Čamu ŭłady maŭčać pra pryčyny razbureńnia doma ŭ Homieli i jakija jość viersii
Praz amal miesiac paśla vybuchu ŭ šmatkvaternym domie pa vulicy Kosarava, 3 u Homieli ŭłady i śledčyja orhany praciahvajuć maŭčać adnosna kankretnych pryčyn incydentu. Hamielčukam abstaviny vybuchu zdalisia dziŭnymi, a adkazy čynoŭnikaŭ i śpiecsłužbaŭ — niepierakanaŭčymi. «Fłahštok» pierahledzieŭ usie dastupnyja fotamateryjały, kab znajści, dzie ŭłady zamaŭčali važnuju infarmacyju. «Naša Niva» asprečvaje niekatoryja kanśpirałahičnyja śćviardžeńni i ŭdakładniaje łohiku razbureńniaŭ.
Udzień 17 śniežnia 2025 hoda ŭ domie №3 na homielskaj vulicy Kosarava prahučaŭ vybuch takoj siły, što reštki akonnych błokaŭ i vazony vylecieli z voknaŭ, jakija vychodziać na dvor, na niekalki dziasiatkaŭ mietraŭ, pakinuŭšy navat ślady na hłuchim tarcy susiedniaha doma №5.
U vyniku vybuchu zahinuła pažyłaja žycharka kvatery №103 na 6‑m paviersie i daviałosia častkova raźbirać piać pavierchaŭ treciaha padjezda.
Dla pačatku varta paŭtaryć najbolš papularnyja pytańni hamielčukoŭ u sacietkach:
- Čamu niama infarmacyi pra zaviadzieńnie kryminalnaj spravy i nazvy artykuła KK?
- Čamu niama źviestak pra abstaviny katastrofy — chto papiarednie vinavaty ŭ častkovym razbureńni doma z hibiellu čałavieka?
Ahučanaja ŭładami pryčyna «vybuch hazapavietranaj sumiesi» vyklikaje sumnievy. Paśla vybuchu nie było maštabnych pravierak. A dźvie krynicy ŭ MNS Homiela paviedamili «Fłahštoku» na ŭmovach ananimnaści, što na naradach pryčyny rezanansnaj nadzvyčajnaj situacyi na Kosarava nie aśviatlalisia i nie raźbiralisia, jak byvaje ŭ takich vypadkach.
Epicentr vybuchu — kuchnia kvatery, jakuju nie pakazali
Možna razhledzieć dastupnyja fota i videa epicentra vybuchu. Isnuje adzinaje videa zdymkaŭ kuchni na 7‑m paviersie. Heta videa MNS. Na im kidajecca ŭ vočy nie paškodžanaja kuchonnaja mebla i vyniesienaja šyrokaja akonnaja šyba, śladoŭ sažy pamiaškańnie nie maje.
Pravierka, praviedzienaja «Fłahštokam», pakazała, što na fota kuchnia adnapakajovaj kvatery №108, jakaja nie źjaŭlałasia epicentram vybuchu. Heta akno raźmieščana z boku padjezda žyłoha doma.
Śladoŭ vybuchu ŭ hetaj kvatery niemahčyma było zaŭvažyć i pry razbory paškodžanych plit. Kvatera №108 nie maje dačynieńnia da vybuchu, jaje haspadary — paciarpiełyja.
Na toje, što epicentr vybuchu znachodziŭsia ź inšaha boku, z dvara žyłoha doma, śviedčyć karcina razbureńniaŭ. Mienavita z hetaha boku raźlot abłomkaŭ byŭ samy intensiŭny. I z hetaha boku paškodžanaja bolšaść voknaŭ i vyniesieny ekran łodžyi.
Najbolšyja paškodžańni skancentravanyja vakoł kvatery №107.
Kuchnia dvuchpakajovaj kvatery №107 z boku dvara doma maje ślady tempieraturnaha ŭździejańnia: čornaja stol i interjer bačnyja praz kuchonnaje akno na kadrach tyktok-błohiera Viasna. Fota i videa z hetaha pamiaškańnia nikoli nie publikavalisia.
Čamu ŭłady schavali vyhlad najbolš paciarpiełaha pamiaškańnia?
