Taksama častkova budzie abmiežavany ŭjezd hramadzianam siami krain.
Prezident ZŠA Donald Tramp padpisaŭ ukaz ab zabaronie na ŭjezd u ZŠA hramadzianam 12 krain Azii, Afryki i Łacinskaj Amieryki i ab abmiežavańniach na ŭjezd hramadzianam jašče siami krain, piša Bi-bi-si.
Ujezd u ZŠA zabaronieny hramadzianam Afhanistana, Mjanmy, Čada, Respubliki Konha, Ekvataryjalnaj Hviniei, Erytrei, Haici, Irana, Livii, Samali, Sudana i Jemiena.
Zabarona ŭstupić u siłu z 9 červienia.
Častkova abmiežavany ŭjezd u ZŠA hramadzianam Burundzi, Kuby, Łaosa, Śjera-Leone, Toha, Vieniesueły i Turkmienistana.
U videazvarocie z nahody padpisańnia ŭkaza Donald Tramp skazaŭ, što mnohija zamiežniki, jakija pryjazdžajuć u ZŠA z krain, dzie nielha jak śled pravieryć chadajnika ab vizie, a taksama tyja, chto žyvuć u ZŠA z praterminavanaj vizaj, ujaŭlajuć pahrozu dla krainy.
«U XXI stahodździ my bačyli terakt za teraktam, učynieny zamiežnikami z praterminavanymi vizami, ź niebiaśpiečnych miescaŭ z usiaho śvietu», — skazaŭ Tramp.
Pavodle słoŭ Trampa, u pieršy ž dzień svajho novaha prezidenckaha terminu jon daručyŭ dziaržsakrataru praanalizavać, jakija rehijony ŭjaŭlajuć u hetym sensie najbolšuju pahrozu dla ZŠA i da jakich treba ŭvieści abmiežavańni.
«Usio vielmi prosta: my nie možam dapuskać svabodnuju mihracyju z krain, dzie my nie možam upeŭniena i dakładna pravieryć tych, chto choča ŭjechać u Złučanyja Štaty», — patłumačyŭ Tramp.
Prezident paabiacaŭ, što čorny śpis budzie pierahladacca: kali ŭ niejkich krainach situacyja palepšycca, abmiežavańni buduć źmiakčanyja, i naadvarot — u śpis mohuć być dadadzieny novyja dziaržavy.
Donald Tramp uvodziŭ zabaronu na ŭjezd hramadzianam niekatorych krain jašče padčas svajho pieršaha terminu — heta było adno ź pieršych jaho rašeńniaŭ na prezidenckaj pasadzie ŭ 2017 hodzie.
Tady Tramp admoviŭ u pravie pierasiakać miažu ZŠA hramadzianam Livii, Siryi, Jemiena i Samali. Paźniej u śpis dadali Paŭnočnuju Kareju, Vieniesuełu i Čad.
Hetaja zabarona šmat razoŭ asprečvałasia ŭ sudach, madyfikavałasia, ale ŭ vyniku ŭstajała — Viarchoŭny sud ZŠA bolšaściu ŭ adzin hołas pryznaŭ jaje adpaviednaj Kanstytucyi.
Karespandent ahienctva Reuters u Biełym domie Džief Mejsan skazaŭ Bi-bi-si, što administracyja Trampa raniej kazała, što pracuje nad ukazam ab zabaronie na ŭjezd dla hramadzian roznych krain, i tamu padpisańnie nie stała niečakanaściu.
«Pytańnie ŭ tym, ci ŭstaić jon u sudach», — Mejsan upeŭnieny, što iski abaviazkova buduć, jak i ŭ vypadku z ukazam 2017 hoda.
Ciapier čytajuć
«Ja naviedaŭ samuju izalavanuju krainu Jeŭropy». Amierykanski błohier raskazaŭ, jak pryjazdžaŭ u Biełaruś u 2020-m i 2024-m4
Kamientary