Były dyrektar FBR apublikavaŭ fota rakušak, vykładzienych u formie ličby 8647. Jaho abvinavačvajuć u zakliku zabić Trampa
Džejms Komi vydaliŭ dopis i zajaviŭ, što nijakaha padtekstu tam nie było. Ale amierykanskija pravaachoŭniki pačali rasśledavańnie.
Były dyrektar FBR Džejms Komi apublikavaŭ fatahrafiju z rakuškami, jakija vykładzieny ŭ formie liku «8647». Jaho adrazu ž abvinavacili ŭ zaklikach da zabojstva prezidenta Donalda Trampa. Pravaachoŭniki pačali rasśledavańnie.
Komi, jakoha Tramp zvolniŭ u 2017 hodzie, paźniej vydaliŭ publikacyju, zajaviŭšy, što nie viedaŭ ab mahčymaj suviazi hetaha paviedamleńnia z hvałtam. Ale ŭ asiarodździ prychilnikaŭ Trampa padniałasia chvala abureńnia, piša Reuters.
Komi apublikavaŭ u instahramie fatahrafiju z rakušak, vykładzienych u formie liku 8647, z podpisam: «Pryhožaja kampazicyja z rakavin padčas majoj prahułki pa plažy».
Na amierykanskim žarhonie 86 moža vykarystoŭvacca jak dziejasłoŭ, jaki aznačaje «vyhnać kaho-niebudź z bara za pjanstva abo parušeńnie paradku», a lik 47 byccam by źjaŭlajecca adsyłkaj da Trampa jak da 47-ha prezidenta. Niekatoryja prychilniki Trampa interpretavali paviedamleńnie jak zaklik da hvałtoŭnaha adstaranieńnia Trampa ad ułady, uklučajučy zabojstva.
Słoŭnik Merriam-Webster ukazvaje, što adnym z apošnich značeńniaŭ słova «86» stała «zabić», adnak słoŭnik nie ŭklučaje heta značeńnie aficyjna «z-za jaho adnosnaj navizny i redkaści vykarystańnia».
Sakretnaja słužba ZŠA, adkaznaja za achovu prezidenta, zajaviła, što viedaje ab publikacyi Komi, ale nie dała joj kankretnaj acenki.
«Sakretnaja słužba staranna rasśleduje ŭsio, što moža być ŭspryniata jak patencyjnaja pahroza ŭ adras achoŭvajemych asob. My infarmavanyja ab pastach byłoha dyrektara FBR u sacsietkach i adnosimsia da padobnaj rytoryki vielmi surjozna. Adnak my nie kamientujem pytańni, źviazanyja z achoŭnaj raźviedkaj», — zajaviŭ pradstaŭnik słužby Entani Hułjelmi.
Kiraŭnik Ministerstva ŭnutranaj biaśpieki ZŠA Kryści Noem, viedamstva jakoj kuryruje Sakretnuju słužbu, napisała ŭ X, što Departamient i Sakretnaja słužba «raśledujuć hetuju pahrozu i adreahujuć adpaviedna».
Dyrektar FBR Keš Pateł taksama paviedamiŭ u X, što jaho viedamstva znachodzicca ŭ kantakcie z Sakretnaj słužbaj nakont publikacyi i «pradastavić usiu nieabchodnuju padtrymku».
Niekatoryja prakamientavali situacyju bolš adnaznačna, abvinavaciŭšy Komi ŭ złych namierach. Namieśnik kiraŭnika administracyi Biełaha doma Den Skvino zajaviŭ, što dopis źjaŭlajecca zaklikam da zabojstva Trampa.
Paśla abureńnia z boku prychilnikaŭ Trampa Komi vydaliŭ publikacyju.
«Ja dumaŭ, što heta prosta palityčnaje vykazvańnie. Nie viedaŭ, što chto-niebudź asacyjuje hetyja ličby z hvałtam. Mnie heta navat u hałavu nie prychodziła. Ale ja suprać luboha hvałtu, tamu vydaliŭ post», — rastłumačyŭ Komi.
U mai 2017 hoda, u pačatku svajho pieršaha termina, Donald Tramp zvolniŭ Komi, jaki ŭ toj čas uznačalvaŭ rasśledavańnie mahčymaj zmovy pamiž pieradvybarčnym štabam Trampa i Rasijaj u 2016 hodzie.
Kamientary