Na dumku «Fłahštoka», śpiecsłužby vyrazali frahmient ściany pry dapamozie dyskavaj pryłady. Vypiłavany ŭ vierchniaj častcy akonnaha prajoma sapraŭdy bačny na kadrach ad 29 śniežnia 2025 hoda; na bolš rańnich zdymkach, zroblenych adrazu paśla vybuchu, śladoŭ raśpiłoŭvańnia plity niama.
«Fłahštok» zadajecca pytańniem: navošta spatrebiłasia vydalać kavałak bietonu? Dla praviadzieńnia śpiecyjalnaj ekśpiertyzy? Niešta zachrasła ŭ ścianie?
Adnak niahledziačy na toje, što homielskaje vydańnie pierahledzieła dastupnyja fotamateryjały, jano, vierahodna, vypuściła z ŭvahi videa, jakoje było zroblena značna raniej za nazvanuju datu. Jano tłumačyć, dla čaho spatrebiłasia vypiłavać hety frahmient.
19 śniežnia Onlíner apublikavaŭ videa z Homiela, na jakim bačna, što vyrvanaja tarcovaja plita doma była časova zamacavanaja avaryjnaj mietaličnaj ściažkaj, kab praduchilić dalejšaje abvalvańnie.
Ściažka achoplivała tryvałyja kanstrukcyi kvatery, a ŭ miescach złomaŭ — na krajach bałkonnych panelaŭ i ŭ akonnym prajomie kuchni — byli zroblenyja śpiecyjalnyja ŭpory, kab ściažka była zafiksavanaja i nie razburała krai plit, asłablajučy naciažeńnie i fiksacyju kanstrukcyi.
Adzin z hetych uporaŭ raźmiaščaŭsia akurat tam, dzie paźniej staŭ bačny vypiłavany frahmient ściany. Tamu kanśpirałahičnaja viersija pra asablivuju cikavaść hetaha kavałka dla ekśpiertyzy vyhladaje mienš vierahodnaj: razrez źjaviŭsia ŭ momant mantažu ŭpora abo jaho demantažu — jak techničnaja patreba, a nie jak pošuk čahości ŭ ścianie.
Dzie byŭ vybuch?
Toje, što epicentr vybuchu znachodziŭsia ŭ 107‑j kvatery na 7‑m paviersie, paćviardžajuć ślady sažy na špalerach inšych pamiaškańniaŭ. Zaŭvažny čorny har u piarednim pakoi i zakuranaść u spalni hetaj dvuchpakajoŭki.
Samaj zakuranaj źjaŭlajecca kuchnia 107‑j kvatery. Pra stan prybiralni i vannaj infarmacyi niama, ale varta dapuścić, što krynica vybuchu mahła znachodzicca i tam.
Śladoŭ sažy niama ŭ najbolš paciarpiełaj haścioŭni 107‑j kvatery. «Fłahštok» piša, što vybuchovaja chvala raspaŭsiudziłasia takim čynam, što sarvała z macavańniaŭ piać panelaŭ: mižkvaternuju panel pamiž 107‑j i 108‑j kvaterami, źniešnija kantavyja paneli łodžyi i haścioŭni 107‑j kvatery i haryzantalnyja plity padłohi i stoli haścioŭni kvatery №107. Defarmavanyja plity i adsutnyja akonnyja błoki vydańnie naniesła na čarciož paviercha, paznačyŭšy čyrvonym.
Mierkavańnie «Našaj Nivy»
Na našu dumku, kazać pra piać panelaŭ, sarvanych vybuchovaj chvalaj, niekarektna. Adzinaj plitoj, jakuju sapraŭdy častkova vyrvała vybucham (prynamsi, u vierchniaj častcy), stała doŭhaja tarcovaja ścienavaja panel. Heta, u svaju čarhu, paciahnuła šerah nastupnych razbureńniaŭ: plita pierakryćcia, jakaja abapirałasia na jaje, straciła aporu i ruchnuła ŭniz, abvaliŭšy svaim ciažaram nižejšuju plitu pierakryćcia — tut jašče paščaściła, što dom nie skłaŭsia takim čynam da pieršaha paviercha.
