Na rašeńnie Trampa ŭvieści myty suprać usiaho śvietu akazaŭ upłyŭ fejkavy ekśpiert
Uviadzieńnie pošlin administracyjaj Donalda Trampa stała adnoj z samych papularnych tem u suśvietnaj ekanomicy. Adnak mała chto viedaje, što ideja hetych pošlin šmat u čym źviazana z čałaviekam, znojdzienym na prastorach Amazon, i vydumanym ekśpiertam, stvoranym dla abhruntavańnia sprečnych rašeńniaŭ.
Zajmalnuju — i adnačasova šakujučuju — historyju ab tym, jak Donald Tramp pryjšoŭ da svajoj taryfnaj palityki, raskazała viadučaja MSNBC Rejčeł Medou. Jaje apovied paćviardžajecca publikacyjami ŭ amierykanskaj presie.
U 2017 hodzie vydańnie Vanity fair, viadomaje svaimi rasśledavańniami, pisała: «U niejki momant padčas [prezidenckaj] kampanii 2016 hoda Tramp vyrašyŭ, što treba vykazvacca pra Kitaj bolš źmiastoŭna, i daručyŭ [Džaredu] Kušnieru zaniacca hetym pytańniem.
Jon nakidaŭ svaje ŭjaŭleńni i paprasiŭ ziacia pravieści nievialikaje daśledavańnie. Kušnier prosta zajšoŭ na Amazon, dzie jaho ŭvahu pryciahnuła kniha z vyraznaj nazvaj «Śmierć ad Kitaja» (Death by China, 2011 hoda vydańnia), adnym z aŭtaraŭ jakoj byŭ Piter Navara.
Kušnier tut ža patelefanavaŭ Navara — viadomamu jastrabu pa pytańniach handlovaha deficytu – i zaprasiŭ jaho ŭ kamandu ŭ jakaści ekanamičnaha daradcy. Na toj momant Navara staŭ adzinym ekanamistam u štabie kampanii Trampa».
Hazieta The Washington Post u 2018 hodzie nazvała na toj momant 68-hadovaha Navara prychilnikam žorstkaj linii, jakoha ŭsprymajuć jak čałavieka, jaki padšturchoŭvaje Trampa da jaho samych nacyjanalistyčnych i izalacyjanisckich instynktaŭ. U pieršy prezidencki termin Trampa Navara byŭ dyrektaram Nacyjanalnaj rady pa handli Biełaha doma.
Jak adznačajuć analityki, Navara — fihura bolš čym sprečnaja. Jon maje doktarskuju stupień pa ekanomicy Harvarda i vykładaŭ u Kalifarnijskim univiersitecie ŭ Irvajnie, ale, jak u 2019 hodzie adznačała vydańnie The Chronicle of Higher Education, jon nie mieŭ vopytu ŭ daśledavańniach Kitaja, nie viedaŭ kitajskaj movy i ździejśniŭ pieršuju pajezdku ŭ hetuju krainu tolki ŭ 2018 hodzie. Viedy ab Kitai ŭ jaho byli paviarchoŭnymi, a pohlady — adkryta ałarmisckija.
Ale heta nie pieraškodziła Navara napisać sieryju knih, dzie Kitaj adlustroŭvaŭsia jak monstr, jaki pahražaje Amierycy. Va ŭsich hetych knihach rehularna źjaŭlaŭsia niejki «Ron Vara» — nibyta ekanamist, biznesmien i ekśpiert pa handlovych pytańniach.
Navara cytavaŭ Rona Varu ŭ šaści svaich knihach, čaściej za ŭsio ŭ vyhladzie epihrafaŭ da raździełaŭ. U knizie «Śmierć ad Kitaja» Vara robić dziŭna abahulniajučuju zajavu ab paŭtaramiljardnym narodzie Kitaja:
«Tolki kitajcy ŭmiejuć pieratvaryć skuranuju kanapu ŭ kisłotnuju vannu, dziciačy łožačak — u śmiarotnuju zbroju, a batarejku ad telefona — u askiepak, jaki prabivaje serca».
Jak udałosia vyśvietlić žurnalistam, Ron Vara nikoli nie isnavaŭ. Heta anahrama ad proźvišča «Navarro». Navara prydumaŭ jaho sam jak zručnaha «aŭtaryteta», kab padmacoŭvać svaje idei.
Sam Navara ŭ intervju žurnalistu The Chronicle of Higher Education zajaviŭ: «Ron Vara — hullivy pryjom i litaraturny psieŭdanim, jaki ja vykarystaŭ na praciahu mnohich hadoŭ dla vykazvańnia mierkavańniaŭ i vyklučna ŭ zabaŭlalnych metach, a nie jak krynicu faktaŭ».
Ale prablema ŭ tym, što jaho cytaty vykarystoŭvalisia surjozna. Bolš za toje, u śniežni 2019 hoda ŭ Biełym domie cyrkulavała analityčnaja zapiska, padpisanaja hetym nieisnujučym ekśpiertam, u jakoj śćviardžałasia, što pošliny stratehična nieabchodnyja, i Tramp pavinien «asiadłać taryfy dziela pieramohi». Paźniej Navara, jak piša The New York Times, sam paćvierdziŭ sapraŭdnaść hetaj zapiski.
Ciapier u suviazi z uviadzieńniem administracyjaj Trampa handlovych pošlin amierykanskaja presa praciahvaje aśviatlać vykarystańnie Piteram Navara vydumanaha piersanaža Rona Vary dla abhruntavańnia svaich handlovych pohladaŭ, a taksama jaho rolu ŭ raspracoŭcy taryfnaj palityki.
Viadučaja navinnaha kabielnaha telekanała MSNBC, adnaho z hałoŭnych ruparaŭ Demakratyčnaj partyi ZŠA, Rejčeł Medoŭ padkreślivaje, što handlovaja palityka Trampa była častkova natchnionaja «fiktyŭnaj zapiskaj ad fiktyŭnaha čałavieka ź fiktyŭnym adrasam elektronnaj pošty», stvoranaj Navara.
Sam ža 75-hadovy Navara, jaki ŭ novaj administracyi Trampa zajmaje pasadu staršaha daradcy pa handli i vytvorčaści, praciahvaje vystupać prychilnikam žorstkaj palityki.
Dniami, jak piša Businness Insider, pamiž Navara i Iłanam Maskam uźnik publičny kanflikt. Mask krytykavaŭ novyja taryfy administracyi Trampa, śćviardžajučy, što jany nanosiać škodu ekanomicy, i zajaviŭ, što chacieŭ by bačyć «situacyju z nulavymi taryfami» i «zonu svabodnaha handlu» pamiž Jeŭropaj i ZŠA. U adkaz Navara abvinavaciŭ Maska ŭ abaronie ŭłasnych intaresaŭ, uličvajučy hłabalny łancužok pastavak Tesla.
Kamientary