«Za 30 chvilin — 30 jeŭra»: ajcišnik sa stažam 25 hadoŭ navučyŭsia kłaści plitku, pakul šukaje pracu

Za plačyma ŭ Andreja — bolš za 25 hadoŭ dośviedu ŭ halinie dyzajnu, uklučajučy vizualny, pramysłovy i UI/UX. Akramia taho, jon zajmajecca vyrabam muzyčnych instrumientaŭ i nie tak daŭno vyrašyŭ navučycca kłaści plitku ŭ ramkach «dyviersifikacyi» svaich umieńniaŭ. 

Pačytajcie intervju, kab daviedacca, čym plitačnictva lepšaje za IT i čamu nie varta pracavać u kampanii, dzie z taboj pravodzić sumoŭje mieniedžar, u jakoha vyharańnie.

Trochi ab pracoŭnym bekhraŭndzie

— Ja Head of Design, a taksama dyrektar pa pradukcie. Čatyry hady tamu zasnavaŭ svajo pradpryjemstva i, pačynajučy z 2020-ha, pracavaŭ nad zapuskam bolš za 26 svaich praduktaŭ roznaj skiravanaści.

Kali ž kazać nie pra IT, to z 2001 hoda ja rablu muzyčnyja instrumienty, heta majo prafiesijnaje chobi. Letaś staŭ narodnym majstram: jeździŭ u Biełaruś mianiać pašpart, nu i zaadno ŭstupiŭ u Biełaruski sajuz majstroŭ narodnaj tvorčaści.

Rabić muzyčnyja instrumienty — vielmi vuzkaja niša. Ja pieršapačatkova zajmaŭsia kastamam, bo nie bačyŭ sensu rabić toje, što možna nabyć u kramie. Pracavaŭ nad elektrahitarami, potym pačaŭ zajmacca akustyčnymi instrumientami, i zatym — rabić narodnyja i histaryčnyja instrumienty. Nie skažu, što heta pryniesła niejki finansavy pośpiech.

Ale ja zaŭsiody rabiŭ toje, što mnie padabajecca, i ŭ mianie zaŭsiody byŭ svoj nišavy klijent. Naprykład, adzin z maich pastajannych klijentaŭ — Nine Treasures, jakija letaś stali samym papularnym mietał-hurtam Kitaja. Za ŭvieś čas ja zrabiŭ dla ich dźvie bałałajki i dva toŭšury, pryčym toŭšur pryjšłosia vyrablać, navat ni razu nie bačyŭšy hety instrumient užyvuju, tolki pa fota z pamierami.

Paźniej frantmen skazaŭ: «Viedaješ, ty adziny čałaviek u śviecie, jaki zrabiŭ nam toje, što my chočam». Heta było vielmi pryjemna. Ale znoŭ ža, heta takaja vuzkaja niša, i jana naohuł nie pra hrošy.

Jak pierastaŭ pracavać u najmie i čamu potym vyrašyŭ tudy viarnucca

Ja pierajechaŭ u Polšču viasnoj 2021-ha, ale pačaŭ rabić svaje prajekty jašče raniej, u 2020-m, paralelna z pracaj u najmie. Ja vielmi šmat mientaryŭ i ŭ adzinočku zapuściŭ takuju štuku, jak navučalnyja prajekty dla ludziej, jakija chočuć pavysić svaju kvalifikacyju, pieraprafilavacca abo atrymać novyja navyki. Za try hady praz prajekty prajšło bolš za tysiaču čałaviek. 

Usio heta z časam pierarasło ŭ maje ŭłasnyja pradukty. U kastryčniku 2022 hoda ja pierastaŭ pracavać u najmie. Tady maje prajekty byli na stadyi piłotnych viersij, naprykład, vialikaja sistema dla rekrutynhu, niekalki mabilnych hulniaŭ. I na toj momant ja całkam sfakusavaŭsia na vyvadzie svaich prajektaŭ na rynak. 

