Matrosa ŭ Rasii zavočna pryhavaryli da pažyćciovaha źniavoleńnia za padpał karabla
Bałtyjski fłocki vajskovy sud zavočna pryhavaryŭ matrosa Alaksandra Cierachova da pažyćciovaha pazbaŭleńnia voli za padpał małoha rakietnaha karabla «Sierpuchaŭ» pa zamovie Ukrainy, paviedamlaje Rasijskaja słužba Radyjo Svaboda.
Były rasijski vajskoviec pryznany vinavatym u dziaržaŭnaj zdradzie, ździajśnieńni dyviersii, deziercirstvie i niezakonnym pierasiačeńni miažy. Sud pazbaviŭ jaho zvańnia staršyny. U krasaviku 2024 hoda Cierachaŭ, jaki słužyŭ na karabli Bałtyjskaha fłotu, vyrašyŭ ustupić va ŭkrainskaje padraździaleńnie «Lehijon Svaboda Rasii»
Jak havorycca ŭ paviedamleńni prakuratury, kuratary lehijona z ukrainskaj vajskovaj raźviedki prapanavali vajskoŭcu ździejśnić dyviersiju i pierasiekčy miažu.
Jon vyrabiŭ zapalvalnuju pryładu z hadzińnikavym miechanizmam, pakinuŭ jaje ŭ rubcy i ŭciok u Litvu, zabraŭšy z saboj sudnavyja dakumienty. Pačaŭsia pažar, padčas tušeńnia jakoha paciarpieŭ adzin vajskoviec, straty skłali 56 miljonaŭ rasijskich rubloŭ (707 tysiač dalaraŭ).
Jak zajaŭlała na pačatku lipienia 2024 hoda ŭkrainskaja raźviedka, u vyniku dyviersii rubka karabla była źniščanaja, byli źniščanyja srodki suviazi i aŭtamatyzacyi. 28 lipienia karabiel udzielničaŭ u marskim paradzie ŭ Sankt-Pieciarburhu.
Mały rakietny karabiel «Sierpuchaŭ» byŭ spuščany na vadu ŭ 2015 hodzie na zavodzie ŭ Sievastopali. Spačatku jon byŭ uklučany ŭ skład rasijskaha Čarnamorskaha fłotu i ŭdzielničaŭ u vajnie ŭ Siryi. Jon pabudavany pa prajekcie 21631 «Bujan-M», uzbrojeny rakietami «Kalibr» abo «Oniks», zienitna-rakietnymi kompleksami i artyleryjskaj ustanoŭkaj. Ekipaž karabla — 36 čałaviek.
Kamientary