Pahladzieli «Hulniu ŭ kalmara — 2». Ci ŭdaŭsia praciah kultavaj historyi?

Spačatku nievialiki likbiez dla tych, chto prapuściŭ pieršy siezon «Hulni ŭ kalmara» i źviazany ź im ažyjataž (jak u vas atrymałasia?). Heta prajekt paŭdniovakarejskich kinošnikaŭ, źniaty na inviestycyi stryminhavaha siervisu Netflix. 

Siužet taki: na zakinutym vostravie źbirajucca 456 paŭdniovakarejcaŭ, bolšaść ź jakich majuć hihanckija daŭhi. Udzieł u hulni byccam by musić vyrašyć ich prablemy, voś tolki chutka vyśviatlajecca, što košt tvajoj pieramohi — heta śmierci inšych hulcoŭ. Los kožnaha, chto hatovy paŭdzielničać u hulni, vyrašajecca ŭ sieryi karejskich dziciačych hulniaŭ.

Pieršy siezon sieryjała vyjšaŭ vosieńniu 2021-ha i vyklikaŭ redkasny ažyjataž. Usiaho za niekalki tydniaŭ «Hulnia ŭ kalmara» zaniała pieršaje miesca ŭ śpisie samych papularnych sieryjałaŭ ad Netflix. Byli i kurjozy: sieryjalny numar vierbavalnika na hulniu naležyć sapraŭdnaj karejancy, i paśla premjery jana atrymlivała da 4 tysiač zvankoŭ štodzień — daviałosia pieramantavać sieryjał, kab vyratavać žančynu.

26 śniežnia Netflix vykłaŭ adrazu ŭvieś druhi siezon «Hulni ŭ kalmara» — siem sieryj. U historyju viartajecca hałoŭny hieroj — Son Ki Chun, były hulniaman, jaki vyjhraŭ u pieršym siezonie ŭsiu sieryju hulniaŭ. Buduć i znajomyja dekaracyi, i ŭsio toj ža ŭzrovień hvałtu, tak što raźličvajcie siły.

Pavialičyć

Jašče padčas pieršaha siezonu stała jasna, što za pryhodami i žachami «Hulni ŭ kalmara» nasamreč chavajecca hłyboki sens. Niaščasnyja hulcy, hatovyja achviaravać žyćciom za hrošy — alehoryja, praź jakuju nam pakazvajuć sutnaść kapitalizmu i ekanamičnaj niaroŭnaści. U hetaj sistemie tyja, chto nie maje hrošaj, zmahajucca za žyćcio, i časam dla ich meta apraŭdvaje srodki. Tym časam ludzi, jakija apynulisia na viaršyni charčovaha łancužka, nazirajuć za pakutami słabiejšych.

Ale nie ŭsie hatovyja hulać pa hetych praviłach. I kali Son Ki Chun vybirajecca z vostrava sa svaim šalonym zarobkam u dziasiatki miljonaŭ dalaraŭ, jon vyrašaje, što hulni treba spynić. Pieršy krok — znajści viarboŭščyka na hulni, i heta ŭ Son Ki Chuna atrymlivajecca. Praŭda, z časam jon vyrašaje, što spynić hulni možna tolki adnym čynam.

Pavialičyć

Druhi siezon bahaty na ŭsio toje, čym začapiła hledačoŭ pieršaja častka historyi. I niezdarma jany majuć padobnyja rejtynhi: naprykład, na resursie Rotten Tomatoes pieršy siezon maje rejtynh 95%, druhi — 85%. Rejtynh druhoj častki, miarkujem, padpsavaŭ u tym liku finał siezonu, bo aŭtary pakidajuć nadta šmat abarvanych siužetnych linij. Ale ŭ 2025-m nas čakaje finalny, treci siezon «Hulni ŭ kalmara», i možna spadziavacca, što tam buduć usie adkazy.

Asobnaje zadavalnieńnie — toje, što scenarysty viarnuli ŭ historyju viadučaha hulni dy jašče i dali hetamu piersanažu raskryć siabie. Heta hieroj Li Bion Chona, paŭdniovakarejca, jaki paśpieŭ pazdymacca ŭ Halivudzie: Li mieŭ zaŭvažnyja roli, naprykład, u bajevikach «Terminatar: Hienezis» i «RED 2».

Piersanaž Li Bion Chona — ledź nie samy składany i cikavy ŭ druhim siezonie. Viadučy zastajecca takim ža biaźlitasnym, jak i ŭ pačatku historyi, ale ŭ adnoj ź sieryj jon prymaje novaje ampłua, supraćlehłaje jaho sapraŭdnaj sutnaści, i robić heta vielmi pierakanaŭča. Pryhledźciesia: i ŭ novaj svajoj roli viadučy praciahvaje kiravać chodam hulni.

Jašče adna kłasnaja akciorskaja praca — Tanas (Čchvie Syn Chion), były repier, jaki straciŭ šmat hrošaj na kryptavalucie i abjadnoŭvaje vakoł siabie inšych hulcoŭ. Mietady, z dapamohaj jakich Tanas zmahajecca za žyćcio, nie pakinuć vas abyjakavymi, taksama jak i pavodziny šmatlikich inšych hulcoŭ.

Pavialičyć

Składanaści ŭ historyju dadaje toje, što nam raskryvajuć asoby niekatorych supracoŭnikaŭ-kileraŭ — tych, chto raspraŭlajecca z hulcami, jakija prajhrali. Siarod snajpieraŭ u ružovym pracuje byłaja paŭnočnakarejanka. Niekali jana źbiehła ŭ Paŭdniovuju Kareju i pakinuła na radzimie maleńkuju dačku, a ciapier nie moža zabić u sabie spačuvańnie da hulcoŭ.

Son Ki Chun uvachodzić u druhi siezon, poŭny spadziavańniaŭ, što, kab spynić hulniu, jon musić prosta znajści jaje arhanizataraŭ. Ale zamiest hetaha Sonu, a zaadno i nam, pradstaŭlajuć pytańnie, adkazu na jakoje jon nie maje. Čamu nasamreč idzie hulnia, chto jaje žadaje — arhanizatary ci sami hulcy?

Pavialičyć

U kancy siezonu Son Ki Chun, zdajecca, znachodzić adkaz, ale zrabić vysnovy jon užo nie moža — vyhladaje, što niaščasny hulec užo zrabiŭsia častkaj hetaha śvietu. I pradmiet, jaki jon prymiaraje ŭ finale siezonu, heta tolki dakazvaje.

• 5
• 1
• 1
• 1
• 0
• 0
• 0
• 1