Heta było vielmi ciažka. Mnohija prajekty nie trapili ŭ rynak na stadyi pravierki hipotez i byli zakrytyja, letaś viasnoj ja zakryŭ adnu za adnoj dźvie hulni, bo jany taksama nie trapili ŭ rynak. Na hety momant zastałasia ekasistema SaaS praduktaŭ dla rekrutynhu, HR i partfolia kampanij. Reč u tym, što vialikija SaaS-pradukty treba vyvodzić na rynak hadami, plus atrymać na ich niejkija inviestycyi amal nierealna.

Ja byŭ siabram zakrytaha kłuba faŭndaraŭ u Varšavie; chadziŭ na šmat iventaŭ dla startapaŭ, jeździŭ pa kanfierencyjach, kamunikavaŭ ź vienčurnymi kapitalistami. I zrazumieŭ: niedastatkova mieć dobraje razumieńnie biznesu abo pradukt na rukach, kab tabie zachacieli dać hrošaj. 

Dla atrymańnia inviestycyj nietvork i asabistyja suviazi faŭndaraŭ važniejšyja za pradukt. Kab atrymać inviestycyi na stadyi idei, treba mieć dostup da kołaŭ ludziej z hrašyma. U inšym vypadku treba mieć hatovy pradukt, jaki ŭžo zarablaje.

Praź niekatory čas ja zrazumieŭ, što treba viartacca ŭ najom. U pasiŭnym režymie šukaŭ i hladzieŭ, kudy ruchajecca rynak pracy, i razumieŭ, što ŭsio stała składaniej. U apošni hod pieraklučyŭsia na aktyŭny režym pošuku pracy.

«Takoje ŭražańnie, što ciapierašni najom prosta złamany» 

Zrazumieła, što kali ty rabiŭ pradukt dla rekrutynhu, to dobra raźbiraješsia ŭ pracesie najmu. Akramia taho, na hety momant ja 8 hadoŭ adpracavaŭ dyrektaram, faŭndaram: i najmaŭ kamandy, i šukaŭ stažoraŭ. Za 4 hady tysiačy dźvie intervju pravioŭ, nie mienš.

I razumiejučy, jak heta ŭsio pracuje, ja hladžu na ciapierašni rynak i baču, što — ciažka. Źjaŭlajecca niejkaja vakansija — a praz paru hadzin na jaje ŭžo sotnia zajavak. U ciabie i tak davoli redkaja pazicyja, a tut jašče i vielmi šmat inšych pretendentaŭ.

Takoje ŭražańnie, što ciapierašni najom prosta złamany. Zaraz nabirajuć bolš pa soft-skiłach. Usio roŭna, na što ty hatovy i jakaja tvaja matyvacyja, važna — nakolki ty spadabaŭsia. I heta cikavy momant, tamu što pracu pa-raniejšamu kamuści treba rabić, i pracavać narmalna. Ale, na žal, heta nie zaŭsiody adbyvajecca.

U vyniku, pa majoj statystycy, u mianie dzieści paŭpracenta kanviersii ŭ skryninh (1 skryninh na 200 zajavak). Za apošnija dva hady było, moža, 10—12 sazvonaŭ. 

Pryčym byvaje tak, što prychodziš, niby ŭsio dobra, a potym pačynajucca dziŭnyja rečy. Dapuścim, hladziš na taho, chto ciabie intervjujuie, a tam čałaviek, jaki prosta vypaleny ŭ chłam. I ty razumieješ, što ŭ takim stanie być nie chočaš, ale ŭ hetaj kampanii budzieš. Tamu što mieniedžar-najmalnik u stadyi vypalenaści na intervju — heta markier pracy ŭ kampanii.

Kali kazać pra moj dośvied, ja ŭ kučy kampanij patušyŭ niamała pažaraŭ, zarabiŭ niervovyja zryvy, a zvyšprybytkaŭ na maim vieku nie było.

