Google, TikTok i Facebook raźmiaścili svajo abstalavańnie bližej da Biełarusi i Rasii
U minułym hodzie bujnyja zamiežnyja technałahičnyja kampanii pačali raźmiaščać svaje data-centry ŭ Varšavie. Heta treba, kab paskoryć pracu ich servisaŭ u Biełarusi i Rasii. Ab hetym raspavioŭ namieśnik hienieralnaha dyrektara biełaruskaha Nacyjanalnaha centra abmienu trafikam Vital Karboŭski padčas International Night Telecom Forum u Sankt-Pieciarburhu, piša RBK.
Tak, pavodle jaho słoŭ, technałahičnyja kampanii pačali raźmiaščać na terytoryi Polščy svaje kešavalnyja sierviery. U pryvatnaści, jany dapamahajuć paskoryć zahruzku kantentu za košt taho, što jon zachoŭvajecca łakalna.
Vital Karboŭski adznačyŭ, što svajo abstalavańnie ŭ Varšavie raźmiaścili amierykanskija karparacyi Google, Facebook i Akamai. Apošniaja kampanija pracuje z Apple, Microsoft, Steam i h. d. Taksama svajo abstalavańnie ŭ Polščy raźmiaściła kitajskaja ByteDance, jakaja vałodaje TikTok.
Pa słovach śpiecyjalista, z-za sankcyj sietki dastaŭki kantentu, jakija byli pabudavanyja ŭ Rasii da 2022 hoda, ciapier nie abnaŭlajucca. Pry hetym u Varšavie pastavili abstalavańnie macniejšaje, čym u Frankfurcie-na-Majnie. Tam raźmieščany najbolš papularny siarod biełaruskich, rasijskich i kazachstanskich apierataraŭ punkt abmienu trafikam z zamiežnymi pravajdarami.
Varta adznačyć, što ciapier punkt abmienu ŭ Frankfurcie pierahružany. Adna z pryčyn hetaha — rost kolkaści karystalnikaŭ VPN-servisaŭ.
Punkt ža ŭ Varšavie hieahrafična bližejhy da Biełarusi i Rasii. Adpaviedna, pieradača trafiku pamiž rehijonami adbyvajecca na 14—15 milisiekund chutčej, čym z Frankfurta.
Kamientary