Sud u Kijevie spahnaŭ u dachod dziaržavy ŭkrainskija aktyvy «Biełaruśkalija»
Najvyšejšy antykarupcyjny sud zadavoliŭ pazoŭ Ministerstva justycyi Ukrainy da AAT «Biełaruśkalij» ab sankcyjach «u vyhladzie spahnańnia ŭ dachod dziaržavy aktyvaŭ padsankcyjnaj asoby», piša «Radyjo Svaboda».
Zhodna z rašeńniem suda, jakoje apublikavała Ministerstva justycyi Ukrainy, u dachod dziaržavy spahnali bolš za 70 tysiač ton chłarydu kaliju, bolš za 250 miljonaŭ hryŭniaŭ u ekvivalencie (zvyš 6 młn dołaraŭ), 1545 čyhunačnych vahonaŭ, a taksama 48% statutnaha kapitału TAA «Ahrorozkvit», suzasnavalnikam jakoha źjaŭlajecca Biełaruskaja kalijnaja kampanija.
Na padstavie zakona Ukrainy «Ab pieradačy, prymusovym adčužeńni ci adabrańni majomaści va ŭmovach pravavoha režymu vajennaha abo nadzvyčajnaha stanu» «Biełaruśkalij» pazbavili prava na kampiensacyju koštu prymusova adčužanaj majomaści.
U paviedamleńni Ministerstva justycyi Ukrainy adznačajecca, što «Biełaruśkalij» svaimi dziejańniami «spryjaje viadzieńniu vajny suprać Ukrainy — u pryvatnaści, praź finansava-haspadarčyja adnosiny z pradpryjemstvami vajskova-pramysłovaha kompleksu RF i akupacyjnymi administracyjami samaabvieščanych «DNR» i «ŁNR».
Taksama adznačajecca, što «Biełaruśkalij» davaŭ transpart i pamiaškańni dla pieramiaščeńnia i raźmiaščeńnia ŭkrainskich dziaciej, prymusova vyviezienych u Biełaruś z časova akupavanych terytoryj Ukrainy, braŭ udzieł u «arhanizacyi i finansavańni zachadaŭ, nakiravanych na padtrymku palityki dziaržavy-ahresara ŭ admaŭleńni prava ŭkrainskaha naroda na samaidentyfikacyju».
Pra toje, što Ministerstva justycyi Ukrainy padało ŭ sud pazoŭ ab sankcyjach suprać «Biełaruśkalija», stała viadoma 13 sakavika.
U kancy 2024 hoda ŭ Ahienctvie vyšuku i mieniedžmientu aktyvaŭ (ARMA) Ukrainy paviedamili pra pačatak maštabnaha prodažu 30 431 tony chłarydu kaliju, jakija na 24 lutaha 2022 hoda znachodzilisia na terytoryi Ukrainy. Z taho času praź siem aŭkcyjonaŭ jaho amal całkam raspradali. Srodki ad realizacyi aryštavanych aktyvaŭ Ukraina nakiroŭvaje na ŭzmacnieńnie svajoj ekanomiki i abaranazdolnaści.
Va Ukrainie pradali jašče 50 vahonaŭ biełaruskaha kaliju
Pradukcyju «Biełaruśkalija» pierajmienavali i pradajuć ES u abychod sankcyj
Z zakrytych pratakołaŭ stała viadoma, jak Biełaruś i Rasija dzialili kalijny rynak
Kijeŭ pačaŭ nacyjanalizacyju ŭkrainskich aktyvaŭ «Biełaruśkalija». Častku ź ich paśpieli pradać
Z Łondana Mielnikava vylecieła na Šry-Łanku, u jaje byŭ kachanak spartovaha vyhladu ź Biełarusi22
Kamientary