U Jeŭrasajuzie patrabujuć pakarać Biełaruś i Rasiju za pieraškody spadarožnikavaj navihacyi
13 krain Jeŭrapiejskaha Sajuza, u tym liku Litva, Łatvija, Estonija, Hiermanija i inšyja, zaklikali Jeŭrakamisiju terminova pryniać miery ŭ adkaz na pieraškody ŭ pracy spadarožnikavaj navihacyi (GNSS), jakija, pavodle ich, pachodziać z terytoryj Rasii i Biełarusi. Inicyjatyvu ŭznačaliŭ ministr transpartu Litvy Eŭhienijus Sabucis.
U supolnym zvarocie ministry adznačajuć, što havorka idzie nie pra vypadkovyja zboi, a pra śviadomyja hibrydnyja ataki, jakija pahražajuć važnym halinam — transpartu, enierhietycy i suviazi. Asabliva niebiaśpiečnyja jany dla avijacyi i sudnachodstva.
Ministry prapanujuć:
- uzmacnić kantrol nad radyjosihnałami;
- palepšyć kaardynacyju pamiž cyvilnymi i vajskovymi strukturami;
- chutčej uparadkavać i pašyryć abaronienyja funkcyi sistemy «Galileo»;
- madernizavać tradycyjnuju navihacyjnuju infrastrukturu.
Akramia techničnych mier, jany zaklikajuć uzmacnić dypłamatyčny cisk i razhladać mahčymaść jurydyčnaj adkaznaści dla tych, chto staić za pieraškodami.
Prablema z navihacyjaj u bałtyjskim rehijonie nazirajecca z 2022 hoda i stała adnoj z hałoŭnych tem niadaŭniaj sustrečy Rady ES u Luksiemburhu.
ŚMI nieadnarazova paviedamlali pra zboi GPS u krainach, što miažujuć z Rasijaj i Biełaruśsiu, pryčynaj jakich nazyvajuć dziejnaść rasijskich sistem radyjoelektronnaj baraćby ŭ Kalininhradskaj vobłaści.
Kamientary