Arcybiskup Tadevuš Kandrusievič raskazaŭ, jak pracavaŭ razam z budučym Papam Lvom XIV
Biełaruski ijerarch u intervju jutub-kanału Radyjo Maryja raskazaŭ i pra toje, jak budučy Papa paspryjaŭ pryznačeńniu dvuch biełaruskich biskupaŭ.
Tadevuš Kandrusievič aceńvaje vysoka Papu Lva XIV (Robiert Prevo) jak intelektuała i navukoŭca, a taksama raskazaŭ jak pracavaŭ razam ź im na Sinodzie biskupaŭ u Vatykanie ŭ 2012 hodzie, pryśviečanym pytańniam jevanhielizacyi.
U tym sinodzie brali ŭdzieł kala 250-300 biskupaŭ, a Robiert Prevo ŭ jakaści hienierała ordena aŭhustyjancaŭ. Adnak u ramkach sinoda było niekalki pracoŭnych hrup, i arcybiskup Kandrusievič, i Robiert Prevo trapili ŭ adnu hrupu.
«Ciaham usiaho miesiaca my časta sustrakalisia ŭ pracoŭnaj hrupie. «Ja ŭbačyŭ im čałavieka, jaki byŭ vielmi ścipły, jon nie kazaŭ, hladzicie, ja hienierał, jon bolš słuchaŭ, čym kazaŭ. Ale kali pramaŭlaŭ, to pramaŭlaŭ vielmi kankretna», — raskazaŭ biełaruski ijerarch.
U studzieni 2023 hoda Papa Francišak pryznačyŭ Robierta Prevo prefiektam Dykasteryi pa spravach biskupaŭ.
«Jakaja jaje dziejnaść? Jana padbiraje kandydataŭ u biskupy. Prychodzić infarmacyja ź jakoj-niebudź krainy, stavicca pytańnie, što pavinien adzin i druhi biskup, jany vyvučajuć — hodny čałaviek ci nie, i potym try kandydatury padajecca dla Papy.
To-bok vychodzić, što našy sučasnyja biskupy — Uładzimir Hulaj i Adrej Znoska — prajšli praz sučasnaha Papu. Faktyčna jon dakranuŭsia da hetaha. Naturalna, što naminacyja była ad Papy Franciška, ale Robiert Prevo padrychtavaŭ nieabchodnyja dakumienty», — raskazaŭ Tadevuš Kandrusievič.
Taksama Tadevuš Kandrusievič pažartavaŭ, što kiraŭnictva biełaruskaha kaścioła, jak daznałasia, što novym Papam byŭ abrany Robiert Prevo, to išło ŭ zakład, jakoje sabie imia abiare novy pantyfik.
«Imia Leŭ — vielmi hodnaje i znakavaje», — skazaŭ Tadevuš Kandrusievič, adznačyŭšy, što jaho znajomy vatykanski žurnalist amierykanskaha pachodžańnia pierad vybarami napisaŭ jamu, što ŭpeŭnieny, što Papam abiaruć mienavita Prevo.
Intranizacyja (aficyjnaje ŭstupleńnie na pasadu) Papy Lva XIV projdzie zaŭtra, u niadzielu.
Ciapier čytajuć
Što viadoma pra viciebčuka, jakoha vinavaciać u sprobie padryvu samalota ŭ Hiermanii1
Kamientary
[Zredahavana]