Stała viadoma, kolki mirnych hramadzian zahinuła ŭ Rasii, a kolki va Ukrainie za čatyry hady vajny

Vajna, jakaja ciahniecca amal čatyry hady, niaŭmolna pavialičvaje śpis svaich achviar. Za ličbami suchoj statystyki chavajucca sotni tysiač trahiedyj. Hinuć nie tolki vajskoŭcy, ale i mirnyja ludzi. U zonie bajavych dziejańniaŭ heta časta vypadkovyja śmierci. Adnak ahulnyja ličby achviar jasna pakazvajuć, jaki bok advolna abstrelvaje mirnyja harady i cyvilnyja abjekty.

Pavodle zajavy staršyni Śledčaha kamiteta Rasii Alaksandra Bastrykina, z pačatku poŭnamaštabnych vajennych dziejańniaŭ pad ataki z boku Ukrainy trapili 44 rehijony Rasijskaj Fiederacyi, jakija znachodziacca ŭ hłybini ad linii frontu. Z 2022 hoda zafiksavana zvyš 11 tysiač abstrełaŭ i atak z vykarystańniem bieśpiłotnikaŭ.

Bastrykin ahučyŭ kolkaść achviar siarod mirnaha nasielnictva Rasii za čatyry hady vajny: 1074 čałavieki, siarod jakich 39 dziaciej.

Ranieńni roznaj stupieni ciažkaści atrymaŭ 5181 čałaviek, ź ich 328 — niepaŭnaletnija.

Varta paraŭnać hetyja ličby sa źviestkami minułaha hoda. Dziesiać miesiacaŭ tamu, 2 sakavika 2025 hoda, Bastrykin paviedamlaŭ ab 652 zahinułych mirnych žycharach, u tym liku 23 dzieciach. Na toj momant kolkaść paranienych składała 2980 čałaviek (ź ich 169 dziaciej).

Takim čynam, za niapoŭny hod kolkaść achviar siarod mirnaha nasielnictva Rasii vyrasła na 65%, a siarod dziaciej na 70%. Kolkaść paranienych pavialičyłasia ŭ 1,7 raza.

U toj ža čas rasijskija dziaržaŭnyja ŚMI nie zhadvajuć pra maštaby achviar siarod mirnaha nasielnictva Ukrainy, choć hetyja ličby ŭ razy bolšyja.

Pavialičyć

Upraŭleńnie Viarchoŭnaha kamisara AAN pa pravach čałavieka paviedamiła, što z pačatku bajavych dziejańniaŭ pa 12 studzienia 2026 hoda va Ukrainie paćvierdžanaja hibiel pa mienšaj miery 14 999 mirnych žycharoŭ, jašče 40 601 cyvilnaja asoba atrymała ranieńni.

Źviartaje ŭvahu, što najbolšaja kolkaść achviar prypadaje na samy pačatak vajny — sakavik 2022 hoda, kali pad rasijskaj akupacyjaj znachodzilisia vialikija terytoryi Ukrainy, ź jakich rasijanie paśla zmušanyja byli adstupić.

Pavialičyć

Siarod paćvierdžanych zahinułych — nie mienš za 763 dziciaci, siarod paranienych — nie mienš za 2486.

Pavialičyć

Upraŭleńnie AAN padkreślivaje, što realnyja straty siarod mirnaha nasielnictva, chutčej za ŭsio, značna vyšejšyja, asabliva ŭ takich haradach, jak Maryupal, Izium, Lisičansk, Papasnaja i Sievieradanieck, dzie išli najbolš intensiŭnyja bai.

Ahułam, abapirajučysia na aficyjna paćvierdžanyja źviestki abodvuch bakoŭ i mižnarodnych arhanizacyj, za čatyry hady vajny zahinuła nie mienš za 16 tysiač mirnych žycharoŭ. Ź ich — kala 15 tysiač mirnych žycharoŭ Ukrainy i kala tysiačy mirnych žycharoŭ Rasii.

Adnak mižnarodnyja ekśpierty papiaredžvajuć: kali ŭdasca atrymać dostup da ŭsich miescaŭ masavych pachavańniaŭ i pravieści poŭnuju vieryfikacyju ŭ razburanych haradach, hetaja ličba moža istotna vyraści.

• 0
• 0
• 0
• 3
• 0
• 9
• 3
• 0