Viadomy ajcišnik adkryŭ kampaniju ŭ Polščy. Šeść bankaŭ adchilili zajaŭku na rachunak
Z Polščy prychodzić niamała historyj pra prablemy biełarusaŭ ź miascovymi bankami. Hieroj hetaha kiejsa — faŭndar Vochi, biznes-anioł Ilja Lasun, jaki ciapier žyvie ŭ Varšavie.
Ilja z žonkaj vyrašyli zarehistravać kampaniju, kab arhanizavać inviestycyjnuju dziejnaść u Polščy. Pavodle jaho słoŭ, zrabić heta było vielmi lohka. Prablemy pačalisia paźniej, kali jany zachacieli adkryć biznes-rachunak — šeść bankaŭ adchilili ich zajaŭku, piša Devby.io.
«Niekatoryja ź ich kazali, što my mihranty, niekatoryja ničoha nie kazali. Ja nie comprenda, jak heta mahčyma ŭ Jeŭropie», — napisaŭ Ilja ŭ LinkedIn.
Jon taksama zadajecca pytańniem: «Kali ja kali-niebudź vyrašu zapuścić novy startap u Polščy (50% šancu, što tak i budzie) i najmu šmat ludziej, jak ja budu im płacić? Jak ja budu płacić padatki?».
Post sabraŭ bolš za 40 spačuvalnych kamientaryjaŭ — nie tolki ad biełarusaŭ, ale i ad polskich inviestaraŭ. Ahulnaje mierkavańnie — «absalutna aburalna».
Mnohija ŭ kamientaryjach padzialilisia padobnymi historyjami, a roznyja ludzi raili źviarnucca ŭ mBank, PKO, Santander abo Millenium, jakija nibyta bolš łajalnyja (jak byccam aŭtar moh prapuścić usie hetyja banki). Chtości raiŭ pasprabavać nieabanki Revolut i Wise, chtości prapanoŭvaŭ radykalnaje rašeńnie — znajści kaŭfaŭndara z «mocnym pašpartam», a chtości raiŭ adkryć kampaniju na Kipry.
Čałaviek z amierykanskim hramadzianstvam ździŭlajecca i dzielicca svaim dośviedam: maŭlaŭ, jon, taksama imihrant, adkryŭ až try kampanii ŭ Polščy — jakija mohuć być prablemy z rachunkam?
«Tut (jak i ŭ ES u cełym) banki funkcyjanujuć jak padraździaleńnie pravaachoŭnych orhanaŭ, śpiecsłužbaŭ, padatkovaj, palityčnych partyj i h. d. Vaš rachunak pastajanna kantralujecca, štučny intelekt adznačaje aktyŭnaść, bankaŭskija supracoŭniki i roznyja ahienctvy ručna praviarajuć jaho, a vašyja srodki mohuć być zamarožanyja (ci navat aryštavanyja) pa lubym zapycie padatkovaj inśpiekcyi, biez mahčymaści abskardžańnia.
Bankaŭskaj tajamnicy nie isnuje, pryvatnaść danych — heta mif, a pravy ŭłasnaści — prosta pakazucha», — piša jašče adzin imihrant, data-architektar z Krakava.
Inšy, miarkujučy pa ŭsim, biełarus z polskim hramadzianstvam «suciašaje», što navat polski pašpart nie ratuje ad prablem: sistema moža zreahavać zabaronaj na miesca naradžeńnia ŭ Biełarusi. Jamu paŭtaraje startapier-palak: «Navat budučy palakam u Polščy, mnie davodzicca atrymlivać dziŭnaje paćvierdžańnie ad nataryusa, kab adkryć bankaŭski rachunak dla kampanii».
Z sumnaj historyjaj u kamientary pryjšoŭ biełarus Słava Mazaj: praz try miesiacy paśla adkryćcia biźnies-rachunku bank prosta zakryŭ jaho i vydaŭ hrošy najaŭnymi biez tłumačeńnia pryčyn.
Niekatoryja ŭdzielniki supolnaści prapanujuć aŭtaru pasta napisać im u asabistyja paviedamleńni, namiakajučy na pryvatnuju dapamohu, inšyja prosta spačuvajuć.
Jašče adzin kamientatar, uładalnik rasijskaha pašparta, raić adstojvać svaje pravy:
«Pasprabujcie pisać listy-skarhi ab parušeńniach vašych pravoŭ u štab-kvateru banka. Ja jašče pryhraziŭ adpraŭkaj skarhi va ŭsie nahladnyja orhany Polščy i Jeŭrasajuza. Mnie adrazu ž adkazali z bankaŭ, što heta prosta pamyłki na miescach i, viadoma ž, usio mnie adkryjuć. Ale pakul išli adkazy, ja ŭžo paśpieŭ adkryć rachunak u PKO. Tam pytańniaŭ nie było».
Praŭda, z kantekstu nie vielmi zrazumieła, išła havorka pra rachunak fizasoby ci biznes-akaŭnt (heta zusim roznyja historyi — fizasobie adkryć rachunak značna praściej, čym kampanii).
U cełym kolkaść nieabyjakavych vodhukaŭ jašče raz paćviardžaje: viadzieńnie biźniesu ŭ Polščy dla hramadzian Biełarusi moža być źviazana z fundamientalnymi prablemami.
Ciapier čytajuć
Na abiedzie Łukašenki i Si Czińpina prysutničała i adzinaja dačka kitajskaha lidara11
Kamientary