Biełaruskaja kampanija Regula, suśvietny lidar u halinie pryboraŭ pa praviercy banknot i dakumientaŭ, razhortvaje svoj polski biznes
Regula naroščvaje prysutnaść na polskim rynku, a adzin ź jaje zasnavalnikaŭ — aktyvy ŭ Łatvii, piša ekanamičny ahladalnik Vadzim Siachovič.
Amal na tracinu ŭ paraŭnańni z 2023 hodam (z 5,8 młn da 8,1 młn złotych) vyrasła letaś vyručka kampanii Regula Poland. Jana była zarehistravanaja ŭ Varšavie ŭ 2022 hodzie. I heta — samy małady ofis adnaho z najbujniejšych u śviecie vytvorcaŭ veryfikacyjnych pryboraŭ Hrupy kampanij Regula.
60% Regula Poland na roŭnych vałodajuć zasnavalniki hrupy (stvoranaja ŭ 1992 hodzie ŭ Minsku) Ivan Šumski i Juryj Rahažynski. Ich partniory pa polskim biznesie — Dzianis Turkoŭ i Ihar Klaščoŭ. U vydzieleny ŭ 2020-ch zachodni siehmient biznesu Ivana Šumskaha i Juryja Rahažynskaha taksama ŭvachodzić vytvorčaja placoŭka Regula Baltija ŭ Daŭhaŭpiłsie ŭ Łatvii (stvoranaja ŭ 2005 hodzie jak zboračnaje pradpryjemstva dla zachodnich rynkaŭ) i dystrybutarskija kampanii ŭ ZŠA, Hiermanii, Niderłandach i Brazilii.
Jak źviarnuŭ uvahu Siachovič, u kancy 2024 hoda, staŭšy rezidentam Izraila, Ivan Šumski davioŭ svaju dolu ŭ daŭhaŭpiłskaj kampanii Regula Baltija da kantrolnaj. Jamu naležyć u joj užo 61,42%.
U raniej usiudy raŭnapraŭnaha partniora Juryja Rahažynskaha dola ŭ łatvijskaj firmie skaraciłasia da 18,57%. Astatnim pakietam vałodajuć rezidenty Łatvii Alena, Karyna i Emilija Jaŭnziemie.
U Biełarusi ŭsio jašče dziejničajuć jurydyčnyja asoby (pry nie pracujučym sajcie) kampanii «NPP Rehuła» i «Rehuła».
U Rasii Regula Baltija vyjšła z saŭładalnikaŭ byłoj daččynaj kampanii «Rehuła-Ruś» u 2022 hodzie — jašče da pačatku ŭvarvańnia rasijskich vojskaŭ va Ukrainu.
Novyja ŭłaśniki «Rehuła-Ruś» nie raskryvajucca. Ale maskoŭskaja firma praciahvaje pracavać pad hetaj nazvaj pad kiraŭnictvam miascovaha byłoha partniora Šumskaha i Rahažynskaha Leanida Hapotčanki. Pavodle vynikaŭ 2024 hoda, dachod «Rehuła-Ruś» vyras na 42,23% i ŭ ekvivalencie skłaŭ 1,25 miljona dołaraŭ.
Kamientary