Što adbyłosia ź mižkvaternaj plitoj, nie da kanca zrazumieła — na fotazdymkach MNS bačna, što jana zavaliłasia ŭnutr susiedniaj 108‑j kvatery, adnak jaje vierchni frahmient zastaŭsia visieć na macavańni. Taki charaktar jaje razbureńnia moža ŭskosna paćviardžać, što panel nie była prosta vybitaja vybuchnoj chvalaj, a, vierahodna, była vyłamana ŭ vyniku straty kanstrukcyjami apory.
Heta nie adzinaja mižkvaternaja ściana, tamu tłumačačy pryčynu jaje razbureńnia, treba abo zhadzicca z tym, što najbolš mahutny ŭdar adbyŭsia ŭ haścioŭni (choć epicentr byŭ u inšych pakojach), abo pryznać, što pryčynaj jaje razbureńnia stała mienavita miechaničnaje abvalvańnie.
Što da mierkavanaha epicentra vybuchu na kuchni, jaki na pieršy pohlad zdajecca zanadta dalokim, kab «vyłamać» panel u inšym pakoi, varta ŭličvać: haz pry ŭciečcy moža raspaŭsiudžvacca pa ŭsioj kvatery. Najvyšejšyja kancentracyi čaściej byvajuć kala miesca vycieku, ale realnaje raźmierkavańnie zaležyć ad vientylacyi, pierapadaŭ tempieratur i taho, ci byli adčynienyja dźviery. My nie viedajem, nakolki kvatera była zapoŭnienaja hazam u momant zapalvańnia i dzie mienavita jano adbyłosia.
Na kuchni značnaja častka cisku mahła «skinucca» praź vialiki akonny prajom, jaki zajmaje bolšuju častku ściany: pry vybuchach u zamknionych abjomach praryŭ vonki časta pamianšaje dalejšaje narastańnie cisku ŭ hetym pamiaškańni. U vybuchovaniebiaśpiečnych pramysłovych zonach dla hetaha niaredka praduhledžvajuć lohkaskidalnyja elemienty, kab vybuchnaja chvala vychodziła vonki, źnižajučy razburalny efiekt dla piersanału i abstalavańnia.
Adnačasova častka chvali i patoku hazaŭ moža pajści ŭ kalidor i dalej — jak pa kanale. Kali ž u kalidory i susiednich pamiaškańniach taksama była vybuchovaniebiaśpiečnaja sumieś, hareńnie mahło praciahnucca i tam, pavialičyŭšy ahulny cisk.
Bolš «hłuchaja» haścioŭnia, ź mienšaj mahčymaściu chutka razhiermietyzavacca, u takim scenary sapraŭdy moža atrymać bolšy razburalny efiekt. Tym bolš što vyłamana samaja bujnaja fasadnaja panel — i heta zakanamierna. Z-za vialikich pamieraŭ jana maje macavańni tolki pa pierymietry, nie majučy dadatkovych kropak fiksacyi pa płoščy. Heta zrabiła jaje ŭraźlivaj pierad unutranym ciskam. Situacyju zrabiła katastrafičnaj toje, što mienavita na hetuju ścianu abapirałasia mižpavierchavaje pierakryćcio.
Taksama praz adsutnaść vizualnych paćviardžeńniaŭ byŭ praihnaravany toj fakt, što vybić vokny ŭ susiedniaj kvatery №108 mahło nie tolki praz prałom pamiž kvaterami. Uvachodnyja dźviery kvater raźmieščany pierpiendykularna adny da druhich. Z tych pamiaškańniaŭ, jakija my mahli bačyć na fota, najbolš śladoŭ hareńnia zafiksavana ŭ piarednim pakoi kvatery №108, adrazu za ŭvachodnymi dźviarami. Ci źjaŭlajucca dvoje ŭvachodnych dźviarej pieraškodaj dla vybuchovaj chvali, jakaja vyłamała ścienavuju panel?
Ci moh adbycca vybuch u vyniku ramontnych rabot?
Pry abmierkavańni abstavin vybuchu čaściakom abmiarkoŭvałasia viersija vybuchu z-za ramontnych rabot pa naciahvańni stoli.
Razhlad kadraŭ razborki doma nie paćviardžaje hetuju viersiju. Śladoŭ ramontu ŭ 107‑j kvatery niama. Ślady naciažnych stolaŭ u piarednim pakoi, spalni (na kadrach demantažu doma vyšej) i haścioŭni adsutničajuć.
