Namieśnik dyrektara Vialikaha teatra Biełarusi — padpałkoŭnik milicyi

Pavodle źviestak Belpol, Vadzimu Martysieviču 52 hady, jon rodam z ahraharadka Ździtava Biarozaŭskaha rajona. Svaju karjeru mužčyna pačaŭ u 1997 hodzie jak učastkovy inśpiektar milicyi Kastryčnickaha RUUS Minska. U 2000-m Martysievič staŭ inśpiektaram pa prafiesijnaj padrychtoŭcy kadraŭ u tym ža samym RUUS. Tak jon prapracavaŭ čatyry hady.

U 2004-m siłavik uładkavaŭsia ŭ arkiestr HUUS Minharvykankama. Pavodle źviestak Belpol, Martysievič byŭ tam dyryžoram.

Jahony znajomy Andrej (imia źmieniena) uspaminaje tuju pracu inakš.

«Moža, na papiery tak napisali, ale jon zajmaŭsia mienavita arhanizacyjaj vystupaŭ i administracyjnaj pracaj, — raskazvaje mužčyna. — Jon dakładna nie byŭ u arkiestry dyryžoram, ja takoha nie pamiataju. U samadziejnaści ŭ milicyi ŭdzielničaŭ (užo zabyŭsia, z čym mienavita vystupaŭ), ale na hetym usio. Papiaredniuju načalnicu adpravili na piensiju, i jon niejkim čynam atrymaŭ jaje miesca. Dumaju, što prosta kudyści ŭ HUUS źviarnuŭsia, prapanavaŭ svaju kandydaturu, i jaho pastavili».

U 2016 hodzie Martysievič pajšoŭ z arkiestra i ŭznačaliŭ adździeł ideałahičnaj raboty i kadravaha zabieśpiačeńnia Śpiecliceja MUS. Adtul u śniežni taho ž hoda zvolniŭsia pa pahadnieńni bakoŭ i bolš u siłavyja struktury nie viartaŭsia.

Pajšoŭ u adstaŭku Martysievič u zvańni padpałkoŭnika. Paśla hetaha, pavodle infarmacyi Belpol na leta 2021 hoda, mužčyna pracavaŭ načalnikam učastka ŭ pivavarnaj kampanii «Krynica». Pra jaho dalejšuju karjeru abjadnańniu ničoha nie viadoma.

U Vialiki teatr opiery i baleta Martysievič, vierahodna, pryjšoŭ u krasaviku — mai 2023-ha. Tak, jaho imia źjaŭlajecca na sajcie teatra ŭ śpisie kamisii pa supraćdziejańni karupcyi ŭ mai 2023 hoda. Na zachavanaj kopii toj ža staronki za sakavik 2023-ha mužčyny ŭ śpisie jašče niama.

Z Martysievičam Andrej daŭno nie mieŭ znosin. Ale kaža, što ŭ časy pracy ŭ arkiestry HUUS mužčyna rabiŭ uražańnie «niadrennaha čałavieka». Praŭda, daviedaŭšysia, što toj zajmaje pasadu namieśnika dyrektara Vialikaha teatra, surazmoŭca «Lusterka» vielmi ździviŭsia:

«Mahu tolki adnym słovam — jon ža mient. Razumiejecie, Vialiki teatr — heta ž samaja hałoŭnaja z usich placovak. Chto im pavinien kiravać? Jak minimum čałaviek z profilnaj adukacyjaj. Nie abaviazkova muzyka, jon moža być baletmajstram, jašče kimści. A Martysievič prasoŭvaje «administratyŭku», jamu nie važnaja tvorčaść, jamu važna, kab usio było «čotka». Navat u vašym artykule pra hastroli ŭ Krym jon kaža, što nijakich prablem, hetyja nie pajeduć, inšych nabiarom. Voś taki pryncyp, ja tak razumieju».

• 0
• 0
• 1
• 5
• 0
• 0
• 0
• 0