U Minsku ŭ piatnicu adkryjecca vystava pad adkrytym niebam «Le Karbiuźje: minskaje recha»

Vystava padrychtavana napiaredadni i ŭ ramkach XVI Nacyjanalnaha fiestyvala architektury, pryśviečanaha 90-hodździu Biełaruskaha cajuza architektaraŭ i arhanizavana tvorčym sajuzam sumiesna z Muziejem historyi horada Minska pa inicyjatyvie i pry padtrymcy Pasolstva Francyi i Pasolstva Šviejcaryi ŭ Respublicy Biełaruś.

Minsk, jak i bolšaść haradoŭ śvietu, u XX stahodździ niepaznavalna źmianiŭ svajo abličča. Rolu najbolš radykalnaha płastyčnaha chirurha dla starych haradoŭ adyhraŭ i dahetul hraje architektar Šarl-Eduar Žaniere-Hry, suśvietna viadomy pad tvorčym psieŭdanimam Le Karbiuźje.

Nichto z architektaraŭ tak śmieła i natchniona nie vydalaŭ histaryčnyja napłastavańni, šnary i barodaŭki haradskoj prastory, jaje niaroŭnaści i niedarečnaści, nichto tak horača nie prapanoŭvaŭ zusim inšy, niabačany raniej ład žyćcia i ład myśleńnia dla sučasnaha čałavieka, nichto tak luta nie vyrakaŭsia architekturnych formaŭ minułaha — chiba što sacyjalnyja revalucyjaniery pieršaj pałovy XX stahodździa.

Niezdarma idei Le Karbiuźje mieli haračy vodhuk u pieršaj tracinie XX stahodździa ŭ epicentrach revalucyjnych idej i ruchaŭ — u Mieksicy, Rasii, Hiermanii, a paśla Druhoj suśvietnaj vajny — u Indyi, jakaja imkliva madernizavałasia. Mienavita tam byli stvoranyja mahutnyja madernisckija architekturnyja škoły i zroblenyja ŭražalnyja sproby kardynalna pierabudavać čałaviečaje hramadstva z dapamohaj architektury.

Spadčynu Le Karbiuźje, raskidanuju pa ŭsim ziamnym šary, i jaho znakamityja Piać pryncypaŭ architekturnaha prajektavańnia možna ŭsprymać jak novy architekturny zapaviet, što prarastaje skroź sparachniełuju abałonku architektury minułaha.

Pierasoŭnaja vystava «Le Karbiuźje: minskaje recha» znajomić z tymi prajektami vialikaha architektara, jakija jon ažyćciaviŭ u dźviuch svaich rodnych krainach — Šviejcaryi, dzie jon naradziŭsia i zrabiŭ pieršyja važnyja kroki ŭ prafiesii, i Francyi, dzie jon stvaryŭ ułasnaje architekturnaje biuro.

Hetyja tvory Le Karbiuźje zrabili najmacniejšy ŭpłyŭ na suśvietnuju architekturu — u tym liku na savieckuju architekturu, da jakoj adnosicca značnaja častka budynkaŭ i zbudavańniaŭ biełaruskaj stalicy.

Razhladajučy i rasšyfroŭvajučy jaho znakamityja architekturnyja kancepty, možna pa-novamu zirnuć, naprykład, na maštabnaje budaŭnictva minskich mikrarajonaŭ 1960—1980-ch hadoŭ, na taki horadabudaŭničy šedeŭr jak vodna-zialony dyjamietr, što apiarazvaje Minsk, na ceły šerah vybitnych budynkaŭ, i naohuł na haradskoje asiarodździe, u jakim my žyviom i jakoje — chočam my hetaha ci nie — farmuje nas i vyznačaje naša žyćcio.

Vystava budzie pracavać z 11 lipienia da 14 vieraśnia 2025 hoda.

Adras: pł. Svabody, 15

• 0
• 1
• 0
• 0
• 0
• 0
• 0
• 0