarnuju dapamohu, jak i ŭsie astatnija, i budziem rabić heta tak dobra, jak zmožam», — skazaŭ Rubia žurnalistam u Brusieli.— «Ale ŭ nas taksama jość i inšyja patreby, jakija my pavinny ŭličvać».
Prezident Donald Tramp u pieršy dzień svajho znachodžańnia na pasadzie kiraŭnika amierykanskaj dziaržavy zahadaŭ prypynić usiu źniešniuju dapamohu ZŠA na 90 dzion. Hetaje rašeńnie, a taksama nastupnyja za im ukazy ab spynieńni pracy mnostva prahram Ahienctva ZŠA pa mižnarodnym raźvićci (USAID), vyklikali chaos u hłabalnych humanitarnych apieracyjach.
USAID faktyčna było rasfarmavana, pakolki Tramp i miljarder Iłan Mask praciahvajuć realizacyju biesprecedentnych mier pa skaračeńni fiederalnaha ŭrada ZŠA: značnaja častka supracoŭnikaŭ ahienctva była adpraŭlena ŭ adpačynak abo zvolniena, a mnohija hranty — admienieny.
Rubia zajaviŭ, što niespraviadliva čakać, što Amieryka budzie praciahvać zabiaśpiečvać 60—70% usioj humanitarnaj dapamohi ŭ śviecie, kali isnuje mnostva inšych bahatych krain, jakija pavinny ŭnieści svoj układ. Jon asabliva ŭzhadaŭ Kitaj i Indyju.
«My — samaja bahataja kraina ŭ śviecie, ale našy resursy nie biaźmiežnyja. U nas vielizarny nacyjanalny doŭh, u nas jość i inšyja pryjarytety. Para pierahledzieć naš padychod. My nie admaŭlajemsia ad dapamohi, ale ŭ nas jość i inšyja zadačy,» — zajaviŭ Rubia.
Ziemlatrus mahnitudaj 7,7, jaki adbyŭsia minułaj piatnicaj, staŭ adnym z samych mahutnych u Mjanmie za apošnija sto hadoŭ. Jon zakranuŭ rehijon z nasielnictvam 28 miljonaŭ čałaviek, źniščyŭ balnicy, razburyŭ cełyja pasieliščy i pakinuŭ tysiačy ludziej bieź ježy, vady i dachu nad hałavoj.
Kolkaść achviar ziemlatrusu pieravysiła 3300 čałaviek, bolš za 4500 atrymali ranieńni, a zvyš 200 čałaviek ličacca źnikłymi bieź viestak, zajaviła vajennaja chunta, što zachapiła ŭładu ŭ Mjanmie.
Złučanyja Štaty, jakija raniej źjaŭlalisia najbujniejšym humanitarnym donaram u śviecie, prapanavali ŭ jakaści dapamohi adnosna ścipłuju sumu ŭ $2 miljony. Vašynhton taksama abviaściŭ pra namier nakiravać troch ekśpiertaŭ dla acenki škody, adnak ich prybyćcio zatrymlivajecca z-za prablem z atrymańniem viz ad vajennaha režymu Mjanmy. Raniej ZŠA rehularna nakiroŭvali kvalifikavanych ratavalnikaŭ u paciarpiełyja rehijony, apieratyŭna akazvajučy dapamohu paśla cunami, ziemlatrusaŭ i inšych biedstvaŭ.
Rubia adchiliŭ abvinavačvańni ŭ marudnaj reakcyi Vašynhtona, śćviardžajučy, što situacyja ŭskładnienaja samim charaktaram režymu ŭ Mjanmie.
«Mjanma — nie samaje prostaje miesca dla pracy. Vajennaja chunta nie lubić ZŠA i zaminaje nam pracavać u krainie tak, jak my chacieli b,» — patłumačyŭ jon.
Ciapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1111
Kamientary
I biezumoŭna, hetuju inicyjatyvu pierachopić Kitaj. A z pad jaho žaleznaj ruki paviarnuć jaje ŭžo nie atrymajecca.
Hienijalna!