Ci jość šaniec atrymać vizu ŭ Jeŭropu da siezonu adpačynkaŭ i kolki heta budzie kaštavać
Jość try krainy, jakija najbolš achvotna vydajuć karotkija turystyčnyja vizy biełarusam.
Kali chočacie vizu pad adpačynak, abirajcie z hetych troch krain
Vizavaja ekśpiertka i redaktarka visaflow.live Anastasija Łysakoŭskaja kaža, što z nabližeńniem leta achvotnych atrymać vizu tradycyjna stanovicca bolš, tamu zapisacca na padaču składaniej.
Ale šancy jašče jość.
Łysakoŭskaja vyłučaje try krainy, jakija najčaściej i najbolš achvotna vydajuć turystyčnyja vizy biełarusam: Ispaniju, Hrecyju i Bałharyju.
«Pa Ispanii jašče možna paśpieć złavić daty padačy na maj i červień. Pakolki Ispanija razhladaje dakumienty ciaham miesiaca, šancy atrymać ispanskuju vizu na letni adpačynak zastajucca», — kaža ekśpiertka.
Ispancy čaściej za ŭsio vydajuć biełarusam turystyčnyja multyvizy terminam na 1—3 miesiacy. Radziej — vizy na bolš praciahły termin ci, naadvarot, tolki pad adnu pajezdku.
Kali rabić usio samastojna, to ispanskaja turystyčnaja viza abydziecca ŭ 450—550 rubloŭ. Kali karystacca pasłuhami pasiarednikaŭ — treba dadać jašče 450—650 rubloŭ za čałavieka.
Skasavaŭ broń u hateli = anulavaŭ vizu
Što da Hrecyi i Bałharyi, ekśpiertka raić adkryvać vizy hetych krain tolki ŭ vypadku, kali vy sapraŭdy źbirajeciesia tudy jechać.
«Viadomyja vypadki, kali Hrecyja anulavała vizu pry admienie broni hatela jašče da vyjezdu. Taksama byŭ vypadak, kali čałavieku anulavali vizu padčas pajezdki.
Jon daviedaŭsia pra heta tolki na miažy, kali viartaŭsia ŭ Biełaruś. Dla Hrecyi važna, kab broń zastavałasia aktualnaj i paśla atrymańnia vizy», — tłumačyć Anastasija Łysakoŭskaja.
Pry hetym Hrecyja najčaściej vydaje vizu vyklučna pad kankretnuju pajezdku, a ŭ lepšym vypadku — miesiačnuju multyvizu.
«Padobnaja situacyja i z Bałharyjaj. Heta kraina anuluje vizy pry admienie broni hatela.
Ale kali vy sapraŭdy płanujecie adpačynak u hetych krainach, ich možna razhladać, bo zapisacca na padaču možna navat na bližejšyja daty. Hrecyja razhladaje zajavu 21—25 dzion, Bałharyja — 2—3 tydni».
Konsulski zbor u Hrecyi — 35 jeŭra, plus treba zapłacić 29 jeŭra servisnaha zboru. Apłata — najaŭnymi ŭ biełaruskich rublach.
U Bałharyi — 35 jeŭra za vizu i 25 jeŭra zbor vizavaha centra.
Ekśpiertka nazyvaje Ispaniju, Hrecyju i Bałharyju tymi tryma krainami, kudy možna zapisacca samastojna na padaču (papiarednie zabraniravaŭšy hatel) i paśpieć atrymać zapavietnuju nalepku ŭ pašpart da svajho letniaha adpačynku.
Pasiarednickija pasłuhi pa Hrecyi i Bałharyi kaštujuć kala 300—400 rubloŭ, što nie tak užo šmat u paraŭnańni ź inšymi krainami.
A što z doŭhaterminovymi vizami?
Kab atrymać šmatrazovuju doŭhaterminovuju vizu, ekśpiertka raić źviartacca ŭ takija krainy, jak Polšča i Francyja.
«Hetyja krainy aktyŭna adkryvajuć biełarusam haściavyja vizy terminam ad 6 miesiacaŭ, ale dla hetaha treba mieć čałavieka, jaki moža zaprasić vas u hości.
Jak u Polščy, tak i ŭ Francyi zaprašeńnie moža być ad luboha čałavieka, a nie tolki ad svajakoŭ.
Kali ŭ vas dobraja vizavaja historyja, to možna raźličvać na šenhienskuju vizu terminam na 2—3 hady. U niekatorych vypadkach polski abo francuzski šenhien pa zaprašeńni možna atrymać navat na 5 hadoŭ», — kaža ekśpiertka.
Pry hetym samastojna zapisacca na padaču vielmi składana, tamu da 200 rubloŭ, jakija spatrebiacca na konsulski i vizavy zbory, treba dadać kala 650 rubloŭ za pasiarednickija pasłuhi.
Kali jašče i niama zaprašeńnia, to heta plus 200—300 dalaraŭ. Takim čynam, polskaja viza pa zaprašeńni moža abyścisia bolš čym u 500 dalaraŭ na čałavieka.
30+ tysiač čałaviek u čarzie
Jašče adna kraina, jakaja aktyŭna adkryvaje vizy biełarusam, — heta Italija. Ale jość važny niuans.
Ciapier na vizu padajucca tyja, chto zapisvaŭsia ŭ žyvuju čarhu jašče ŭ minułym hodzie.
«Paśpieć padacca mohuć tolki tyja, chto ŭžo maje numar u žyvoj čarzie i budzie karystacca pasłuhaj premiŭm-padačy.
Tyja, u kaho numar u čarzie da 19 tysiač, mohuć zapytvać datu padačy. Mahčyma, na praciahu leta Italija zmoža apracavać ludziej z numarami ad 20 da 25 tysiač», — kaža Anastasija Łysakoŭskaja.
Tamu Italija — dobry varyjant dla tych, chto pačaŭ kłapacicca pra vizu jašče ŭ 2024 hodzie. Kali ŭ čałavieka dobraja vizavaja historyja, jon moža raźličvać navat na trochhadovy šenhien, atrymany praź Italiju.
Ekśpiertka adznačaje, što paśla taho, jak žyvaja čarha pieravaliła za 30 tysiač čałaviek, Italija zakryła zapis. Mahčymaść zapisacca na italjanski šenhien zastałasia tolki ŭ akredytavanych ahienctvach pad tury.
Padsumoŭvajučy, Anastasija Łysakoŭskaja adznačaje, što situacyja ź vizami dla biełarusaŭ z časam tolki paharšajecca.
«Ciapier navat tyja, chto maje patrebu ŭ terminovym adkryćci vizy i hatovy vydatkavać na heta pa 1000 dalaraŭ na čałavieka, nie mohuć zrabić heta tak chutka, jak jašče hod-dva tamu. Tamu navat najaŭnaść vialikich hrošaj nie harantuje chutkaha pośpiechu», — kaža ekśpiertka.
Ciapier čytajuć
Pamierła 39-hadovaja eks-palitźniavolenaja Hanna Kandracienka. U kałonii ŭ jaje znajšli rak, ale nie vyzvalili23
Kamientary
Ci tam i klimat nie umieriennyj, i horš za bielaruskija samatoryi ???