Knyrovič raskazaŭ, čamu były dyrektar aršanskich zavodaŭ paśla vyzvaleńnia pajšoŭ vajavać za Rasiju, dzie i zahinuŭ

Alaksandr Knyrovič kaža, što paznajomiŭsia z Uładzimiram Troickim u 2018 hodzie, kali jany abodva znachodzilisia ŭ viciebskaj kałonii.

Troickaha tady asudzili na 4 hady kałonii ŭzmocnienaha režymu z kanfiskacyjaj majomaści — pa spravie ab złoŭžyvańni słužbovymi paŭnamoctvami pry budaŭnictvie aeradroma ŭ 2011-2013 hadach.

U kałonii Troicki časta ŭdzielničaŭ u hulniach «Što? Dzie? Kali?», jakija Knyrovič arhanizoŭvaŭ razam ź jašče adnym asudžanym. Byłoha dyrektara zavodaŭ jon zhadvaje jak žyćciaradasnaha i intelihientnaha čałavieka.

«Prajaviŭ siabie jak čałaviek vysokaha intelektu. Kali kažuć pra dobruju savieckuju adukacyju, majuć na ŭvazie takich ludziej», — zhadvaje jon.

Ale pa adnoj temie źniavolenyja niamała svarylisia: Troicki byŭ prychilnikam ruskaha miru. 

«Ja nie moh zrazumieć, jak u adnym čałavieku moža spałučacca dastatkova surjozny ŭzrovień adukacyi i taki pohlad na śviet. Ale tym nie mienš jon spałučaŭsia. Jon čytaŭ rasijskija haziety i časopisy ŭ kałonii. Paśla niekalkich surjoznych sprečak my vyrašyli, što hetyja temy ź im abmiarkoŭvać nie budziem, kab nie pačynać niepatrebny kanflikt», — raspaviadaje Knyrovič.

Troickaha nie adpuścili pa skančeńni terminu. Niezadoŭha da mierkavanaha vyzvaleńnia dali chod druhoj kryminalnaj spravy suprać dyrektara zavodaŭ.

«Jon na maich vačach vyjšaŭ z kłuba, atrymaŭšy hetu papierku (pra druhuju kryminalnuju spravu — NN.), — absalutna šeraha koleru čałaviek. Advieźli jaho z kałonii ŭ SIZA na jašče adzin sud. Jak ja pamiataju, jamu dadali try hady za druhuju spravu. Dasiedžvaŭ u kałonii ŭ Babrujsku», — raspaviadaje Knyrovič.

Troicki vyjšaŭ z kałonii ŭ studzieni 2023 hoda, pačaŭ šukać sabie pracu. Ale ŭ Oršy dla jaho ničoha nie było, udakładniaje Alaksandr pa infarmacyi ad ich ahulnych znajomych.

U niejki čas jon skazaŭ blizkim, što «jedzie ŭ Sibir zarablać hrošy». Źjechaŭ — i sapraŭdy dasyłaŭ srodki siamji. A potym pierastaŭ. Praź niejki čas znajomyja vyśvietlili, što jon zahinuŭ za Rasiju.

«Ja ŭpeŭnieny, što kali b u jaho była narmalnaja praca, to nijakich šansaŭ na toje, kab jon pajechaŭ na vajnu, nie było b. Heta było ad adčaju, ad niemahčymaści zabiaśpiečyć siabie i siamju. Ja bačyŭ šmat roznych ludziej u kałonii. Nakont niekatorych skazaŭ by, što jany hatovy pajści zabivać kahości. Ale heta byŭ absalutna nie taki čałaviek», — kaža Knyrovič.

Da Troickaha było pavažlivaje staŭleńnie siarod źniavolenych, jon nikoli nie vyklikaŭ prablem.

«Dla mianie heta vielmi trahičnaja historyja. Kali stasavaŭsia ź im u kałonii, razumieŭ jaho luboŭ da ruskaha śvietu i Pucina, nie mieŭ adčuvańnia, što hety čałaviek choča kahości zabić i sam asabista ŭstalavać rasijski ściah u Kijevie».

Pavodle infarmacyi ŭkrainskaha prajekta «Chaču žyć», 1 vieraśnia 2023 hoda Uładzimir Troicki padpisaŭ kantrakt z rasijskaj armijaj, a ŭžo 5 listapada 2023 hoda zahinuŭ.

• 7
• 2
• 4
• 19
• 1
• 4
• 0
• 0