«Stres bolšaje, radaść žyćcia mienšaje» 

U vyniku ja bolš za dva hady šukaju pracu «ŭ najmie» i pakul nie znajšoŭ.

Ja nie marnatraŭca, ale tyja, chto žyvie ŭ Polščy, vydatna razumiejuć, kolki tam ciapier kaštuje arenda. Naturalna, kali hladziš na heta, stres bolšaje, radaść žyćcia mienšaje, i pačynaješ dumać, što možna jašče zrabić, jak dyviersifikavacca. 

Ja pahladzieŭ tutejšych vytvorcaŭ muzyčnych instrumientaŭ. Dumaŭ navat uładkavacca na vytvorčaść polskich hitar Mayones, ale z-za mytaŭ Trampa jany pakul nie płanujuć pašyracca.

Razhladaŭ ideju samomu vyrablać muzyčnyja instrumienty, ale ŭ kožnaj krainie svaje prykoły i nišy. Heta značyć, u Polščy mnie daviadziecca pačynać praktyčna z nula: budavać tut netvork, znajomicca ź miascovaj Akademijaj muzyki, adciskać kavałak rynku.

Plus muzyčnaja majsternia dosyć kapitałajomistaja. Kab zrabić muzyčny instrumient, treba viedać šmat vuzkich śpiecyjalnaściaŭ. I, naturalna, treba pamiaškańnie z asobnaj farbavalniaj, kab tam było abiaspylvańnie, stalarny, zboračny cech i h.d. A kali havorka pra elektrahitary, to jašče i asobna elektrykaj.

Ja na heta pahladzieŭ i zrazumieŭ, što ciažka. Mnie spatrebicca dzieści paru hadoŭ, kab pryjści da raniejšaha abjomu zakazaŭ. Ale stolki času i hrošaj u mianie niama.

«U ramoncie nijakaha adžajła być nie moža» 

Ja pačaŭ dumać, što b jašče moh zrabić. Pahladzieŭ na zrez rynku i zrazumieŭ, što, umoŭna, budaŭnik patrebny ŭsiudy. Vyrašyŭ spynicca na plitačniku.

Čamu plitka, a nie, naprykład, elektryk? Bo pa elektrycy ŭ roznych krainach roznyja standarty. A voś plitačnik — davoli ŭniviersalnaja štuka. Plitka dla azdobnaj pracy plus-minus usiudy adnolkavaja ŭ zaležnaści ad klimatyčnaj zony. Tak, jość niejkija niuansy pa materyjałach, ale nie bolš za toje.

Adpaviedna, ja pačaŭ hladzieć u hety bok, bo, pa sutnaści, ź nišy IT my vychodzim na nišu, kali luby čałaviek robić u siabie doma ramont. Pryčym ty prosta pryjšoŭ, zrabiŭ, atrymaŭ hrošy i žyvieš dalej: nie dumaješ, što tvoj pradukt nie dajšoŭ da rynku abo što ŭ ciabie NDA na 10 hadoŭ.

U IT vielmi vysoki ŭzrovień frustracyi, tamu što ludzi nie bačać adčuvalnaha vyniku taho, što jany zrabili. Kali ty pracuješ sumlenna, tabie važna ŭbačyć, što heta sapraŭdy dobra i važna. A ŭ IT časta vychodzić, što ty zrabiŭ, a potym vynik tvajoj pracy vykinuli na pamyjku. Ci ty prosta nie ŭbačyŭ vyniku, i ŭ ciabie pryčynna-śledčaja suviaź parušajecca. 

Što, kali zamoŭca skaža, što plitku pakłali drenna?

Heta ŭžo pra padychod. Kali pravieści anałohiju z aŭtsorsam, to ŭ IT Sales Manager niešta tam pradaść, i potym heta stanovicca prablemaj kamandy, jak jana budzie heta razrulvać. A ŭ ramoncie nijakaha adžajłu być nie moža. Zakazčyk sam kuplaje plitku, a tvaja zona adkaznaści — pakłaści jaje pa prajekcie. 