Adkazać, što adbyłosia ŭ samym paciarpiełym pamiaškańni — kuchni 107‑j kvatery — mohuć tolki śpiecsłužby.
Što dumajuć sami žychary paciarpiełaha doma?
«Fłahštok» pahavaryŭ z žycharom susiedniaha padjezda na ŭmovach ananimnaści. Ihar (imia źmienienaje) paviedamiŭ, što žychary doma nie vierać u viersiju ŭładaŭ. Pachu hazu nie zafiksavali, rabot ŽEU na hazavym abstalavańni, nakolki viadoma žycharam, u domie nie viałosia. Pavodle ich infarmacyi, mieli miesca złamysnyja dziejańni ludziej, jakija žyli abo haściavali ŭ žycharki treciaha padjezda Natalli.
Dyk što ž heta było? Infarmacyja pra paciarpiełych, vyviezienych na chutkaj dapamozie, ahučvałasia ŭ pieršyja hadziny paśla vybuchu miascovymi žycharami, ale ŭ aficyjnaj infarmacyi pra vybuch pra ich nie zhadvałasia.
Adna sa zdahadak «Fłahštoka», jakuju ciapier niemahčyma ni paćvierdzić, ni abvierhnuć, — pryčynaj vybuchu ŭ 107‑j kvatery doma №3 pa vulicy Kosarava mahło stać nieaściarožnaje abychodžańnie z vybuchovym prystasavańniem, pryviezienym z rasijska-ŭkrainskaj vajny.
Mienavita viersija pra vybuch prystasavańnia, pryviezienaha najmitam, moža rastłumačyć maŭčańnie ŭładaŭ. Bo lubyja zhadki pahrozy, jakaja pachodzić ad rasijskaj vajny va Ukrainie, pryvodziać miascovyja ŭłady i śpiecsłužby ŭ stupar. Jany zachoŭvali maŭčańnie navat u vypadkach, kali rasijskija «šachiedy» padali ŭ centrach biełaruskich haradoŭ.
A što ź viersijaj uładaŭ?
Viersiju pra vybuch hazapavietranaj sumiesi taksama nielha adkidać. Jak patłumačyŭ «Fłahštoku» ekśpiert-vybuchatechnik, jaki taksama razhledzieŭ vykładzienyja tut fota, takija paškodžańni mahli ŭźniknuć z-za vybuchu hazapavietranaj sumiesi:
«Jakaja-niebudź hranata dakładna nie zrobić takich razbureńniaŭ, pakolki nie maje takoj mahutnaści. Da taho ž vybuchoŭka kryšyć, a tut nie pakryšyła, a vybiła plitu».
Adnak samaje hałoŭnaje pytańnie, jakoje ŭźnikaje ŭ vypadku praŭdzivaści viersii ŭładaŭ: čamu jany maŭčać pra vinavatych i kankretnyja abstaviny incydentu, vymušanyja chavać vyhlad miesca vybuchu i jaho abstaviny?
Što budzie z domam u Homieli, dzie vybuchnuŭ haz i zahinuła žančyna pad abłomkami?
«Vybiahała z padjezda ŭ pižamie i z hadavałaj małoj u pledzie». Paciarpiełaja padčas vybuchu ŭ homielskim domie raskazała, jak heta było
«Taki strašenny huk byŭ, ja ažno padskočyła». Što zaraz adbyvajecca ŭ Homieli, dzie byŭ razburany padjezd
Dziaržaŭnyja miedyja nie kažuć pra achviar vybuchu ŭ Homieli, kab nie było niehatyvu ŭ dni UNS?
81‑hadovuju maci aŭtaryteta Skitova z «Babulinaj krynki» kinuli ŭ SIZA KDB, kab jon narešcie zahavaryŭ8
Kamientary
Redakcyja, kali pryhledziecca, to zaŭvažna, što heta “saža” idzie roŭna pa konturach mebli - naviasnych šafaŭ u kuchni dy vysokich šafaŭ u zali. U toj čas jak sama mebla, vyhladaje, raźlaciełasia ad vybuchovaj chvali.
Što chutčej śviedčyć nie pra “sažu”, jakaja źjaviłasia na ścienach ŭ karotki momant vybuchu pa hetych konturach, - a pra brudnyja niamytyja ścieny jašče da zdareńnia.