Najbujniejšy ŭ Biełarusi pieletny zavod spyniaŭ pracu praz sankcyi. Ciapier «aryjentujecca na ŭnutrany rynak»
«Samy bujny ŭ Biełarusi pieletny zavod, jaki byŭ adkryty ŭ 2020 hodzie ŭ Mazyry, spyniaŭ vytvorčaść. Pra heta daviedaŭsia «Fłahštok» z publikacyi ŭ mazyrskaj rajonnaj haziecie, jakaja paviedamiła pra adnaŭleńnie pracy zavoda.
Pry zapusku vytvorčaści paliŭnych hranuł na bazie Mazyrskaha vopytnaha lashasa płanavałasia, što pradukcyja budzie pastaŭlacca, u asnoŭnym, na rynak Jeŭrasajuza. Adnak «sankcyjnaja palityka pryviała da taho, što płany daviałosia karektavać», kanstatuje hazieta Mazyrskaha rajvykankama.
Jak paviedamlałasia raniej, u Homielskaj vobłaści ŭ 2020-2022 hadach byli adkrytyja try pieletnyja zavody z raźlikam na ekspart u jeŭrapiejskija krainy. Ale z pačatkam rasijskaha ŭvarvańnia va Ukrainu z terytoryi Biełarusi pradukcyja drevaapracoŭki krain-ahresaraŭ trapiła pad sankcyi i ekspart pieletnaha paliva staŭ niemahčymy.
Da hetaha 95% pradukcyi mazyrskaha pradpryjemstva išło na ekspart — zavod zarablaŭ valutu. U 2023-2024 hadach — tolki na ŭnutrany rynak. «Tut užo była inšaja cenavaja palityka i mizernyja abjomy», — pryznała dyrektarka pradpryjemstva Alesia Silič.
Pavodle jaje słoŭ, paśla adnaŭleńnia vytvorčaści ŭ 2025 hodzie «ŭžo prapracavali mahčymaść pastavak paliŭnych hranuł na ekspart u krainy dalokaha zamiežža». Jakich — nie ŭdakładniajecca:
«Z sakavika 2025 hoda z metaj vyvučeńnia popytu my pačali adpraŭlać pradukcyju nievialikimi probnymi partyjami ŭ krainy dalokaha zamiežža».
Pry hetym dyrektarka adznačyła, što «pakul u bolšaj stupieni aryjentujemsia na ŭnutrany rynak», pakolki «ŭ respublicy paetapna realizujecca prahrama pa madernizacyi i pieraŭzbrajeńni kacielniaŭ na miascovyja vidy paliva».
Taksama kiraŭnica pradpryjemstva pryznała, što lashas dahetul nie vypłaciŭ kredyty, uziatyja na realizacyju prajekta:
«U siłu abstavin, jakija skłalisia, pradpryjemstva było pierakredytavana pad harantyju ŭrada z adterminoŭkaj płaciažu na adzin hod, a ź lipienia biahučaha hoda my pačniem samastojna spraŭlacca z kredytnymi abaviazacielstvami».
Pry realizacyi pradukcyi na ŭnutranym rynku zapłanavanaj vyručki ŭ pradpryjemstva ŭ lubym vypadku nie budzie: dla biełarusaŭ pielety ciapier kaštujuć u 4 razy tańniej, paviedamlaŭ lashas, rekłamujučy svoj tavar.
Kamientary
A po normalnoj cienie vsiem nie prodajut.Nado i propisaťsia, i pokłoniťsia,i spravok nabrať