Heta značyć, zrazumieła, što moža być adznaka «padabajecca-nie padabajecca», ale plitku ž nie plitačnik vybiraje. Jość abjektyŭnyja krytery jakaści nakštałt kuta nachiłu, roŭnaj pavierchni, ci jość fizičnyja defiekty i hetak dalej. Pa sutnaści, kryteryjaŭ našmat mienš, čym u ajcišcy, dzie zamoŭca moža prosta pryjści nie ŭ humory, i ŭsio, ty staŭ drenny.

«Popyt na pasłuhi budaŭnikoŭ našmat pieravyšaje prapanovu» 

Viadoma, u hetaj śfiery mnie taksama pryjdziecca napracoŭvać bazu klijentaŭ. Ale tut jość adzin važny niuans: popyt na pasłuhi budaŭnikoŭ našmat pieravyšaje prapanovu.

U pryncypie, možna navat nie brać vialikija abjomy. Na drobnyja zakazy popyt našmat vyšejšy. Bo daŭno pracujuć bryhady, na maleńkija abjekty nakštałt pakłaści kavałak plitki na kuchni navat nie pajeduć. Voś z hetaha i možna pačynać. 

Tak, ja pakul što vučusia. Ale kali padčas navučańnia ŭ IT ty paŭhoda-hod usio robiš biaspłatna, to tut ty i vučyšsia, i adrazu atrymlivaješ hrošy. Viadoma, kali ja čahości nie zmahu zrabić, to ja nie budu brać zamovu. Ale ŭ mianie ŭžo jość dośvied: kali ŭ ciabie svaja majsternia, ty ŭvieś čas niešta robiš, u tym liku farbuješ, štrobiš, špakluješ, kładzieš pravodku i hipsakardon.

U mianie ŭžo źjavilisia pieršyja zamovy. Naprykład, niadaŭna pakłaŭ kavałačak fartucha na ścianu, kudy lacieli pyrski. Atrymaŭ dzieści za 30 chvilin pracy 30 jeŭra. Dumaju, z časam źjaviacca i klijenty, i ludzi, ź jakimi možna budzie jeździć na abjekty i sabrać svaju bryhadu. 

Kali kazać pra majndset, to, viadoma, myśleńnie čałavieka ź dźviuma vyšejšymi adukacyjami vielmi mocna adroźnivajecca ad myśleńnia čałavieka, jaki skončyŭ budaŭničaje i ŭsio žyćcio pracuje na budoŭli. Ty prosta hladziš na ŭsio inakš i bačyš inšyja detali. Mahčyma, navat tyja, jakija na samaj spravie niavažnyja, i heta moža pieraškadžać. 

Mahčyma, u hetaj spravie patrebna niejkaja taŭstaskuraść, jakaja nie ŭłaścivaja šmatlikim vieteranam intelektualnaj pracy.

Paralelnyja pošuki pracy

Pakolki ja dyviersifikuju, to paralelna praciahvaju pracavać nad svaimi prajektami i šukać pracu ŭ najmie.

Naprykład, u zhadanym raniej pradukcie pra rekrutynhu my tolki-tolki vychodzim na płaciežazdolnych klijentaŭ. Dumaju, projdzie para hadoŭ, pierš čym my vyjdziem u nul. A ŭvieś hety čas treba niešta jeści i niejak žyć.

Tak što, kali ŭdasca znajści pracu ŭ najmie, ja budu rady. Ale kali nie ŭdasca, to praciahnu pracavać u toj bok, dzie jość mahčymaść ciapier zarabić hrošy. Nie źbirajusia prosta siadzieć jak pamirajučy lebiedź i čahości čakać.

• 8
• 0
• 2
• 0
• 0
• 0
• 0
• 0