Minzdaroŭja zabaraniła vykarystoŭvać niekatoryja BADy rasijskaj vytvorčaści
Ministerstva achovy zdaroŭja Biełarusi zabaraniła vykarystańnie vaśmi bijałahična aktyŭnych dabavak rasijskaj vytvorčaści z-za parušeńniaŭ patrabavańniaŭ biaśpieki. Parušeńni vyjavili padčas dziaržaŭnaha sanitarnaha nahladu za abaračeńniem BADaŭ.
Jak paviedamili ŭ viedamstvie, dabaŭki vytvorcy TAA «Saplemient Hrup» źmiaščali značnaje pieravyšeńnie dapuščalnych sutačnych doz vitaminaŭ i inšych aktyŭnych rečyvaŭ. U niekatorych vypadkach normy byli pieravyšanyja ŭ dziasiatki i navat bolš jak u sto razoŭ.
Naprykład, u asobnych BADach utrymańnie vitaminu D3, vitaminu B12, niacynamidu, kafieinu, astaksantynu i reśvieratrołu značna vychodziła za miežy, dazvolenyja zakanadaŭstvam.
Pastanovaj hałoŭnaha dziaržaŭnaha sanitarnaha doktara Biełarusi ad 20 śniežnia 2025 hoda zabaronienyja ŭvoz, zachoŭvańnie, pieravozka i vykarystańnie hetych praduktaŭ na terytoryi krainy.
U Minzdaroŭja padkreślili, što bieskantrolny pryjom bijałahična aktyŭnych dabavak moža pryvieści da surjoznych prablem sa zdaroŭjem — ad lohkich pabočnych reakcyj da ciažkich paražeńniaŭ unutranych orhanaŭ. U suviazi z hetym hramadzian zaklikali pierad užyvańniem BADaŭ abaviazkova kansultavacca ź miedycynskimi śpiecyjalistami.
Kamientary